Jisas i Makim Twelpela Aposel

Inap 1-pela yia na hap i go pinis, Jon Bilong Baptais i tokaut olsem Jisas em i Pikinini Sipsip Bilong God. Taim Jisas i kirap mekim wok autim tok bilong em, sampela man i kamap disaipel bilong em. Ol dispela man em Andru, Saimon Pita, Jon, na ating Jems (brata bilong Jon), Filip, na Bartolomyu (narapela nem bilong em Nataniel). Bihain planti arapela i kirap long bihainim Krais.—Jon 1:45-47.

Nau Jisas i redi long makim ol aposel bilong em. Ol dispela man bai kamap gutpela poroman bilong em na em bai trenim ol long mekim ol gutpela wok. Tasol paslain long Jisas i makim ol, em i go antap long maunten. Ating dispela maunten i stap klostu long raunwara Galili na i no longwe tumas long Kaperneam. Long nait olgeta, Jisas i beten long God. Ating em i askim God long givim gutpela savetingting na blesim ol wok em bai mekim. Long neks de, em i singautim ol disaipel i kam na em i makim 12-pela disaipel long kamap aposel.

Jisas i makim 6-pela aposel em nem bilong ol i stap antap. Na tu, em i singautim Matyu, em man bilong kisim takis. Na narapela 5-pela aposel em Jisas i makim em, Judas (narapela nem bilong en Tadius na em i “pikinini bilong Jems”), Saimon Kananian, Tomas, Jems em pikinini man bilong Alfius, na Judas Iskariot.—Matyu 10:2-4; Luk 6:16.

Ol 12-pela aposel i raun wantaim Jisas, olsem na em i save gut long ol. Sampela bilong ol i wanblut bilong em. Tupela brata em Jems na Jon, ol i kasen bilong Jisas. Sampela i ting Alfius em i brata bilong Josep, em waspapa bilong Jisas. Sapos olsem, orait pikinini man bilong Alfius, em aposel Jems, em bai kasen bilong Jisas.

I no hatwok long Jisas i tingim nem bilong ol aposel bilong em. Tasol yu inap tingim nem bilong ol? Bilong helpim yu, yu ken tingim dispela, i gat tupela Saimon, tupela Jems, na tupela Judas. Saimon (Pita) i gat wanpela brata nem bilong en Andru, na Jems (pikinini bilong Sebedi) em i brata bilong Jon. Dispela em wanpela rot bilong helpim yu long tingim gut nem bilong 8-pela aposel. Na i gat narapela 4-pela aposel, Matyu em man bilong kisim takis, Tomas em bihain em i kisim tupela tingting, Nataniel em Jisas i bin singautim em aninit long diwai, na Filip em pren bilong Nataniel.

Elevenpela aposel ol i bilong Galili, em asples bilong Jisas. Nataniel i bilong Kana. Filip, Pita, na Andru ol i bilong Betsaida. Tasol bihain Pita na Andru i go sindaun long Kaperneam em ples we Matyu i stap long en. Na Jems na Jon i stap long Kaperneam o klostu long Kaperneam, na ol i mekim wok bisnis bilong kisim pis klostu long dispela hap. Judas Iskariot em man husat bai putim Jisas long han bilong ol birua, em tasol i bilong Judia.