Nambawan Man Tru i Winim Olgeta Narapela Man
YU TING husat em i nambawan man tru i winim olgeta narapela man i bin stap long graun? Yu ting em Noa, husat i bin abrusim bagarap long Bikpela Tait na i kamap tumbuna papa bilong olgeta man i stap long nau? (Stat 7:1, 21, 22; 9:18, 19) O yu ting em Nebukatnesar, wanpela bikpela king bilong bipo na man i bin wokim wanpela bikpela taun em i kolim bikpela taun Babilon i nambawan tru? (Daniel 4:28-30) O ating em Bikpela King Aleksander, em Baibel tu i stori long ol bikpela wok bilong em? (Daniel 8:5-8, 21, 22) O olsem wanem long Julius Sisar, wanpela bikman bilong Rom i gat nem?
Inap olsem 45 yia bihain long Julius Sisar i dai, wanpela meri i karim pikinini long Betlehem, nem bilong pikinini em Jisas. Olsem wanem? Dispela pikinini i kamap nambawan man tru i winim olgeta narapela man? Inap wan handet yia i go pinis, buk The Historians’ History of the World i tok: “Ol samting i bin kamap long rot bilong ol wok bilong [Jisas] i bikpela samting tru, winim wok bilong olgeta narapela man i bin i stap long graun. Taim Jisas i kamap long graun, i olsem nupela haptaim i kirap na ol bikpela lain bilong graun i luksave long dispela samting.”
I kam inap long nau, ol man i gat laik long save long Jisas Krais. Inap sampela yia i go pinis, sampela bikpela magasin bilong Amerika, em Time, Newsweek, na U.S.News and World Report, i mekim bikpela stori long Jisas long wankain taim. Na i luk olsem planti man moa i gat laik long save long Jisas. Nius Toronto Star long 2004 i tok: “Nem bilong em i save stap yet long ol piksa wokabaut, musik, na klos ol man i werim. Em i bin kamap wanpela bilong ol man i gat nem long mekim ol bikpela samting tru.”
Tasol i no longtaim i go pinis na sampela i tok Jisas i no bin stap. Bruno Bauer (1809-82) em i wanpela tisa i gat nem husat i bin tok olsem. Wanpela sumatin bilong em, em Karl Marx. I no longtaim i go pinis na Robert E. Van Voorst, i tok long buk bilong em, Jesus Outside the New Testament, olsem: “Marx i kisim na bihainim tingting bilong Bauer long olsem wanem Jisas i bin kamap, olsem dispela em i wanpela stori nating tasol. Ol buk bilong gavman Soviet na bihain ol narapela tingting bilong gavman Komiunis i kamapim dispela tingting.”
Tasol long nau i no gat planti man i tok Jisas i no bin i stap. Tru tumas, planti man i wanbel long tok olsem Jisas i bin stap tru na em i wanpela bikpela man tru. Nius Wall Street Journal long Disemba 2002 i tok: “Saiens i No Inap Tok Jisas i No Bin i Stap.” Man bilong raitim dispela stori i tok: ‘Planti saveman i bilip olsem Jisas bilong Nasaret em i wanpela man i bin stap tru long bipo.’
Tasol Jisas i no wanpela man tasol olsem ol narapela man i bin stap long bipo. Nius Time i tok, yumi mas tokaut stret olsem “dispela strongpela man tru i winim olgeta man i bin stap long graun kirap long bipo yet na i kam inap long nau, em Jisas bilong Nasaret.” Nius i tok moa: “Yumi inap tru long tok olsem i no gat wanpela narapela man em laip bilong em i bin stiaim tru wokabaut bilong ol man olsem Jisas i bin mekim.”
Tasol ol dispela askim i stap yet: Jisas em i husat tru? Em i kam long we? Em i kam long graun bilong mekim wanem? Na bilong wanem em i bikpela samting long yumi save gut long em?