Olsem Wanem? Narapela Tok Bilong Baibel i Pait Wantaim Narapela Tok Bilong En?

BAIBEL i tok, “God i no inap giaman.” (Hibru 6:18) Olsem na yu ting i gat sampela tok long Baibel i kranki na narapela tok i pait wantaim narapela tok? Sapos i olsem, orait yumi no inap tok, Baibel em i tok bilong God, a? Tasol ating yu laik save, bilong wanem i olsem sampela tok i pait wantaim narapela tok?

Orait nau yumi ken skelim dispela samting. Bipo bipo i no gat ol masin bilong wokim ol buk, na inap planti handet yia ol i mas raitim ol tok bilong Baibel long han tasol, na ol i mas tanim ol tok bilong en i go long ol narapela bikpela tok ples. Dispela em i hatwok, olsem na sampela liklik hap rait bilong wanpela man i olsem narapela kain liklik long hap rait bilong narapela man. Tasol em ol liklik hap tok tasol, na yumi no ken ting God i no kamapim ol tok bilong Baibel na em i no As bilong en. Sapos yumi skelim gut ol dispela tok, bai yumi save, narapela tok i no pait tru wantaim narapela tok. Long skin tasol i olsem, tasol nogat. Planti man bilong tok olsem, em ol i no bin skelim gut ol tok bilong Baibel; ol i bihainim nating tok bilong ol man i no bilip long Baibel na ol i no laik i stap aninit long ol lo bilong Baibel. Olsem Baibel i tok: “Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin na yu gat sem.”−Provep 18:⁠13.

Sampela man i gat tok long ol man bilong raitim Baibel, long wanem sampela taim i olsem ol i no wanbel long sampela tok ol i raitim, olsem taim ol i raitim ol yia na taim bilong sampela samting i bin kamap, o sampela namba samting, o taim ol i raitim hap tok wanpela man i bin mekim bipo, na ol kain samting olsem. Tasol tingim dispela samting: Sapos tupela o tripela man i bin lukim sampela samting i kamap na yu tokim ol long raitim stori bilong ol dispela samting ol i bin lukim, orait, taim ol i raitim pinis, yu ting olgeta wan wan hap rait bilong narapela bai i wankain stret olsem olgeta wan wan rait bilong narapela? Nogat, a? Sapos olgeta wan wan hap tok i wankain stret, orait bai yu ting ol i bin pasim tok wantaim long raitim wankain tok stret. Tasol taim ol man i raitim Baibel, God i larim ol i raitim long pasin bilong ol yet, tasol olgeta tok na tingting bilong God ol i mas raitim stret olsem em i bin putim long tingting bilong ol.

Taim man bilong raitim Baibel i laik kamapim tok bilong wanpela man bilong bipo em i bin raitim tok long Baibel, ating em i senisim sampela liklik hap tok bilong helpim em long kamapim klia as bilong tok em i laik mekim; tasol tok bilong dispela man i stap yet, na stori i stap yet. Na i wankain tu long taim ol i laik raitim stori bilong ol samting i bin kamap. Ating wanpela man i laik kolim ol samting i bin kamap pastaim na kolim narapela samting i kam bihain long en, olsem. Orait, narapela man i raitim dispela ol stori, tasol em i no bihainim taim bilong ol dispela samting i bin kamap; nogat. Sapos em i ting i gutpela long em i mas kamapim wanpela stori pastaim bilong strongim wanpela tok samting, orait em bai raitim dispela stori pastaim, maski wanem taim dispela samting i bin kamap. Na ating em i laik sotim stori na kamapim ol bikpela tok Bilong dispela stori na lusim sampela liklik hap tok bilong en. Olsem na taim Matyu i raitim tok long Baibel em i stori long Jisas i bin stretim bek ai bilong tupela aipas, tasol long stori bilong Mak na Luk ol i stori long wanpela aipas tasol. (Matyu 20:​29-34; Mak 10:46; Luk 18:35) Tasol stori bilong Matyu i no pait wantaim stori bilong Mak na Luk. Matyu em i laik kolim stret ol namba, tasol Mak na Luk i tingim dispela aipas Jisas i bin givim tok long em.

