Stadi1
Baibel—Em Nambawan Buk Bilong Yumi
1 Insait long Skul yumi save lainim tok bilong Baibel. Baibel em nambawan buk bilong yumi. Yumi mas save gut long tok bilong Baibel. Moses i kirap long raitim tok bilong Baibel long 1513 B.C.E. Aposel Jon i raitim laspela tok bilong en long 98 C.E. samting. Long nau ol i wokim Baibel long 1,760 samting tok ples.
2 Ol i raitim tok bilong Baibel pastaim long tok Hibru na tok Arameik na tok Grik. Baibel i gat 66 liklik hap bilong en. Pastaim ol Baibel i no gat ol ves na sapta, tasol bihain ol man i makim ol ves na sapta bilong en.
3 “Spirit bilong God yet i bin kamapim olgeta tok i stap long buk bilong God.” (2 Ti 3:16; 2 Pi 3:15, 16) Spirit bilong God i givim tingting long sampela man na ol i raitim tok bilong Baibel, olsem na olgeta tok bilong Baibel i stret. (2 Pi 1:21) God i givim tok na driman long ol tu, na ol i bihainim pasin bilong ol yet long raitim ol dispela tok.
4 God i givim strong long Moses, na Moses i bosim lain Israel. God i tokim Moses long raitim namba wan hap bilong Baibel. Na bihain, Josua na Samuel na Gat na Natan tu ol i raitim sampela hap tok bilong Baibel. Na King Devit na Solomon tu, na sampela profet, olsem Jona na Malakai. Ol i autim tok long nem bilong Jehova na olgeta samting i kamap olsem ol i tok pinis.—Lo 13:1-3.
5 Hap bilong Baibel ol i raitim pastaim long tok Hibru, yumi save dispela tok i tru, long wanem, Jisas yet wantaim ol man bilong raitim tok bilong Baibel long tok Grik ol i bilipim ol dispela tok.
6 Yumi save, tok bilong Baibel ol i raitim pastaim long tok Grik (Ol Skripsa Grik), em i tru, long wanem, ol dispela tok i wankain olsem tok bilong Jisas, na spirit holi i kamapim ol dispela tok. Baibel i tokim yumi long planti samting, olsem long nem bilong God na long ol gutpela pasin bilong God.
7 Baibel i tokim yumi long ol samting bai kamap long nau na long ol samting bai painim ol gavman bilong nau. Ol stretpela lo i stap insait long Baibel.—Jo 17:17.