Nambawan Man Tru i Winim Olgeta Narapela Man
“Yu dispela man God i bin makim bilong kisim bek ol manmeri bilong en. Yu Pikinini Bilong God i gat laip.”—MATYU 16:16.
1, 2. (a) Olsem wanem yumi ken save wanpela man i nambawan man tru winim ol narapela? (b) Kolim nem bilong sampela bikman bilong bipo. Olsem wanem ol i bin kamap bikman?
YU TING husat i nambawan man tru i winim olgeta narapela man i bin i stap long graun? Wanem samting i makim man i nambawan? Pasin bilong em long pait? o bikpela save bilong em? o strongpela skin bilong em?
2 Bipo i gat ol bikman, olsem Sairus na Aleksander na Salemein, na taim ol i stap ol man i save litimapim nem bilong ol na daun long ol, na ol i gat bikpela namba na ol i bosim strong ol man.
3. (a) Wanem samting tru i makim wanpela man i nambawan man tru, winim ol narapela? (b) Sapos yumi skelim ol man long dispela samting, husat i nambawan man tru i winim olgeta narapela man i bin i stap long graun?
3 Wanpela man bilong raitim stori bilong bipo, em H. G. Wells, em i stori long pasin bilong em long skelim ol man, ol i nambawan man tru o nogat, na 50 yia samting bipo em i tok: ‘Taim mipela skelim ol man, ol i nambawan man tru o olsem wanem, mipela laik save, ol i bin kirapim wanem gutpela wok samting? Na ol i bin givim sampela nupela tingting long ol man na taim ol i dai, ol man i strong yet long bihainim dispela tingting o nogat?’ Na nau Wells i tok: “Jisas i winim olgeta man long mekim ol dispela samting.” Wanpela bikman bilong bipo, nem bilong em Napolion, em i tok: “Krais Jisas i bin stiaim na bosim ol man i stap aninit long em, maski ol i no inap lukim em.”
4. (a) Ol man i gat wanem narapela narapela tingting long Jisas? (b) Wanpela man bilong raitim stori bilong bipo, em i no Kristen, em i tok wanem long Jisas?
4 Tasol sampela man i tok, Jisas em i no wanpela man tru em i bin i stap long bipo. Ol i tok, stori bilong em i stori nating tasol. Tasol sampela man i litimapim tru nem bilong Jisas na ol i tok, em i God na em i bin kam long graun. Tasol Wells i bilip long Jisas i bin stap na em i tok: ‘Mi wanpela man bilong raitim stori bilong bipo na mi no bel nogut long sampela lotu, na mi no Kristen tu, tasol taim mi laik stori long ol lain man bilong bipo mi save tingim dispela rabisman tisa bilong Nasaret na mi litimapim nem bilong em, em i winim olgeta man.’
Jisas i Bin i Stap Tru o Nogat?
5, 6. Tupela man, em H. G. Wells na Will Durant, tupela i tok wanem long Jisas i bin i stap tru?
5 Tasol sapos wanpela man i tok, Jisas i no bin i stap tru na stori bilong em i stori nating sampela man bilong bipo i bin kamapim, bai yu tok wanem? Wells i bin tok, ‘Yumi no save long olgeta samting bilong Jisas,’ tasol em i tok, ‘Tok bilong Matyu na Mak na Luk na Jon long Baibel i tok klia olsem Jisas i bin stap. Sapos yumi tok, em i no bin stap na ol dispela stori i giaman, bai ol saveman i hatwok long stori gut na kolim stret ol samting tru i bin kamap bipo, tasol sapos ol i bilipim dispela tok bilong Baibel, ol i no gat hatwok olsem.’
6 Narapela man bilong raitim stori bilong bipo, em Will Durant, em i gat wankain tingting, na em i tok: ‘Wanpela liklik lain man nating [ol i tok ol i Kristen] ol i bin kamapim stori bilong wanpela bikpela man i gat gutpela pasin i save kirapim ol man long laikim em, na em i gat gutpela lo tru bilong helpim olgeta man long i stap brata brata, olsem na yumi save, ol i stori long wanpela man tru—ol i no inap kamapim nating kain stori olsem.’
7, 8. Wok bilong Jisas i bikpela samting insait long ol samting ol man i bin mekim kirap long taim bilong em na i kam inap long nau, o olsem wanem?
