Ol Stretpela Bilip Em God i Laikim

BILONG olgeta manmeri long graun i ken save long ol stretpela bilip em God i laikim, God i mas kamapim tingting bilong em long ol man. Na em i mas kamapim dispela tingting long wanpela rot we olgeta man inap kisim. Sapos em i no mekim olsem, ol man i no inap save wanem ol bilip na lotu na pasin God i orait long en, a? Olsem wanem? God i bin givim kain save olsem long ol man? Na sapos em i bin mekim olsem, orait long wanem rot?

Olsem wanem? Wanpela man i save stap 70 yia samting tasol, em yet inap toktok wantaim olgeta man na i stap olsem wanpela rot bilong givim tok bilong God long ol man? Nogat. Tasol wanpela buk inap mekim olsem. Olsem na i stret God i givim tok long ol man long rot bilong wanpela buk, a? Wanpela buk bilong bipo tru i tok God i bin kamapim ol tok bilong en, em Baibel. Wanpela man i bin raitim ol tok bilong Baibel, em i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.” (2 Timoti 3:​16) Orait nau yumi ken skelim sampela tok bilong Baibel na bai yumi ken save olsem Baibel i as bilong ol stretpela bilip o nogat.

Wanpela Buk Bilong Bipo

Taim yumi skelim ol bikpela buk bilong lotu, yumi kisim save olsem Baibel em i wanpela olpela buk bilong bipo tru. Ol i bin raitim ol namba wan hap bilong en olsem 3,500 yia i go pinis. Ol i raitim pinis dispela buk long 98 C.E.a Maski inap 40 man i bin raitim Baibel na ol i bin mekim insait long 1,600 yia, narapela tok i no pait wantaim narapela tok​—olgeta tok i stret wantaim. Dispela i olsem, long wanem, God em i As tru bilong ol dispela tok.

Ol i bin tilim Baibel long planti hap bilong graun na ol i bin tanim long planti tok ples, winim olgeta narapela buk i bin kamap long graun. Long olgeta yia, ol i save tilim 60 milion kopi bilong Baibel olgeta o sampela hap bilong en. Ol i bin tanim Baibel olgeta o sampela hap bilong en long 2,300 tok ples. Klostu olgeta manmeri, winim 90 pesen, ol inap kisim Baibel olgeta o sampela hap bilong en long tok ples bilong ol yet. Dispela buk i bin go insait long planti kantri na brukim pasin birua i stap olsem banis namel long ol man bilong kain kain skin na lain.

Ol Hap Bilong En

Sapos yu holim wanpela Baibel, opim na lukim ol hap bilong en. Pastaim, lukim lista bilong ol buk. Long planti Baibel, dispela lista i stap long fran bilong en, na i kolim nem bilong olgeta wan wan buk na namba bilong pes buk i stap long en. Bai yu lukim olsem Baibel em wanpela bikpela buk i gat ol liklik buk long en, na olgeta wan wan liklik buk i gat nem bilong en yet. Namba wan buk em Stat, na laspela buk em Kamapim Tok Hait, o Apokalips. Ol i brukim ol buk i go 2-pela hap. Namba wan hap i gat 39 buk ol i kolim Ol Skripsa Hibru, long wanem, ol i bin raitim long tok Hibru. Namba 2 hap i gat 27 buk ol i bin raitim long tok Grik na ol i kolim Ol Skripsa Grik. Sampela i save kolim dispela tupela hap olsem Olpela Testamen na Nupela Testamen.

Ol buk bilong Baibel i gat ol sapta na ves na dispela inap helpim yu long painim ol tok. Long dispela magasin yu holim, taim ol i kolim wanpela tok bilong Baibel, ol i raitim nem bilong buk, na bihain namba bilong sapta, na bihain namba bilong ves. Olsem: “2 Timoti 3:16” i makim Buk Namba 2 Timoti, sapta 3, ves 16. Traim long lukim dispela ves long Baibel.

