Jisas Krais Em i Husat?
STORI bilong ol samting i kamap bipo i makim olsem winim 2,000 yia i go pinis, mama i bin karim wanpela man nem bilong em Jisas, long Betlehem, wanpela liklik taun long distrik Judia. Long dispela taim Herot i stap king long Jerusalem, na Sisar Ogastus i stap empera long Rom. (Matyu 2:1; Luk 2:1-7) I kam inap long yia 200 samting, ol saveman bilong Rom i no raitim wanpela stori long Jisas, long wanem, ol hetman bilong Rom i laik daunim lotu Kristen.
Tasol buk The Historians’ History of the World i tok: “Ol samting i bin kamap long rot bilong ol wok bilong [Jisas] i bikpela samting tru, winim wok bilong olgeta narapela man i bin i stap long graun. Taim Jisas i kamap long graun, i olsem nupela haptaim i kirap na ol bikpela lain bilong graun i luksave long dispela samting.”
Nius Time i tok ol buk ol man i bin raitim bilong stori long Jisas i planti moa, winim ol buk i stori long ol narapela man i bin i stap long graun. Planti bilong ol dispela buk i stori long Jisas em i husat. Ol man i bin mekim planti tok pait long dispela samting, winim tok pait bilong ol narapela samting.
Ol i Tingting Planti Long Jisas Em i Husat
Taim ensel i tokim Maria olsem em bai karim wanpela pikinini na em i mas kolim nem bilong em Jisas, Maria i tok: “Dispela samting bai i kamap olsem wanem? Mi no marit yet long wanpela man.” Gebriel, em ensel bilong God, em i tok: “Strong bilong God Antap Tru bai i karamapim yu. Olsem na dispela pikinini bihain bai yu karim, em bai i stap gutpela na stretpela man bilong God, na ol bai i kolim em Pikinini Bilong God.”—Luk 1:30-35.
Bihain Jisas i wokim ol mirakel i kirapim ol aposel long tingting planti. Taim wanpela traipela win i laik kapsaitim bot bilong ol long raunwara Galili, Jisas i krosim win na i mekim raunwara i stap isi. Em i tok: “Inap nau. Yu pinis! Yu dai nau!” Ol aposel i kirap nogut na ol i tok: “Dispela man em i husat tru?”—Mak 4:35-41; Matyu 8:23-27.
Ol man long taim bilong Jisas ol i wok long askim bilong save Jisas em i husat tru, olsem na Jisas i askim ol aposel long ol man i tok wanem. Ol aposel i tok: “Sampela i save tok, yu Jon Bilong Baptais. Na sampela i tok, yu Elaija. Na sampela i save tok, yu Jeremaia o wanpela profet”—olgeta dispela man i dai pinis. Na Jisas i askim ol: “ ‘Na yupela yet i tok mi husat?’ Saimon Pita i bekim tok olsem, ‘Yu dispela man God i bin makim bilong kisim bek ol manmeri bilong en. Yu Pikinini Bilong God i gat laip.’ ” Ol spirit nogut—ol ensel nogut—ol tu i bin tok long Jisas olsem: “Yu Pikinini Bilong God.”—Matyu 16:13-16; Luk 4:41.
Jisas i Tok Long Em i Husat Tru
Tru, Jisas i no save stori tumas long em yet olsem em i Pikinini Bilong God, tasol taim ol narapela man i tok olsem em i Pikinini Bilong God, em i save wanbel long dispela. (Mak 14:61, 62; Jon 3:18; 5:25, 26; 11:4) Tasol klostu olgeta taim em i save tok em i “Pikinini Bilong Man.” Taim em i tok long em yet olsem, em i kirapim ol man long tingim olsem mama i bin karim em olsem man bilong graun—tru tru em i wanpela man bilong graun. Taim em i mekim olsem, em i kamapim tu olsem em i dispela “pikinini bilong man” em Daniel i bin lukim long driman na i go sanap long ai bilong God i Gat Olgeta Strong—“dispela Man bilong bipo bipo yet.”—Matyu 20:28; Daniel 7:13, sta daunbilo.
Jisas yet i no tok olsem em i Pikinini Bilong God, tasol em i larim ol narapela long kisim dispela tingting. Ol aposel bilong em i bin kisim dispela tingting, na ol narapela tu olsem Jon Bilong Baptais na pren bilong Jisas, Marta. (Jon 1:29-34; 11:27) Ol dispela lain i bilip olsem Jisas em i dispela Mesaia em God i bin tok promis long salim em i kam. Ol i kisim save olsem pastaim Jisas i bin i stap long heven olsem wanpela strongpela spirit, na bihain long rot bilong wanpela mirakel, God i putim laip bilong Jisas long bel bilong Maria.—Aisaia 7:14; Matyu 1:20-23.
Wankain Olsem Namba Wan Man, Adam
Long planti samting, Jisas i wankain olsem namba wan man, Adam. Olsem: Tupela wantaim ol i man i gutpela olgeta na ol i no gat papa bilong graun. (Stat 2:7, 15) Olsem na Baibel i kolim Jisas olsem “narapela Adam i kamap bihain tru”—man i gutpela olgeta na laip bilong em inap tru long baim bek olgeta man. Laip bilong Jisas i wankain olsem laip bilong “namba wan man, Adam,” em God i bin wokim em i kamap gutpela olgeta.—1 Korin 15:45; 1 Timoti 2:5, 6.
Baibel i kolim namba wan Adam olsem “pikinini bilong God.” (Luk 3:38) Tasol, dispela Adam i lusim gutpela samting bilong i stap pikinini bilong God taim em i sakim tok bilong God long laik bilong em yet. Tasol long Jisas, oltaim em i stap gut long Papa bilong em long heven, na em i stap yet olsem Pikinini bilong God na God i orait long em. (Matyu 3:17; 17:5) Baibel i tok olgeta man i bilip long Jisas, olsem man bilong kisim bek ol, ol inap kisim laip oltaim.—Jon 3:16, 36; Aposel 5:31; Rom 5:12, 17-19.
Tasol sampela man i tok Jisas i Pikinini Bilong God, na tu, em yet i God. Ol i tok Jisas na Papa bilong em tupela wantaim i God i Gat Olgeta Strong. Olsem wanem? Tok bilong ol i stret? Jisas i wanpela hap bilong God? Jisas na ol man bilong raitim Baibel, ol i bin tok olsem? Tru tru, husat em i dispela wanpela God tru? Jisas i tok dispela God tru em i husat? Yumi ken skelim ol dispela samting.
[Blok/Piksa long pes 4]
Planti Man i Save Long Em
Fopela man—Matyu, Mak, Luk, na Jon—em ol i bin i stap long taim bilong Jisas, ol i raitim stori long laip bilong em. Tupela bilong ol dispela man i bin pas gut tru wantaim Jisas. Ol buk bilong ol, em ol i kisim nem bilong ol, ol man i kolim olsem ol Gutnius, na long nau ol man inap ritim ol hap bilong ol Gutnius long winim 2,000 tok ples. Ol i save bungim ol dispela buk wantaim ol arapela buk i kamapim buk Baibel. Namba bilong ol buk i kamapim tok bilong ol Gutnius—olsem wan wan buk o olsem hap bilong Baibel—i winim tru namba bilong olgeta narapela buk ol man i bin raitim. Olsem na yumi no kirap nogut olsem planti man i save long Jisas, winim olgeta narapela man i bin i stap long graun!
[Piksa long pes 3]
Ol aposel i tok: “Dispela man em i husat tru?”