Na bipo i gat kain kain pasin bilong makim taim. Lain Juda i gat tupela kalenda−wanpela em kalenda bilong lotu, na wanpela em kalenda bilong wok gaden. Tasol tupela kalenda i no kirap long wankain taim bilong yia. Nogat. Olsem na taim ol man i raitim stori bilong samting i bin kamap long wanpela taim, ating ol i tingim narapela narapela kalenda. Ol man bilong ol dispela hap ol i no save kolim liklik hap bilong wanpela namba, olsem kwota o hap. Wanpela hap bilong yia ol i kolim olsem wanpela yia. Yumi ken lukim dispela pasin long Jenesis sapta 5.

Bilong Stretim Dispela Samting

Tasol ating i gat sampela tok bilong Baibel i narapela kain tru long sampela ol narapela tok, a? Orait nau yumi ken skelim sampela tok em sampela man i ting i no stret wantaim narapela tok bilong Baibel.

Long Jon 3:22 Baibel i tok Jisas “i givim baptais long ol manmeri.” Tasol klostu long dispela tok, long Jon 4:​2, Baibel i tok, “Jisas yet em i no givim baptais.” Tasol sapos yumi kaunim ol narapela tok klostu, yumi ken save, ol disaipel yet i givim baptais long ol manmeri long nem bilong Jisas, na em yet i bosim dispela wok ol i mekim. Dispela i wankain olsem tok piksa bilong bisnisman na kuskus bilong em; taim em i tokim kuskus long raitim wanpela pas, orait tupela wantaim inap tok ol i bin raitim dispela pas.

Na i gat wanpela tok long Jenesis 2:2 i tok, “God i pinisim olgeta wok bilong em . . . na em i malolo.” Tasol i gat wanpela tok bilong Jisas long Jon 5:​17, i tok, God “em i wok inap long nau.” Orait, taim yumi skelim dispela tupela tok, yumi save, tok bilong Jenesis i stori long taim God i bin wokim olgeta samting long antap na long graun, tasol Jisas i stori long ol wok God i mekim bilong soim rot na stiaim tingting bilong man, na long lukautim ol manmeri bilong graun.

Na sampela man i ting tok bilong Eksodas 34:7 i pait wantaim tok bilong Esikiel 18:20. Orait yumi ken skelim dispela tupela tok. Namba wan tok em i tok, “Mi [God] mas mekim save long ol man i gat asua. Na bai mi mekim save long ol pikinini bilong ol na ol tumbuna pikinini i kamap bihain.” Tasol namba tu skripsa i tok, sapos man i mekim wanpela rong, God i no ken bekim nogut long pikinini bilong em. I olsem tupela tok i pait, a? Tasol yumi mas kaunim na skelim ol tok i stap klostu long dispela tupela tok, Olsem na bai yumi save, taim God i tok, sapos man i gat asua em bai mekim save long ol pikinini na tumbuna pikinini bilong em, God i toktok long ol samting bai painim lain Isrel olgeta sapos ol i sakim tok bilong em na mekim rong, na ol narapela lain bai kam na kisim ol i go kalabus. Tasol taim God i tok, sapos man i mekim rong God i no ken bekim nogut long pikinini bilong dispela man, God i tok long wanpela man tasol−sapos dispela man i gat asua, em yet i mas kisim nogut long dispela, na God i no ken bekim nogut long pikinini bilong em.

Na sapos yumi kaunim stori bilong taim mama i karim Jisas, long Matyu 1:​18-25 na Luk 1:​26-38, bai yumi lukim sampela hap tok i narapela kain liklik. Tasol tupela stori i pait o olsem wanem?