Ating bai yu wanbel long tok olsem gutpela rot bilong save gut long Baibel, i olsem: Oltaim yu mas ritim Baibel. Sampela i save ritim Ol Skripsa Grik pastaim, kirap long Buk Matyu. Sapos yu ritim 3-pela o 5-pela sapta long olgeta wan wan de, bai yu inap ritim olgeta tok bilong Baibel insait long wanpela yia. Tasol olsem wanem yu inap save olsem ol tok yu ritim long Baibel em ol tok God yet i bin kamapim?

Yu Inap Bilip Long Baibel?

Wanpela buk em God yet i bin kamapim bilong olgeta kain man, i mas i gat ol tok long en i bin wok gut long bipo na long nau tu, a? Baibel i kamapim ol tok i stret long pasin bilong man maski ol i bin stap long wanem taim, na ol stiatok bilong en inap helpim gut ol man long nau wankain olsem i bin helpim gut ol man long namba wan taim ol man i bin raitim long Baibel. Yumi inap lukim dispela samting long wanpela tok em Jisas Krais, Man i bin kamapim lotu Kristen, i bin mekim. Dispela tok i stap long Matyu sapta 5 i go 7. Dispela tok, ol i kolim Bikpela Tok Long Maunten, em i stori long rot bilong painim amamas tru na stretim ol kros, na pasin bilong beten, na yumi mas i gat wanem tingting long ol samting bilong skin, na planti samting moa. Long dispela tok bilong Jisas, na long olgeta arapela tok long Baibel, Baibel i tokaut klia long ol samting yumi mas mekim na ol samting yumi mas abrusim na bai yumi inap mekim ol samting God i laikim na i stap bilong yumi i ken kamap gutpela.

Narapela as na yumi ken bilip long Baibel i olsem: Taim Baibel i stori long ol samting bilong saiens, stori bilong Baibel i stret. Olsem: Long bipo planti man i ting olsem graun i flet, tasol long dispela taim yet Baibel i stori olsem graun i “raunpela.”b (Aisaia 40:​22, NW ) Na 3,000 yia paslain long taim saientis, Bikman Isaac Newton, i bin tokaut olsem wanpela kain strong ol i kolim graviti i save holim ol planet long ples bilong ol na i olsem ol i hangamap nating, Baibel i bin tokaut olsem “graun i hangamap nating.” (Jop 26:7) Na tingim tu rot bilong wara i kam oltaim long graun em Baibel i bin stori long en 3,000 yia i go pinis: “Olgeta wara i save ran i go daun long solwara, tasol solwara i no pulap yet. Bihain, wara i save go bek long het bilong ol wara, na i ran i go daun gen.” (Saveman 1:7) Yes, Man Bilong Wokim heven na graun em Man bilong kamapim ol tok bilong Baibel tu.

Baibel i stori stret long ol samting i bin kamap bipo na dispela i strongim dispela tok olsem God i bin kamapim ol tok bilong Baibel. Ol samting Baibel i stori long en ol i no stori nating, nogat. Ol stori bilong Baibel i save kolim klia nem bilong ol man na taim stret na ples stret ol samting i bin kamap. Olsem: Luk 3:1 i tok: “Long namba 15 yia bilong Sisar Taiberius i stap king bilong Rom, Pontius Pailat em i stap namba wan gavman bilong distrik Judia. Long dispela taim Herot i bosim distrik Galili.”

Ol man bilong bipo i raitim stori bilong ol samting i bin kamap, ol i save stori long taim ol king bilong ol i winim pait na long ol gutpela pasin bilong ol​—ol i no stori long taim ol i lus long pait o mekim pasin kranki. Tasol ol man bilong raitim Baibel ol i save kolim stret ol samting i bin kamap, na ol i kamapim tu ol bikpela rong ol yet i bin mekim. Olsem: King Devit bilong Israel i tok: “Mi longlong tru na mi kaunim ol man. Na long dispela pasin mi mekim bikpela rong.” Baibel i kamapim dispela tok​—em i no haitim. (2 Samuel 24:10) Na man bilong raitim Baibel, em Moses, em yet i bin raitim stori bilong wanpela taim em i no bin bilip strong long God.​​—Namba 20:12.

