Baibel i Tok Wanem?
Husat i Kamapim Ol Tok Bilong Baibel?
BAIBEL i tokaut stret long husat i bin raitim ol tok bilong en. Ol narapela narapela hap bilong Baibel i gat kain kirap bilong tok olsem, ‘dispela stori Nehemia i raitim,’ ‘dispela buk i gat tok bilong Aisaia long ol samting olsem driman,’ na “dispela tok Bikpela i givim long Joel.” (Nehemia 1:1; Aisaia 1:1; Joel 1:1) Sampela stori bilong bipo i makim olsem Gat, Natan, na Samuel, ol i bin raitim ol dispela stori. (1 Stori 29:29) Ol tok i go pas long sampela song i makim ol man i bin raitim ol dispela song.—Song 79, 88, 89, 90, 103, na 127.
Ol man i bin raitim Baibel, olsem na sampela man i tok Baibel em buk i kamapim savetingting bilong ol man, wankain olsem ol narapela buk. Tasol olsem wanem? Dispela tingting i gat as tru bilong en?
Foti Man i Raitim, Wanpela Man i Kamapim
Ol man bilong raitim Baibel ol i tokaut olsem ol i raitim Baibel long nem bilong Jehova, em wanpela i God tru, na em yet o wanpela ensel bilong em i stiaim ol long raitim. (Sekaraia 1:7, 9) Ol profet husat i bin raitim Ol Skripsa Hibru ol i mekim dispela tok, “Bikpela i tok olsem,” winim 300 taim. (Amos 1:3; Maika 2:3; Nahum 1:12) Long kirap bilong planti tok ol i raitim i gat kain tok olsem “dispela tok Bikpela i givim long Hosea.” (Hosea 1:1; Jona 1:1) Aposel Pita i tok long ol profet bilong God olsem: “Holi Spirit yet i kirapim ol man na ol i autim tok God i givim long ol.”—2 Pita 1:21.
Olsem na Baibel em i wanpela buk i gat planti buk i stap insait long en em planti man i bin raitim, tasol olgeta tok bilong en i stret wantaim, na ol dispela man i tokaut olsem God i as bilong ol tok ol i raitim. O yumi ken tok, God i mekim wok long ol man olsem kuskus, bilong raitim ol tingting bilong em. Em i mekim olsem wanem?
“Spirit Bilong God Yet i Bin Kamapim”
Aposel Pol i tok: “Spirit bilong God yet i bin kamapim olgeta tok i stap long buk bilong God.” (2 Timoti 3:16) Tok Grik ol i tanim olsem “spirit bilong God yet i bin kamapim” i makim olsem “God i winim win.” Em i olsem God i mekim wok long holi spirit bilong em long stiaim tingting bilong ol man i raitim Baibel, na givim tok bilong em long ol. Tasol Tenpela Lo, Jehova yet i bin raitim ol tok long tupela hap ston. (Kisim Bek 31:18) Sampela taim God i tokim stret ol man long ol tok ol i mas raitim. Kisim Bek 34:27 i tok: “Bikpela i tokim Moses olsem, ‘Yu mas raitim ol dispela tok long wanpela buk . . . ’ ”
Sampela taim God i givim samting olsem driman long ol man long ol samting em i laik ol i mas raitim. Olsem Esekiel i tok: “Mi lukim God long ol samting olsem driman.” (Esekiel 1:1) Na tu, ‘Daniel i lukim samting olsem driman long nait. Na i raitim stori bilong dispela driman long wanpela buk.’ (Daniel 7:1) God i kamapim tok bilong laspela buk bilong Baibel, em Kamapim Tok Hait, long aposel Jon long wankain rot. Jon i tok: “Long de bilong Bikpela, Holi Spirit i kamap strong long mi, na baksait long mi mi harim maus bilong wanpela man i singaut strong, olsem krai bilong biugel. Dispela man i tok olsem, ‘Olgeta samting yu lukim, em yu mas raitim long buk.’ ”—KTH 1:10, 11.