7 Olsem na sapos wanpela man i no laik bilipim stori long Jisas, yu ken tokim em olsem: Sapos Jisas i no wanpela man tru i bin i stap long bipo, yu ting stori bilong em inap kamap as bilong planti samting ol man i bin mekim long dispela taim bipo na i kam inap long nau? Wanpela buk (The Historians’ History of the World) i tok: “Ol samting i bin kamap long rot bilong ol wok bilong [Jisas] i bikpela samting moa, winim wok bilong olgeta narapela man i bin i stap long graun. Taim Jisas i kamap long graun i olsem nupela taim i kirap na ol bikpela lain bilong graun i luksave long dispela samting.” Olsem na ol man i save tingim yia ol man i tok Jisas i bin kamap long en na ol i wokim sampela kalenda bilong nau. Wanpela buk (The World Book Encyclopedia) i tok: “Ol yia paslain long dispela yia em ol i save makim olsem B.C., olsem paslain long Krais. Na ol yia bihain long dispela yia em ol i save makim olsem A.D., o anno Domini (olsem long yia bilong Bikpela).”
8 Jisas i save tru long skulim ol man, na em yet i bihainim ol tok em i lainim ol narapela man long en, olsem na stori bilong em long Baibel i bin mekim bikpela wok long bel bilong planti milion man ol i bin stap insait long dispela 2,000 yia, kirap long taim bilong Jisas na i kam inap nau. Wanpela man i bin tok: ‘Olgeta ami i bin stap, na olgeta nevi tu, na olgeta gavman, na olgeta king, sapos yumi bungim olgeta, orait ol wok ol i bin mekim em i no bin helpim gut ol man olsem wok Jisas i bin mekim.’ Tasol sampela man i save tok: “Baibel tasol i tokim yumi long Jisas, na i no gat narapela rot na bai yumi ken save, Jisas i bin stap o nogat.” Dispela tok bilong ol i stret o nogat?
9, 10. (a) Ol man bilong raitim buk long bipo, em ol i no man bilong lotu, ol i bin tok wanem long Jisas? (b) Wanpela bikpela buk i kamapim wanem tok, em rait bilong ol man bilong bipo i as bilong en?
9 Tru, i no gat planti man bilong bipo i bin stori long Jisas, tasol i gat sampela i bin mekim. Kornilius Tasitas, em wanpela man bilong Rom i raitim stori bilong bipo, em i bin tok, taim taun Rom i paia, bikman Niro i tok, em asua bilong ol Kristen, na “nem Krais em i as bilong dispela nem Kristen, na namba wan gavman Pontius Pailat i bin kilim i dai Krais long taim Taiberius i stap king.” Tupela narapela Rom i raitim buk long taim bilong Jisas, em Switonias na Plini Namba 2, tupela tu i stori liklik long Krais. Na narapela man bilong dispela taim em i raitim stori bilong ol Juda, em Flavius Josifas, na long wanpela buk bilong em (Antiquities of the Jews) em i bin stori long dai bilong disaipel Kristen Jems, na em i tok, Jems em “brata bilong Jisas, na Jisas i gat narapela nem tu, em Krais.”
10 Olsem na wanpela buk (The New Encyclopædia Britannica) i tok: “Ol dispela stori bilong ol dispela man bilong bipo i helpim yumi long save, ol birua bilong lotu Kristen tu i save Jisas em i wanpela man tru em i bin i stap tru. Tasol long yia 1780 samting i go inap yia 1900 samting, sampela man i bin kirap na tok, Jisas i no bin stap, tasol i no gat gutpela as na ol i tok olsem.”
Jisas Em i Husat Tru?
11. (a) I gat wanem wanpela rait tasol i stori gut long Jisas? (b) Ol disaipel bilong Jisas yet i laik save long wanem samting?
11 Klostu olgeta stori bilong Jisas yumi save long en long nau, em lain bilong em long bipo i bin raitim, na ol dispela stori i no bin lus. Nogat. Ol i bin stap gut long Baibel, long 4-pela hap bilong en, em Matyu na Jon (tupela aposel) na Mak na Luk (tupela disaipel) i bin raitim. Na ol dispela stori i tok wanem long Jisas? Jisas em i husat tru? Ol man i bin stap wantaim Jisas long bipo ol tu i laik save long dispela samting. Ol i bin lukim Jisas i wokim mirakel na mekim i dai bikpela si em win i bin kirapim, na ol i bin tingting planti long dispela samting na ol i tok: “Dispela man em i husat?” Na long narapela taim bihain, Jisas i bin askim ol aposel bilong em: “Yupela yet i tok mi husat?”—Mak 4:41; Matyu 16:15.
