I Stap na Wok Bilong Jisas

Ol Namba Wan Disaipel Bilong Jisas

JISAS i stap 40 de long ples i no gat man na bihain em i go bek long Jon, em i bin givim baptais long Jisas. Jon i lukim Jisas i wokabaut i kam, na em i tok: “Lukim, em i Pikinini Sipsip Bilong God. Em i tekewe sin bilong olgeta manmeri long graun. Em dispela man bipo mi tok long en, ‘Wanpela man i kam bihain long mi, em i namba wan bilong mi. Long wanem em i stap bipo, taim mi no kamap yet.”’ Jon i bikpela long kasen-brata bilong em Jisas, tasol Jon i save, Jisas i stap bipo, taim em i no kamap yet. Bipo Jisas i stap long heven na em i wanpela spirit.

Long de bihain Jon i sanap gen na tupela disaipel bilong em i sanap wantaim em. Na em i lukim Jisas i wokabaut i kam, na em i tok: “Lukim, em i Pikinini Sipsip Bilong God.” Tupela disaipel i harim em i tok olsem, na tupela i go bihainim Jisas. Andru, em i wanpela bilong dispela tupela man, na narapela em i man bilong raitim tok bilong ol dispela samting, nem bilong em tu Jon. Dispela Jon tu em i wanpela kasen-brata bilong Jisas, long wanem em i pikinini man bilong brata bilong Maria, em Salomi.

Jisas i tanim na i lukim Andru tupela Jon i bihainim em, na Jisas i tokim tupela: “Yutupela i laik painim wanem samting?”

Tupela i tokim em, ‘Tisa, yu stap long wanem haus?’

Jisas i tokim tupela: “Yutupela i kam lukim.”

Em i olsem 4 klok long apinun na Andru tupela Jon i stap wantaim Jisas long dispela san. Bihain Andru i go painim brata bilong em, Saimon Pita, na i tokim em: “Mipela i lukim pinis Mesaia.” Na em i bringim Pita i go long Jisas. Na ating long dispela taim Jon i go painim brata bilong em Jems na bringim em i go long Jisas; tasol long Gutnius Jon I Raitim, Jon i no stori long dispela samting em yet i bin mekim.

Long de bihain Jisas i painim Filip na i tokim em: “Yu bihainim mi.” Na Filip i go painim Nataniel, narapela nem bilong em Batolomyu, na i tokim em: “Dispela man bipo Moses i raitim tok long em long lo, na ol profet tu i raitim tok long em, em mipela i painim pinis. Em Jisas bilong Nasaret, pikinini bilong Josep.” Tasol Nataniel i gat tupela tingting. Em i tok: “Ating wanpela gutpela samting em inap kamap long Nasaret, a?”

Filip i tokim em, “Yu kam lukim.” Jisas i lukim Nataniel i kam long em na em i tokim Nataniel: “Bipo Filip i no singautim yu na yu stap yet long as bilong diwai fik, long dispela taim mi lukim yu.”

Nataniel i kirap nogut. Em i tok: “Tisa, yu Pikinini Bilong God. Yu King bilong Isrel.”

Liklik taim bihain, Jisas wantaim ol nupela disaipel bilong em ol i lusim hap bilong Jodan na ol i wokabaut i go long Galili. Jon 1:29-51.

◆ Husat ol i kamap ol namba wan disaipel bilong Jisas?

◆ Pita, na ating Jems, olsem wanem tupela i go long Jisas?

◆ Wanem samting i kirapim Nataniel long bilip olsem Jisas em i Pikinini bilong God?