I Stap na Wok Bilong Jisas

Em i Makim Ol Aposel Bilong Em

JON Bilong Baptais i tokaut olsem Jisas em i Pikinini Sipsip bilong God na Jisas i kirap mekim wok bilong em na nau wanpela yia hap i lus pinis. Taim Jisas i kirap mekim wok bilong em, Andru na Saimon Pita, na Jon na ating Jems tu (em brata bilong Jon), na Filip wantaim Nataniel (narapela nem bilong em Batolomyu) ol i stap disaipel bilong em. Bihain planti moa ol i kirap bihainim Jisas.

Nau Jisas i redi long makim ol aposel bilong em. Ol bai i stap wantaim em, olsem poroman tru bilong em, na bai em i lainim ol gut. Tasol pastaim Jisas i go long wanpela maunten na long nait olgeta em i beten i stap. Ating em i beten askim God long givim gutpela tingting long em na blesim ol samting em i laik mekim. Tulait pinis, orait em i singautim ol disaipel i kam long em na em i makim 12-pela. Ol i kamap aposel bilong em, tasol Baibel i kolim ol olsem disaipel, long wanem ol i lain yet na dispela em i insait bilong tok “disaipel.”

Sikspela em ol dispela disaipel bilong pastaim, em yumi kolim pinis nem bilong ol. Na Jisas i makim Matyu tu, em Jisas i bin singautim em taim em i sindaun long haus takis. Na narapela 5-pela em Judas (narapela nem bilong em Tadias), na Judas Iskariot, na Saimon Selot, na Tomas, na Jems, em pikinini bilong Alfias. Sampela taim Baibel i kolim dispela Jems olsem namba tu Jems, long wanem narapela aposel tu i gat dispela nem Jems.

Nau dispela 12-pela disaipel i bin i stap longtaim liklik wantaim Jisas na em i save gut long ol. Sampela ol i wanblut bilong em. Tupela brata hia, em Jems na Jon, tupela i kasen-brata bilong Jisas. Na ating Alfias em i brata bilong Josep, em waspapa bilong Jisas.

I no hatwok long Jisas i tingim nem bilong ol aposel bilong em. Tasol yu inap tingim? Bilong helpim yu long tingim, yu ken mekim olsem: Yu mas tingim tupela i gat nem Saimon, na tupela i gat nem Jems, na tupela i gat nem Judas, na Saimon i gat brata bilong em, nem bilong em Andru, na Jems i gat brata, nem bilong em Jon. Em nau, yu tingim pinis nem bilong 8-pela. Na narapela 4-pela, em man bilong kisim takis (Matyu), na man i no bilip tumas olsem Jisas i kirap bek (Tomas), na man i stap long as bilong diwai na Jisas i singautim em (Nataniel), na pren bilong em Filip.

Elevenpela aposel ol i bilong hap bilong Galili, em as ples bilong Jisas. Nataniel em i bilong Kena. Filip na Pita na Andru, ol i bin i stap long Betsaida pastaim. Tasol bihain Pita na Andru i go sindaun long Kapaneam, na ating Matyu tu i stap long dispela hap. Jems tupela Jon i man bilong kisim pis na ating tupela tu i stap long Kapaneam o klostu long dispela ples. Judas Iskariot, em man bilong kamapim Jisas long ol birua, em wanpela tasol em i bilong Judia. Mak 3:​13-19; Luk 6:​12-16.

◆ Kolim nem bilong ol aposel ating ol i wanblut bilong Jisas.

◆ Kolim nem bilong aposel bilong Jisas. Yu ken mekim wanem na bai yu inap tingim nem bilong ol?

◆ Ol aposel i bilong wanem wanem hap?

[Piksa long pes 9]

Taim Jisas i laik makim 12-pela aposel bilong em, pastaim em i beten long Jehova long nait olgeta