12. Olsem wanem yumi save, Jisas em i no God?
12 Sapos em i bin askim yu olsem, bai yu tok wanem? Jisas em i husat tru? Planti man bilong ol misin ol bai tok, em i God I Gat Olgeta Strong na em i kam long graun na tanim i kamap man. Tasol lain bilong Jisas i no bin ting em i God. Aposel Pita i tokim Jisas: “Yu dispela man God i bin makim bilong kisim bek ol manmeri bilong en. Yu Pikinini Bilong God i gat laip.” (Matyu 16:16) I no gat wanpela taim Jisas i bin tok em i God. Yu ken painim painim long Baibel, tasol nogat. Jisas i tokim ol Juda: “Mi Pikinini Bilong God.” Em i no God. Nogat.—Jon 10:36.
13. Olsem wanem Jisas i narapela kain long olgeta narapela man?
13 Ol disaipel i kirap nogut taim Jisas i bin wokabaut antap long raunwara i gat bikpela si, na long dispela taim ol i save em i narapela kain man. (Jon 6:18-21) Em i no man nating. Pastaim em i wanpela ensel na em i bin stap wantaim God long heven, na Baibel i tok, em i namba wan ensel. (1 Tesalonaika 4:16; Jut 9) God i bin wokim em paslain long olgeta narapela samting. (Kolosi 1:15) Long bipo bipo yet, taim Jehova i no bin wokim yet graun na san na ples antap, Jisas i bin stap wantaim Papa bilong em long heven, em God Jehova, em Bikpela Man bilong wokim olgeta samting.—Sindaun 8:22, 27-31; Saveman 12:1.
14. Olsem wanem Jisas i bin kamap man long graun?
14 Na 2,000 yia samting bipo God i senisim dispela Pikinini bilong em i go long bel bilong wanpela meri, na bihain em i kamap pikinini man bilong God long graun. (Galesia 4:4) Taim em i stap yet long bel bilong Maria, na taim em i wok long i go bikpela, papamama bilong em long graun i bin lukautim em—God yet i bin givim dispela wok long tupela. Tasol bihain em i kamap bikpela pinis, na God i bekim tingting bilong em na nau em inap tingim taim em i bin stap wantaim God long heven. Dispela samting i bin kamap taim em i baptais na ‘heven i op long em.’—Matyu 3:16; Jon 8:23; 17:5.
15. Olsem wanem yumi save taim Jisas i stap long graun em i wanpela man tru?
15 Tru tumas, Jisas em i narapela kain man. Tasol em i wanpela man tru, na em i wankain olsem Adam, em dispela man God i bin wokim long Iden. Aposel Pol i tok: “ ‘Namba wan man, Adam, i bin kisim laip.’ Tasol narapela Adam i kamap bihain tru, em i bin kamap spirit bilong givim laip long man.” Pol i kolim Jisas olsem “narapela Adam,” long wanem, em i wankain olsem Adam bilong pastaim—skin bilong em i gutpela olgeta. Tasol taim Jisas i dai na Papa i kirapim em bek, em i kamap spirit na em i go bek gen long Papa long heven.—1 Korin 15:45.
Gutpela Rot Bilong Kisim Save Long God
16. (a) Olsem wanem na ol man i bin bung wantaim Jisas ol i bin kisim ol gutpela wok na bikpela amamas? (b) Olsem wanem na yumi ken tok, man i lukim Jisas i olsem em i lukim God?
16 Yu ken tingim ol gutpela wok na bikpela amamas sampela man bilong bipo ol i bin kisim long taim Jisas i bin stap long graun na ol i bin bung wantaim em olsem ol poroman bilong em! Ol i bin harim ol tok bilong em, na ol i bin lukim em, na ol yet i bin toktok wantaim em na wok wantaim em, em dispela Man em i bin stap bipo ating inap planti milion milion yia, na em i bin poroman gut wantaim God Jehova long heven! Em i bin harim gut tok bilong Papa bilong em na em i bihainim olgeta pasin bilong Papa, olsem na klostu long taim em i dai em i tokim ol aposel bilong em: “Man i lukim mi, em i lukim Papa.” (Jon 14:9, 10) Taim Jisas i bin stap long graun, long olgeta taim em i mekim ol samting wankain olsem Papa bilong em bai mekim sapos Papa i bin stap long graun, em Nambawan Strongpela God. Olsem na taim yumi tingim i stap bilong Krais Jisas na ol wok em i bin mekim, yumi ken save, God em i wanem kain Man na em i gat wanem kain pasin.
