Sapta 14
Ol Disaipel Jisas i Singautim Pastaim
JISAS i stap 40 de long ples i no gat man na bihain em i go bek long Jon Bilong Baptais. Jon i lukim Jisas i wokabaut i kam, na em i tok: “Lukim. Em i Pikinini Sipsip Bilong God. Em i kam bilong tekewe sin bilong olgeta manmeri bilong graun. Em dispela man tasol bipo mi bin tok long en olsem, ‘Man i kam bihain long mi, em i namba wan bilong mi. Long wanem, em i stap bipo, taim mi no kamap yet.’ ” Jon i bikpela long kasen brata bilong em Jisas, tasol Jon i save, Jisas i stap bipo, taim Jon i no kamap yet. Bipo Jisas i stap long heven na em i wanpela spirit.
Tasol sampela wik bipo, taim Jisas i kam bilong kisim baptais, Jon i no save tru olsem Jisas em i Mesaia, olsem dispela man God i makim bilong kisim bek ol manmeri. Jon i tok: “Mi yet mi no bin save long em i husat tru. Tasol mi kam baptaisim ol man long wara bai ol manmeri bilong Israel i ken save long dispela man.”
Nau Jon i tokim ol manmeri long ol samting i bin kamap taim em i givim baptais long Jisas. Jon i tok: “Mi lukim pinis Holi Spirit i lusim heven na i kam daun . . . i stap antap long em. Mi yet mi no bin save long em. Tasol . . . bipo [God] i bin tokim mi olsem, ‘Taim yu lukim Holi Spirit i kam daun na i stap long wanpela man, orait em dispela man tasol i kam bilong baptaisim ol manmeri long Holi Spirit.’ Na mi yet mi lukim na mi autim tok pinis olsem, dispela em i Pikinini Bilong God.”
Long de bihain Jon i stap wantaim tupela disaipel bilong em na em i lukim Jisas i wokabaut i kam gen, na Jon i tok: “Lukim. Em i Pikinini Sipsip Bilong God.” Tupela disaipel i harim em i tok olsem, na tupela i go bihainim Jisas. Wanpela em Andru, na wanpela em i man bilong raitim tok bilong ol dispela samting, em tu nem bilong em Jon. Dispela Jon tu em i wanpela kasen brata bilong Jisas, em i pikinini bilong sista bilong Maria, em Salome.
Jisas i tanim na i lukim Andru tupela Jon i bihainim em, na em i tokim tupela: “Yutupela i painim wanem samting?”
Tupela i tokim em, ‘Tisa, yu stap long wanem haus?’
Jisas i tokim tupela: “Yutupela kam lukim.”
Em i olsem 4 klok long apinun na Andru tupela Jon i stap wantaim Jisas long dispela san. Bihain Andru i go painim brata bilong em, em Saimon Pita, na i tokim em: “Mipela i lukim pinis Mesaia.” Na em i bringim Pita i go long Jisas. Na ating Jon i go painim brata bilong em Jems na bringim em i go long Jisas; tasol long Gutnius Jon i raitim, Jon i no stori long dispela.
Long de bihain Jisas i go painim Filip bilong taun Betsaida na i tokim em: “Yu kam bihainim mi.”
Na Filip i go painim Nataniel, narapela nem bilong em Bartolomyu, na i tokim em: “Mipela i lukim pinis dispela man bipo Moses i bin raitim tok long em long buk bilong lo, na ol profet tu i bin raitim tok bilong em. Em Jisas bilong taun Nasaret, em pikinini bilong Josep.” Tasol Nataniel i gat tupela tingting. Em i tok: “Ating wanpela gutpela samting em inap kamap long Nasaret, a?”
Filip i tokim em, “Yu kam lukim.” Jisas i lukim Nataniel i kam na em i tok: “Lukim. Dispela man i kam, em i man tru bilong Israel. I no gat wanpela giaman tok o giaman pasin i stap long em.”
Nataniel i tok: “Olsem wanem na yu save long mi?”
Na Jisas i tok: “Taim Filip i no singautim yu yet, mi lukim yu i stap long as bilong diwai fik.”
Nataniel i kirap nogut. Em i tok: “Tisa, yu Pikinini Bilong God. Yu King bilong Israel.”
Jisas i tok: “Mi tokim yu olsem mi lukim yu i stap long as bilong diwai fik, na long dispela as tasol yu bilip long mi. Bihain bai yu lukim ol bikpela samting i winim tru dispela.” Na em i tok promis olsem: “Bihain bai yupela i lukim heven i op, na bai yupela i lukim ol ensel bilong God i go antap na i kam daun long Pikinini Bilong Man.”
Liklik taim bihain, Jisas wantaim ol nupela disaipel bilong em ol i lusim hap bilong Jordan na ol i wokabaut i go long Galili. Jon 1:29-51.
▪ Husat ol i kamap disaipel pastaim?
▪ Husat i bringim Pita i go long Jisas? Na ating husat i bringim Jems i go?
▪ Wanem samting i kirapim Nataniel long bilip olsem Jisas em i Pikinini bilong God?