3 Kisim Stretpela Save Long Jisas

“God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”​​—Jon 3:​16.

BILONG WANEM I HATWOK? Sampela i laik bai yu bilip olsem Jisas i no wanpela man i bin i stap tru. Na sampela i tok em i bin i stap, tasol em i wanpela man nating tasol na em i bin i dai longtaim pinis.

YU KEN MEKIM WANEM? Bihainim pasin bilong disaipel Nataniel.a Pren bilong em Filip i tok em i lukim pinis Mesaia​​—‘Jisas bilong Nasaret, pikinini bilong Josep.’ Tasol Nataniel i no bilipim nating tok bilong Filip, nogat. Em i tok: “Ating wanpela gutpela samting em inap kamap long Nasaret, a?” Tasol maski em i gat tupela tingting, em i bihainim singaut bilong Filip long “kam lukim.” (Jon 1:​43-​51) I gutpela sapos yu tu i skelim ol samting i kamapim klia Jisas em i husat tru. Yu ken mekim wanem?

Skelim ol stori bilong ol samting bilong bipo i kamapim klia olsem Jisas i bin i stap tru. Josifas na Tasitus em tupela saveman i bin stap long taim bilong ol aposel na ol i no Kristen. Ol i stori long Jisas Krais olsem wanpela man i bin i stap tru. Paia i bin kukim biktaun Rom long 64 C.E. na Empera Niro bilong Rom i sutim asua bilong dispela samting i go long ol Kristen. Tasitus i stori olsem: “Niro i putim asua i go long wanpela lain ol i kolim Kristen, em ol Rom i no laikim, na em i mekim nogut tru long ol. Kristus [Krais], em i as bilong dispela nem Kristen, em i bin kisim strafe, olsem indai, long han bilong gavena Pontius Pailat long taim Taiberius i stap king.”

Sampela saveman bilong yia 1 C.E. i go 200 C.E., i bin raitim stori bilong Jisas na ol Kristen bilong pastaim, na buk Encyclopædia Britannica, 2002 Edisen, i tok: “Ol dispela stori i helpim yumi long save olsem bipo, maski ol man i birua long lain Kristen, ol i no gat tupela tingting olsem Jisas i bin i stap tru. Tasol long yia 1800 i go inap 1900 samting, sampela man i bin kirap na tok olsem Jisas i no bin i stap, tasol i no gat as na ol i tok olsem.” Long 2002, nius The Wall Street Journal i tok: ‘Planti saveman i bilip olsem Jisas bilong Nasaret em i wanpela man i bin i stap tru long bipo.’

Tingim evidens i kamapim klia olsem Jisas i bin kirap bek. Taim ol birua i holim Jisas, ol poroman bilong em, na ol disaipel, ol i lusim em na ranawe i go nabaut, na pren bilong em Pita i pret long ol man na i tok em i no save long em. (Matyu 26:​31, 55, 56, 69-​75) Taim ol i holim pinis Jisas, ol disaipel bilong em ol i ranawe i go nabaut. Tasol bihain liklik, ol i kirap mekim planti wok. Pita na Jon i no surik long ol man i bin wokim rot bilong kilim Jisas i dai. Laik bilong bel i kirapim ol disaipel bilong Jisas long autim ol tok Jisas i bin skulim ol long en, long olgeta hap Gavman Rom i bosim. Ol i orait long i dai, ol i no tingting long lusim ol tok ol i bilip long en bambai ol birua i no ken kilim ol i dai, nogat.

Wanem samting i kamapim dispela bikpela senis long tingting bilong ol? Aposel Pol i tok, Jisas i kirap bek na “bihain em i kamap long Pita, na bihain gen long ol 12-pela aposel.” Pol i tok moa: “Na bihain planti brata wantaim i lukim em, namba bilong ol i winim 500.” Planti bilong ol dispela aiwitnes i stap laip yet taim Pol i raitim dispela tok. (1 Korin 15:​3-7) Ating tokaut bilong wanpela o tupela aiwitnes tasol i no gat strong bilong en. (Luk 24:​1-​11) Tasol tokaut bilong planti aiwitnes, winim 500, i kamapim long ples klia olsem Jisas i bin kirap bek.

HELPIM YU OLSEM WANEM? Ol man i bilip long Jisas na bihainim tok bilong em, God bai lusim ol sin bilong ol na bel bilong ol i no gat tok. (Mak 2:​5-​12; 1 Timoti 1:​19; 1 Pita 3:​16-​22) Sapos ol i dai, Jisas i bin promis long kirapim bek ol “long las de.”​​—Jon 6:​40.

Bilong kisim sampela save moa, lukim sapta 4, “Jisas Krais Em i Husat?,” na sapta 5, “Pe Bilong Baim Bek Ol Man​​—Nambawan Gutpela Presen God i Givim,” long buk Tru Tru Baibel i Tok Wanem?b

[Ol Futnot]

[Piksa long pes 7]

Olsem Nataniel i bin mekim, skelim ol samting i kamapim klia Jisas em i husat tru