Baibel—Em Narapela Kain Buk

Ol i kolim Baibel olsem nambawan buk ol man i save baim, winim ol narapela buk, na i stret ol i tok olsem. Planti man moa i save kaunim Baibel na ol i laikim tru, winim olgeta narapela buk. Inap long nau, ol man i tilim pinis olsem 4 bilion Baibel (olsem Baibel olgeta o hap bilong en) long 2,000 tok ples samting.

Tasol i gat wanpela bikpela samting moa i mekim na Baibel i narapela kain, olsem: Baibel i tokaut olsem God yet i as bilong olgeta tok bilong en. Aposel Kristen Pol i tok: “Spirit bilong God yet i bin kamapim olgeta tok i stap long buk bilong God.” (2 Timoti 3:16) Wanem insait bilong dispela tok? Insait bilong dispela tok “spirit bilong God yet i bin kamapim” (tok Grik, the·oʹpneu·stos) i olsem “God i winim win.” Wanpela tok Grik olsem em pneuʹma, na insait bilong en i olsem “spirit.” Olsem na Baibel i kamapim olsem spirit holi bilong God i bin kirapim sampela man long raitim Baibel, i olsem spirit i winim win long ol, na long dispela as yumi ken tok tru olsem Baibel em i Tok Bilong God, em i no tok bilong ol man. Tru tumas, planti man i stadi long Baibel ol i kirap nogut long lukim olsem olgeta tok bilong Baibel i stret wantaim, na i stret wantaim saiens, na ol man bilong raitim Baibel i no giaman na haitim ol pasin kranki bilong ol, na bikpela samting moa em planti tok profet bilong en i kamap tru pinis​—⁠ol dispela samting i mekim na planti milion man i kaunim Baibel ol i bilip tru olsem God yet i as bilong dispela buk, i no ol man.a

Tasol God i bin mekim wanem bilong stiaim ol man long raitim Baibel? Sampela i tok em i bin kolim olgeta wan wan tok na ol man i raitim stret olsem em i kolim. Na sampela i tok spirit holi i stiaim tasol tingting bilong ol man na ol i raitim Baibel, na em i no stiaim ol long raitim olgeta wan wan tok. Tasol spirit holi i no bihainim wanpela pasin tasol bilong kirapim ol man long raitim Baibel, nogat; “long planti pasin God i bin givim tok long ol tumbuna bilong yumi long maus bilong ol profet.” (Hibru 1:1; skelim wantaim 1 Korin 12:⁠6.) Long stori i kamap bihain, bai yumi skelim sampela pasin em God i bin mekim wok long en bilong givim tok long 40 man bilong raitim ol tok bilong Baibel.

[Futnot]