Dispela Wanpela Man Tasol

‘MAMA i karim em long wanpela liklik ples nating. Em i go bikpela long narapela liklik ples na mekim wok kamda long wanpela woksop i go inap long taim em i kisim 30 krismas. Bihain em i raun 3-pela yia long ol narapela narapela ples na autim tok.

‘Em i no bin raitim wanpela buk. Em i no gat namba olsem man i wok long gavman samting. Em i no bin marit na kamapim pikinini, na em i no gat haus. Em i no bin go long wanpela bikpela skul. Em i no bin go long wanpela bikpela taun. Taim em i lusim as ples em i no go longwe​—inap 300 kilomita tasol. Em i no bin mekim wankain wok olsem ol bikman i gat namba ol i mekim. Em i no gat pas o setifiket bilong kamapim save bilong em long wanpela samting.

‘Em i gat 33 krismas tasol taim ol man i kirap na birua long em. Ol poroman bilong em i ranawe. Ol i putim em long han bilong ol birua na ol i wokim kot giaman. Ol i pasim em long diwai namel long tupela stilman. Taim em i wok long dai, ol soldia i pilai satu bilong makim husat bai kisim ol klos bilong em​—em i no gat narapela samting, dispela ol klos tasol. Taim em i dai pinis wanpela poroman i sori long em, olsem na ol i slipim skin bilong em long matmat bilong dispela poroman.

‘Naintin handet yia i go pinis, tasol em i stap yet olsem nambawan man i winim olgeta narapela man i bin i stap long graun. Olgeta ami, na olgeta nevi, na olgeta gavman, na olgeta king, olgeta wantaim, i no bin senisim i stap bilong ol man long dispela graun olsem dispela wanpela man i bin mekim.’a​—Wanpela man i raitim buk long i stap bilong Krais Jisas.

[Ol Futnot]