Ol i Kamapim Sampela Stail Bilong Ol
God i kamapim tok bilong Baibel, tasol ol man inap raitim sampela tok long pasin na stail bilong ol yet. Ol i mas wok strong tru bilong raitim gut tok bilong God. Olsem: Man bilong raitim Buk Saveman i tok, em i “hatwok long painim tok i swit long yau bilong ol man, na em i raitim gut ol dispela trupela tok.” (Saveman 12:10) Bilong bungim ol stori bilong bipo Esra i bin raitim, em i skelim 14 narapela narapela buk, olsem ol “buk i stori long ol samting King Devit i bin mekim” na “Buk Bilong Ol King Bilong Juda Na Israel.” (1 Stori 27:24; 2 Stori 16:11) Man bilong raitim Gutnius, em Luk, em i “wok longpela taim long askim gut long as bilong dispela olgeta samting. Nau [em i] raitim stret tasol, olsem ol dispela samting i bin kamap.”—Luk 1:3.
Sampela buk bilong Baibel i kamapim sampela pasin bilong ol man i bin raitim. Olsem: Matyu Livai, em i man bilong kisim takis paslain long em i kamap disaipel bilong Jisas, em i save tingim ol namba. Em wanpela tasol i bin raitim hamas mani Judas i bin kisim bilong kamapim Jisas, olsem “30 mani silva.” (Matyu 27:3; Mak 2:14) Luk, em i wanpela dokta, na em i raitim stret ol samting bilong ol sik. Olsem: Taim em i stori long sampela man em Jisas i bin oraitim ol, em i mekim kain tok olsem ‘skin i hat nogut tru’ na “sik lepra i pulap tru long bodi.” (Luk 4:38; 5:12; Kolosi 4:14) Olsem na planti taim Jehova i larim ol man long raitim sampela tok long pasin na stail bilong ol yet, tasol long wankain taim em i stiaim tingting bilong ol bambai ol tok ol i raitim i stret na i kamapim tok bilong em.—Sindaun 16:9.
Raitim Pinis Baibel Olgeta
Yumi kirap nogut olsem 40 man i bin raitim Baibel, ol i stap long narapela narapela kantri na ol i raitim insait long 1,600 yia, tasol ol tok ol i raitim i stret wantaim na i gat wanpela bikpela as tok bilong en. Dispela samting i kamap, long wanem, wanpela Man tasol i bin stiaim ol.
Olsem wanem? Jehova i mas yusim ol man long raitim Tok bilong em? Nogat. Tasol em i mekim olsem na dispela i kamapim savetingting bilong em. Tru tumas, wanpela as na ol man bilong olgeta hap i laikim Baibel em long wanem, ol man i raitim Baibel ol i kamapim ol samting ol i pilim long bel—olsem King Devit i bin mekim, em i bel hevi tru long rong em bin mekim, na i beten askim God long marimari long em.—Song 51:2-4, 13, 17, tok i go pas.
Tru Jehova i mekim wok long ol man bilong graun long raitim ol tok bilong Baibel, tasol yumi inap bilip long wok bilong ol olsem ol Kristen bilong bipo i bin mekim, em ol bilip long ol tok bilong Baibel na ol i “no kisim olsem tok bilong man. Nogat. [Ol] i kisim olsem tok tru bilong God.”—1 Tesalonaika 2:13.
YU LAIK SAVE?
◼ Husat i kamapim “olgeta tok” bilong Baibel?—2 Timoti 3:16.
◼ God Jehova i bin yusim wanem ol rot bilong givim tingting bilong em long ol man?—Kisim Bek 31:18; 34:27; Esekiel 1:1; Daniel 7:1.
◼ Olsem wanem pasin bilong ol man i raitim Baibel na ol samting ol i save tingim i kamap klia long ol tok ol i raitim?—Matyu 27:3; Luk 4:38.