17. Stori bilong Wastaua ol i kolim “I Stap na Wok Bilong Jisas” i mekim wanem gutpela wok?
17 Olsem na kirap long 1985 inap 6-pela yia, nius Wastaua i bin stori long “I Stap na Wok Bilong Jisas.” Ol dispela stori i stori gut long Jisas taim em i stap long graun, na ol i bin lainim yumi long planti samting bilong Papa bilong em long heven. Tupela stori i kamap pinis long Wastaua na nau wanpela painia i raitim pas long Sosaiti Was Taua bilong tok amamas long ol dispela stori na em i tok: “Sapos yumi save gut long Pikinini, bai yumi inap save gut long Papa!” Em i stret! Pasin bilong sori em Papa i save mekim long ol man, Jisas i bin kamapim dispela pasin long taim em i bin stap long graun.
18. Husat i As bilong tok bilong Kingdom? Jisas i tok wanem na em i tokaut long dispela samting?
18 Jisas i laikim tumas Papa bilong em, olsem na em i bihainim stret laik bilong Papa, na yumi lukim dispela samting i gutpela tru. Taim ol Juda i laik kilim em i dai, em i tokim ol: “Mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi.” (Jon 8:28) Olsem na Jisas i no as bilong tok bilong Kingdom em i bin autim, a? God Jehova i as bilong dispela tok! Na taim gutpela samting i kamap long wok bilong em, Jisas i save tok, Papa tasol i as bilong dispela samting. Em i tok: “Mi no mekim tok long tingting bilong mi yet. Nogat. Papa i bin salim mi na mi kam, em yet i tokim mi long olgeta tok mi mas mekim na autim. . . . Olsem na olgeta tok mi mekim, em mi save mekim olsem Papa i bin tokim mi.”—Jon 12:49, 50.
19. (a) Olsem wanem yumi save Jisas i skulim ol man long pasin Jehova i bihainim bilong skulim ol man? (b) Olsem wanem Jisas em i nambawan man tru i winim olgeta narapela man i bin i stap long graun?
19 Jisas i autim tok na lainim ol man long ol samting Papa i bin tokim em long en, na taim em i mekim olsem, em i mekim long wankain pasin em Papa bilong em bai mekim sapos Papa yet i autim tok na lainim ol man. Planti samting i bin painim Jisas long graun, tasol long olgeta wok na pasin bilong em, em i bihainim stret pasin em Papa bai bihainim sapos ol dispela samting i bin painim Papa. Jisas i tok: “Pikinini em i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim. Olgeta samting Papa i save mekim, em Pikinini tu i save mekim.” (Jon 5:19) Long olgeta samting Jisas i mekim, em i makim stret pasin bilong Papa bilong em, em God Jehova. Olsem na Jisas em i nambawan man tru i winim olgeta narapela man i bin i stap long graun! Em bikpela samting long yumi mas save gut long ol samting bilong dispela bikpela man!
Jisas i Kamapim Klia Sori Bilong God
20. Olsem wanem aposel Jon inap save, God em i “as bilong dispela pasin bilong laikim ol arapela”?
20 Sapos yumi tingim olgeta samting bilong Jisas na wok em i bin mekim, dispela bai givim wanem save long yumi? Aposel Jon i tok: “I no gat wanpela man i bin lukim God.” (Jon 1:18) Tasol long 1 Jon 4:8, Jon i tok: “God yet em i as bilong dispela pasin bilong laikim ol arapela.” Jon inap tok olsem, long wanem, em i bin lukim dispela pasin sori bilong God i stap long Jisas.