Sapos tupela man i raitim stori bilong wanpela man, na yu kaunim stori tupela i bin raitim, bai yu lukim ol tok bilong dispela stori i no wankain stret. Long wanem, narapela i tingim sampela pasin na tok na wok bilong dispela man, na narapela i tingim ol narapela pasin na tok na wok bilong em. Na narapela i stori long ol samting em i ting i bikpela samting long dispela stori; tasol narapela i tingim ol narapela samting i bikpela samting na em i kamapim dispela long stori bilong em. Na tupela i tingim ol man bai kaunim dispela stori, olsem na tupela i laik kamapim gut na bai ol man i kisim gut stori; tasol tupela i no gat wankain tingting long mekim dispela samting. Olsem na sampela liklik hap tok long stori bilong tupela i no wankain olgeta. Na ol man bilong raitim ol dispela stori ol i mas tingim wanem lain bai kaunim ol dispela tok−sapos ol Juda bai kaunim, orait ol i save pinis long sampela samting bilong ol dispela stori, olsem na i no gat wok long raitim ol dispela hap bilong en. Tasol sapos ol man bilong ol narapela lain i mas kaunim, orait man bilong raitim stori long Baibel em i mas tingim ol na raitim klia olgeta samting bambai ol i ken kisim gut.

Olsem na sampela man i kaunim ol dispela tok long Baibel na ol i ting narapela tok i pait wantaim narapela tok. Tasol yumi mas tingim husat i bin raitim dispela tupela tok, na wanem tingting bilong tupela man hia, na yumi mas skelim ol narapela tok i stap klostu long dispela, na nau yumi ken save, i no gat sampela tok long Baibel i pait wantaim narapela tok. Tasol planti man i les long kaunim na skelim ol dispela tok na kisim save long en. Ol i ting em hatwok tumas, olsem na ol i tok, ‘Narapela tok bilong Baibel i pait wantaim narapela tok bilong en.’

Yumi Ken Bilip long Baibel

Spirit holi bilong God i givim rot long ol man bilong raitim Baibel na ol i ken raitim long pasin bilong ol wan wan yet. (Aposel 3:21) Olsem na ol inap stori gut long ol samting ol yet i bin lukim. Sapos sampela liklik samting i no wankain long stori bilong ol, em yumi ken save, ol i no bin pasim tok wantaim long raitim wankain tok stret na putim sampela tok giaman i go insait long stori bilong ol. Nogat. (2 Pita 1:​16-21) Tru, ol wan wan i gat pasin bilong ol yet long kamapim ol tok, tasol stori bilong olgeta i bihainim wanpela rot tasol na i gat wanpela wok tasol, em bilong tokaut klia long ol man long ol samting God Jehova i laik mekim bilong helpim ol man long i stap amamas, na ol samting ol man i mas mekim na bai God i ken orait long ol.−Provep 2:​3-6, 9.

Ol tok bilong Baibel i save kirapim tingting bilong yumi long tingim na skelim gut ol samting. Narapela tok bilong Baibel i helpim narapela tok bilong en. I no gat wanpela hap tok i pait wantaim narapela hap tok. Nogat. Olgeta 66 hap bilong Baibel (1,189 sapta o 31,173 ves) i stret olgeta na yumi ken bilip tru long en. Tru tumas, yu ken bilip olgeta long tok bilong Baibel!

[Blok long pes 6]

Sapos yu painim wanpela hap tok bilong Baibel yu ting em i pait wantaim narapela hap, ating as bilong dispela i olsem:

◆ Yu no save long sampela samting bilong bipo o long sampela pasin bilong ol man bilong bipo.

◆ Yu no bin kaunim gut ol tok paslain o bihain long dispela hap tok.

◆ Yu no save long tingting bilong dispela man i bin raitim dispela tok.

◆ Yu tingim sampela tok giaman bilong misin na yu skelim dispela wantaim tok i tru bilong Baibel.

◆ Yu kaunim wanpela Baibel ol i bin tanim kranki tok bilong en.

[Ol Piksa long pes 7]

Matyu i tok Jisas i oraitim tupela aipas, tasol Mak na Luk i stori long wanpela aipas tasol. Olsem wanem? Tok bilong ol i pait?