Jisas—Ol Tok Ol Man i Mekim Long Em
“Jisas bilong Nasaret . . . em nambawan bikpela man i bin stap long graun.”—H. G. Wells, wanpela saveman bilong Inglan.
“Krais . . . i winim olgeta man i bin stap long graun.”—Philip Schaff bilong Swiselan, em tisa bilong lotu na wanpela saveman.
HUSAT inap tru long ol man i kolim em nambawan man tru i winim olgeta narapela man? Bai yumi skelim wanem ol samting bilong man na yumi ken tok em i nambawan man tru? Save bilong em long winim planti pait? O em i strongpela man? O bikpela save bilong em? O yu ting yumi mas skelim ol tok na pasin em i save mekim long ol man? O em i stap wanem kain piksa ol i ken bihainim?
Skelim tok ol saveman, ol saientis, ol man bilong raitim buk, ol bikman bilong politik—long bipo na long nau—ol i bin mekim long dispela man Nasaret, em Jisas Krais.
‘Bai i hatwok moa long painim as tru na man inap sakim dispela tok olsem nambawan man tru i gat strong long stiaim ol man long bipo i kam inap long nau—na i no insait long 2 tausen yia tasol—em Jisas bilong Nasaret.’—Reynolds Price bilong Amerika, em man bilong raitim buk na saveman bilong Baibel.
“Wanpela man i no gat asua long wanpela samting em i bin givim laip bilong em yet olsem ofa bilong helpim ol man, na ol birua bilong em tu, na em i kamap olsem pe bilong baim bek ol manmeri bilong graun. Em nambawan wok tru.”—Mohandas K. Gandhi, bikman bilong politik na bilong lotu long India.
“Taim mi pikinini yet, mi bin kisim skul long Baibel na long Talmut. Mi wanpela Juda, tasol mi save kirap nogut tru long dispela man Nasaret, em i narapela kain stret.”—Albert Einstein, wanpela saientis bilong Jemani.
“Long tingting bilong mi, Jisas Krais i winim olgeta narapela man long graun long tupela samting—em i Pikinini Bilong God na Pikinini Bilong Man. Olgeta tok na olgeta samting Em i bin mekim i samting tru bilong helpim yumi long nau, na yu no inap tok olsem long narapela man husat i stap laip nau o i dai pinis bipo.”—Sholem Asch bilong Polan, man bilong raitim buk, em nius Christian Herald i kamapim tok bilong em.
“Inap 35 yia mi no bilip long wanpela samting. Orait 5-pela yia i go pinis mi kirap bilip long Jisas Krais na wantu i stap na wokabaut bilong mi i senis olgeta.”—Bikman Leo Tolstoy bilong Rasia, man bilong raitim buk na saveman.
‘I stap na wok bilong [Jisas] i bin stiaim planti man tru, i winim i stap na wok bilong ol narapela man long graun, na long nau ol dispela samting i mekim olsem moa yet.’—Kenneth Scott Latourette bilong Amerika, saveman na man bilong raitim buk.
“Yu ting yumi ken tingting olsem i stap bilong [Jisas] na olgeta samting em i bin mekim em wanpela stori nating tasol? Pren, em i no olsem wanpela stori nating. Olgeta man i bilip olsem Sokratis i bin i stap, maski i no gat planti samting i makim olsem, tasol i gat planti samting moa yet i makim olsem Jisas Krais i bin stap tru tru.”—Jean-Jacques Rousseau, wanpela saveman bilong Frans.
Tru tumas, Jisas Krais em inap tru long i stap gutpela piksa yumi ken bihainim long i stap na wokabaut bilong yumi. Pol em wanpela man i bin skul gut na em i stap long taim bilong ol Kristen bilong pastaim, na Jisas i bin makim em long kamap disaipel bilong em na bilong autim tok bilong em long ol narapela lain, na Pol i tok strong long yumi mas “lukluk i go” long Jisas. (Hibru 12:2; Aposel 9:3) Jisas inap skulim yumi olsem wanem long pasin yumi mas bihainim long i stap bilong yumi? I stap na wok bilong Jisas inap helpim yu olsem wanem?