Orait Long Ol Narapela Lotu​—500 Yia Bihain!

KRISTOFA KOLAMBAS i bin lusim Spen 500 yia i go pinis na raun long sip. Wanpela de paslain long Kolambas i lusim Spen sampela sip moa i lusim Spen, tasol ol i go long narapela hap. Taim Kolambas wantaim boskru bilong em i kam bek ol i amamas, long wanem, ol i bin painim ol nupela kantri. Tasol ol man long ol narapela sip ol i no kam bek​—ol i no lukim as ples gen.

Husat ol dispela man ol i bin rausim, na bilong wanem ol i no larim ol i kam bek long as ples bilong ol? Em ol Juda bilong Spen. Tupela wik paslain long King Ferdinand na Kwin Isabela bilong Spen i orait long Kolambas i raun long solwara bilong painim ol nupela kantri, tupela i bin wokim lo i tok, ol Juda i mas raus long Spen na ol i “no inap kam bek.” Tupela i tok, ol Juda bilong Spen i bin mekim pasin nogut long bilip holi bilong lotu Katolik.

Dispela lo wantaim Kot Bilong Misin em nau tasol ol i kirapim, em i makim wanpela pait i laik kamap na olgeta man long Spen i mas bilip long lotu Katolik tasol. Tenpela yia bihain long ol i bin rausim lain Juda bilong Spen, ol i rausim ol man bilong lain Mor sapos ol i insait long lotu Islam. Na Kot Bilong Misin i pinisim ol nupela lotu Talatala i wok long kamap. Tingting bilong Kolambas i wankain long tingting bilong king na kwin bilong Spen. Em i tok, sapos em i painim sampela nupela kantri, ol Juda i no inap sindaun long en.

Dispela pasin bilong birua long ol narapela lotu long Spen i bin stap inap long taim bilong yumi. Taim Francisco Franco i bosim gavman, gavman i save sambai long ol man bilong lotu Katolik tasol. Sapos ol man i laik i go long ol narapela lotu, polis i holim ol. Ol Witnes Bilong Jehova long Spen i bin kalabus, long wanem, kot i tok ol i bagarapim pasin wanbel bilong lotu long Spen. Long 1959 wanpela man bilong gavman, em Camilo Alonso Vega, i tok, polis i mas “pinisim tru” wok bilong ol Witnes. Tasol nau mipela i amamas long wanem dispela hevi i no stap moa.

Long Mas 31, 1992, 500 yia bihain long king na kwin bilong Spen i bin kamapim lo na rausim ol Juda long Spen, King Juan Carlos bilong Spen i bin go long wanpela haus lotu bilong ol Juda long Madrit. Em i bung wantaim ol tumbuna pikinini bilong ol dispela Juda bilong Spen, em lain bipo ol i bin rausim ol long Spen.

Minista bilong jastis, em Tomás de la Quadra-Salcedo i tok: ‘Yumi pinisim dispela pasin bilong daunim narapela lotu.’ Nau ol Juda na Muslim na Talatala inap lotu na ol i no pasim ol. Na gavman i no tambuim moa ol Witnes Bilong Jehova. Long Madrit ol i wokim nupela haus lotu bilong ol Juda, na nupela haus lotu bilong ol Muslim, na brens-ofis bilong ol Witnes i stap. Winim 90,000 Witnes i mekim wok long Spen na ol i tok i no gat narapela lotu Talatala i winim namba bilong ol Witnes long Spen.

Sapos yu laik kisim sampela save moa o save long ol bilip bilong ol Witnes Bilong Jehova, salim pas na toksave long I.B.S.A., Box 636, Boroko, N.C.D., o lukim atres i stret long yu long pes 5.

[Piksa long pes 32]

Haus brens bilong Sosaiti Was Taua long Spen