21. Jisas i gat wanem ol gutpela pasin na dispela i mekim na em i nambawan man tru i winim olgeta narapela man?
21 Jisas i gat wankain pasin olsem bilong Papa bilong em—em i gat pasin bilong sori, na em i save helpim ol man, na em i gat pasin daun, na ol man i no pret long i go toktok wantaim em. Ol man i no gat strong na ol man nating ol i save amamas long bung wantaim em, na olgeta narapela kain man tu, em ol man, na meri, na pikinini, maski ol i maniman o rabisman o man i gat namba o ol i sinman. Jisas i bihainim pasin bilong Papa bilong em na em i mekim bikpela pasin sori moa yet long ol man, na dispela samting i mekim na em i kamap nambawan man tru i winim olgeta narapela man. Ol man i tok, bikman Napolion bilong bipo i bin tok: “Aleksander, na Sisar, ma Salemein, na mi yet, mipela bin kamapim ol bikpela kingdom. Tasol mipela i kamapim olsem wanem? Long rot bilong pait. Krais Jisas tasol i bin kamapim kingdom bilong em long rot bilong pasin sori, na inap long nau tu, planti milion man i redi long i dai bilong bihainim em.”
22. Olsem wanem ol tok bilong Jisas i narapela kain?
22 Jisas i save mekim ol tok i narapela kain. Em i tok: “Yupela i no ken bekim rong long man i mekim nogut long yupela. Nogat. Sapos wanpela man i solapim wanpela wasket bilong yu, orait yu mas tanim narapela wasket tu i go long em.” “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela.” “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 5:39, 44; 7:12) Sapos ol man i bihainim ol dispela nambawan tok tru, bai gutpela pasin tru i kamap long graun!
23. Jisas i mekim wanem na dispela i kirapim bel bilong ol man long bihainim pasin i stret?
23 Planti man i pilim ol tok piksa Jisas i mekim, na dispela i kirapim bel bilong ol long bihainim pasin i stret na long givim baksait long pasin i no stret. Ating yu save long stori bilong em long wanpela man Samaria, em i man nating, na em i helpim wanpela man bilong narapela lain em ol man i bin bagarapim em, tasol ol wantok bilong dispela man bilong narapela lain, em ol man bilong lotu, ol i no laik helpim em. Na ating yu save long stori bilong wanpela papa i gat tupela pikinini man, na wanpela i lusim papa na i go mekim nabaut, tasol bihain em i kam bek long papa na papa i sori long em. Na tingim stori bilong wanpela king em i lusim dinau bilong man i gat bikpela dinau tru long em, inap 10 milion kina, tasol dispela man i no laik lusim liklik dinau bilong wanpela wanwok i gat dinau long em inap 10 kina tasol, na em i putim em long kalabus. Ol dispela gutpela tok piksa bilong Jisas i helpim yumi long save, pasin mangal em pasin nogut, tasol pasin sori na pasin marimari i gutpela pasin!—Matyu 18:23-35; Luk 10:30-37; 15:11-32.
24. Bilong wanem i stret yumi ken tok, Jisas em i nambawan man tru i winim olgeta narapela man?
24 Ol samting Jisas i lainim ol man long mekim, em yet i bihainim ol dispela samting, na dispela i kirapim ol man long bihainim tok bilong em na bihainim gutpela pasin. Na Jisas i no bin les long ol popaia na pasin kranki bilong ol man. Ol disaipel bilong em i bin tok resis long husat i nambawan namel long ol, tasol Jisas i no krosim ol, nogat; long pasin sori em i stretim ol. Long pasin daun em i mekim gut long ol, na wanpela taim em i wasim lek bilong ol. (Mak 9:30-37; 10:35-45; Luk 22:24-27; Jon 13:5) Na bihain em i karim bikpela pen na em i dai, bilong helpim ol wantaim olgeta narapela man! Tru tumas, Jisas em i nambawan man tru i winim olgeta narapela man i bin i stap long graun.
Bai Yu Bekim Wanem Tok?
◻ I gat wanem ol samting i kamapim klia olsem Jisas em i wanpela man tru i bin i stap long bipo?
◻ Olsem wanem yumi save, taim Jisas i stap long graun em i wanpela man tru? Tasol olsem wanem em i narapela kain long olgeta narapela man?
◻ Sapos yumi kisim save long ol samting Jisas i bin mekim, olsem wanem dispela i gutpela rot bilong kisim save long God?
◻ Taim yumi skelim pasin bilong Jisas, yumi kisim wanem save long sori bilong God?
[Piksa long pes 10]
Ol aposel bilong Jisas i tingting planti na tok: “Dispela man em i husat?”