Husat i Bin Raitim Baibel?

SAMPELA man i no bilip long Baibel ol i tok, ‘Ol tok bilong Baibel i no stret wantaim; narapela tok i pait wantaim narapela tok.’ Na ol i tok, ‘Ol tok na tingting bilong ol man tasol i stap long Baibel. Olsem na yumi no ken bilip long Baibel na ting em inap soim rot long yumi.’

Orait, olsem wanem long yu? Yu gat wankain tingting olsem bilong ol dispela man na yu ting Baibel i kamapim tingting bilong ol man tasol? Sampela pris na pasto bilong ol misin ol i ting olsem. Wanpela pasto bilong Swiselan bipo, nem bilong em Karl Barth, em i raitim wanpela buk (Kirchliche Dogmatik, olsem Tok Bilong Lotu), i tok, ‘Ol profet na aposel ol inap popaia long tok bilong ol na long ol tok ol i bin raitim.’ Em dispela pasto i tok olsem. Tru, taim sampela man i mas raitim wankain stori long Baibel ol i raitim long pasin bilong ol yet, olsem na wan wan liklik hap tok bilong stori i no wankain. Na sampela tok bilong Baibel, sapos yumi no skelim gut na yumi no kisim gut as bilong tok, bai yumi ting em i pait wantaim narapela hap tok bilong Baibel. Tasol olsem wanem? Ol dispela tok i pait tru o nogat? Tru ol tok bilong Baibel i kamap long tingting bilong ol man? Husat i bin raitim ol tok bilong Baibel?

I no hatwok long bekim ol dispela askim. Baibel i tok, ol profet na ol narapela man bilong raitim Baibel “ol i autim tok God i givim long ol.” Tasol olsem wanem ol i save long ol tok ol i mas autim o raitim? Aposel Pita, em man bilong raitim dispela hap tok bilong Baibel yumi kolim pinis, em i tok moa: “Holi Spirit yet i kirapim ol.”−2 Pita 1:⁠21.

Tru tumas, planti taim Baibel yet i tokaut olsem tok bilong en em “tok bilong God.” Sam sapta 119 long Baibel i kamapim kain tok olsem inap 176 taim insait long 176 ves bilong en! Yumi kirap nogut long dispela, long wanem, pasin bilong ol man bilong raitim ol buk, em ol i laik kamapim nem bilong ol yet na ol i tokaut olsem ol yet i bin tingim na raitim tok bilong dispela buk. Tasol ol man i bin raitim Baibel ol i no gat dispela pasin bilong litimapim nem bilong ol yet. Ol i tokaut olsem God yet i As bilong ol tok bilong Baibel; em buk bilong em yet−i no bilong ol.−1 Tesalonaika 2:13; 2 Samuel 23:⁠2.

“Holi Spirit Yet i Kirapim O1” Olsem Wanem?

Olsem wanem “Holi Spirit yet i kirapim” ol dispela man? Aposel Pol i tokaut klia long dispela samting taim em i salim pas long wanpela Kristen nem bilong em Timoti. Pol i tok, “Spirit bilong God yet em i bin kamapim olgeta tok bilong Baibel.” Spirit holi i olsem strong bilong God, na long rot bilong dispela spirit holi em i givim tingting long ol man bilong raitim Baibel. I olsem God i “winim win” (tok Grik, the·oʹpneu·stos) i go long ol na dispela i kirapim tingting bilong ol na ol i raitim ol tok God i putim long tingting bilong ol. Olsem na Jehova i As bilong ol tok bilong Baibel na em i Man bilong kamapim Baibel. Tingting bilong em i stiaim ol man bilong raitim Baibel, kain olsem wanpela bisnisman i save tokim kuskus long raitim ol pas bilong em.−2 Timoti 3:⁠16.

Na yumi ken mekim wanpela tok piksa moa long dispela spirit holi i olsem win. Win i save kirapim bot i gat sel na i subim bot na bot i ran long rot em i mas i go long en. (Lukim Aposel 27:​15, 17.) Orait, i olsem tasol long ol man bilong raitim Baibel; spirit holi o strong bilong God i kirapim ol na i stiaim ol, na nau tingting bilong ol i kirap na ol i autim tok o raitim tok bilong God long Baibel.

God i Givim Wok long Ol Man Na Ol i Raitim Baibel

Ol man bilong raitim Baibel ol i no man bilong raitim stori bilong ol yet na ol samting ol yet i bin mekim. Nogat. Ol i laik litimapim nem bilong God na ol i daunim nem bilong ol yet. Olsem na yumi no save tumas long ol dispela man. Tasol yumi save liklik long sampela samting bilong ol, olsem sampela i holim bikpela namba long wok bilong gavman, na sampela i jas, na profet, na king, na man bilong lukautim sipsip, na man bilong wok gaden, na man bilong kisim pis; i gat olsem 40 samting. Ol i gat pasin bilong ol yet long raitim ol stori bilong Baibel, olsem na yumi no save les long kaunim. Ol dispela tok i save kirapim yumi na bel bilong yumi i save pilim tru.

Planti man bilong raitim Baibel, narapela i no save long narapela. Na sampela i bin i stap planti handet yia bihain long narapela; ol i kain kain man na ol i gat narapela narapela kain pasin na sindaun, na sampela i bin skul gut na sampela nogat. Tasol maski ol i narapela narapela kain, na sampela i lapun na sampela i yangpela, tasol tok ol i raitim i stret wantaim. Ol i wok inap 1,600 yia bilong raitim Baibel olgeta. Sapos yu skelim gut ol tok bilong Baibel, bai yu save, olgeta tok i stret wantaim, na i no gat wanpela tok i pait wantaim narapela tok. Nogat. Ol dispela samting i kamapim long ples klia olsem i gat wanpela Man tasol i As bilong Baibel, tasol em i bin mekim wok long planti man na ol i raitim ol dispela tok long Baibel.

Em nau, dispela Buk i narapela kain tru, a? Olsem na dispela i mas kirapim yumi long “holimpas [ol tok bilong Baibel] long tingting na bihainim.” Na yumi mas kisim wankain tingting olsem bilong Pita, em i tok: “Olsem na mipela i save bilip strong moa long tok bilong ol profet, na sapos yupela tu i holim strong tok bilong ol, em i gutpela. Tok bilong ol profet em i olsem lam i lait i stap long ples tudak.”−Hibru 2:1; 2 Pita 1:⁠19.

Tasol olsem wanem long tok bilong sampela man ol i tok, narapela tok i pait wantaim narapela tok? Tru tok bilong Baibel i mekim olsem, o nogat? Bai yu bekim ol dispela askim olsem wanem?

[Piksa long pes 4]

Win i save kirapim bot i gat sel na i subim bot i go, na bot i ran long rot em i mas i go long en; olsem tasol ‘spirit holi bilong God i kirapim ol man’ bilong raitim Baibel na i stiaim tingting bilong ol