Namba 4 Hap
God i Tokim Yumi Long Laik Bilong Em
1, 2. Olsem wanem yumi save, God i save bekim askim bilong ol man i laik tru long save long en?
GOD bilong sori i save kamapim laik bilong em long ol man i laik tru long save long em. Na em i save bekim ol kain askim bilong ol olsem bilong wanem em i larim pen na hevi i stap.
2 Baibel i tok: “Sapos yu wok strong long kisim save long laik bilong [God], orait bai em i larim yu i save gut long em.” “Em i save kamapim as bilong ol samting i hait.” “Olgeta samting God, Bikpela i laik mekim, em i save autim pastaim long ol wokman bilong en.”—1 Stori 28:9; Daniel 2:28; Amos 3:7.
Ol Bekim i Stap We?
3. Sapos yumi laik save bilong wanem God i larim pen na hevi i stap, yumi ken painim bekim we?
3 Ol kain askim olsem bilong wanem God i larim hevi i stap na em bai mekim wanem bilong pinisim, bekim bilong ol dispela askim i stap long Buk bilong God, em Baibel. “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi . . . na bilong stretim wokabaut bilong yumi . . . na em i mekim yumi i redi long mekim olgeta kain gutpela wok.”—2 Timoti 3:16, 17.
4, 5. Olsem wanem Baibel i narapela kain long olgeta narapela buk?
4 I no gat narapela buk olsem Baibel. Stori bilong Baibel long ol samting bilong bipo i stret tru, na Baibel i stori long bipo tru, long taim God i no wokim yet ol man. Na ol tok profet bilong en i makim ol samting bilong nau, na ol samting bai kamap liklik taim bihain.
5 No gat narapela buk i gat ol samting i makim olsem stori bilong en long bipo i stret tru. Olsem: Long nau i gat wan wan olpela rait tasol bilong ol buk bilong bipo. Tasol i gat planti planti olpela rait bilong Baibel i gat olgeta tok o hap tok long en: I gat olsem 6,000 bilong ol 39 hap bilong Olpela Testamen, na 13,000 bilong ol 27 hap bilong Nupela Testamen.
6. Olsem wanem yumi ken save tru, ol tok bilong Baibel long nau i wankain olsem ol i bin raitim long pastaim?
6 God I Gat Olgeta Strong em i as bilong Baibel, na long rot bilong ol dispela olpela rait em i bin lukautim ol tok bilong en bai i stap stret. Olsem na ol tok long ol Baibel bilong yumi long nau i wankain olsem ol i bin raitim long pastaim. Narapela samting bilong helpim yumi long save long dispela em olsem: Sampela olpela rait bilong Nupela Testamen i bilong wan handet yia tasol bihain long taim man i bin raitim pastaim. Tasol ol wan wan rait bilong ol narapela buk bilong bipo i stap yet, ol i bilong planti handet yia bihain long taim man i bin raitim pastaim.
Em Presen Bilong God
7. Ol i tilim Baibel i go long hamas hap na tok ples?
7 Ol i bin tilim Baibel i go long planti hap tru, winim olgeta narapela buk. Ol i bin wokim 3 bilion samting. No gat narapela buk ol i bin wokim planti olsem. Na ol i bin tanim olgeta tok bilong Baibel o hap tok bilong en long 2,000 samting tok ples. Ol i no bin mekim olsem long narapela buk. Olsem na ol man i tok, klostu olgeta man long graun inap kisim Baibel.
8-10. Wanem sampela as na i gutpela yumi save long ol tok bilong Baibel?
8 Sapos wanpela buk i tok em i buk bilong God na i gat planti samting olsem bilong makim ol tok bilong en i stret, orait i gutpela yumi save long ol tok bilong en, a?a Baibel i stori long as bilong i stap bilong yumi, na long as bilong ol hevi, na long ol samting bai kamap bihain. No gat narapela buk inap mekim olsem.
9 Tru tumas, Baibel em i rot bilong God i givim ol tok bilong em long ol man. Long rot bilong spirit o strong bilong em, em i bin stiaim inap olsem 40 man long raitim. Aposel Pol i tok: “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God.”—1 Tesalonaika 2:13.
10 Namba 16 presiden bilong Amerika (em Abraham Lincoln) i tok, Baibel em i “nambawan gutpela presen God i bin givim long ol man . . . Baibel tasol i givim save long yumi long pasin i stret na pasin i no stret.” Orait, Baibel i tok wanem long as bilong pen na hevi, na bilong wanem God i bin larim i stap, na em bai mekim wanem bilong pinisim?
[Ol Futnot]
a Bilong kisim sampela save moa long dispela, lukim buk The Bible—God’s Word or Man’s?, em Sosaiti Wastaua bilong Nu Yok i wokim long tok Inglis long 1989.
[Piksa long pes 10]
Baibel em buk bilong God na rot bilong God i givim tok bilong em long ol man