I gat narapela mak na yumi ken bilip olsem God i as bilong Baibel. Dispela mak em ol tok profet i bin kamap tru. Sampela bilong ol dispela tok profet i stori long Jisas Krais. Olsem: Inap 700 yia paslain long mama i karim Jisas, Ol Skripsa Hibru i tokaut olsem dispela Man God i bin tok promis long salim i kam, em bai kamap long “Betlehem long distrik Judia.”​​—Matyu 2:​1-6; Maika 5:2.

Tingim narapela samting. Long 2 Timoti 3:​1-5, Baibel i tok: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu . . . Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol na ol bai i no save liklik long bikpela strong i stap long pasin tru bilong God.” Ating dispela i makim pasin bilong planti man long nau, a? Ol i bin raitim dispela tok long yia 65 C.E., olsem 1,900 yia i go pinis!

Baibel i Skulim Yumi Long Wanem Samting?

Taim yu ritim Baibel, bai yu kisim save olsem Baibel i gat bikpela save na gutpela tingting i stap long en, winim tingting bilong ol man bilong graun. Baibel i bekim stret ol askim olsem: God em i husat? Satan i stap o nogat? Jisas Krais em i husat? I gat wanem as na pen na hevi i stap? Wanem samting i painim yumi ol man taim yumi dai? I gat kain kain bekim bilong ol dispela askim. Ol dispela bekim i narapela narapela olsem bilip na pasin bilong ol man i bekim ol dispela askim i narapela narapela. Tasol Baibel i bekim stret ol dispela askim na ol askim bilong planti samting moa. Na tu, long pasin yumi mas mekim long ol arapela na long ol man i gat wok long bosim yumi, Baibel i kamapim gutpela tok i nambawan tru.c

Baibel i tok wanem long laik bilong God long dispela graun na ol man? Em i tok promis: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:​10, 11) “God yet bai i stap wantaim ol [manmeri], na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:​3, 4) “Ol stretpela man bai i kisim graun God i givim ol, na bai ol i stap oltaim long en.”​​—Song 37:29.

Na tu, Baibel i bin tok profet olsem woa, pasin raskol, pait na bagarapim man, na pasin nogut, klostu bai pinis. Bai i no gat moa sik, lapun, na dai. Ol man bai kisim laip oltaim long wanpela paradais long graun. Em ol gutpela samting tru! Na ol dispela samting i kamapim klia olsem God i save laikim tru ol manmeri!

Bai Yu Mekim Wanem?

Baibel em wanpela gutpela presen i kam long Man Bilong Wokim yumi. Yumi mas mekim wanem long dispela buk? Wanpela man i bin go bikpela long lotu Hindu i bin ting olsem, bilong ol tok bilong God i ken helpim olgeta man, ol dispela tok i mas kamap long bipo tru. Taim em i kisim save olsem sampela hap bilong Baibel i olpela tru, winim ol olpela rait Hindu, em ol Veda, em i kirap long ritim Baibel na skelim ol tok bilong en.d Wanpela profesa long wanpela yunivesiti long Amerika em tu i luksave olsem em i mas ritim dispela buk em ol i bin tilim long planti hap, winim olgeta narapela buk, na bihain em i ken skelim olsem em inap bilip long en o nogat.

Sapos yu ritim Baibel na bihainim ol tok bilong en, bai yu kisim planti gutpela blesing. Baibel i tok: “Man i save laikim tumas lo bilong God, na em i save tingting long dispela lo long san na long nait [i ken amamas tru]. Dispela man i olsem diwai ol man i bin planim klostu long wara. Em i save karim kaikai long taim bilong em stret, na lip bilong en i no save drai. Olgeta samting em i mekim i save kamap gutpela.”e (Song 1:​1-3) Taim yu stadi na tingim gut ol tok bilong Baibel, dispela bai helpim yu long stap amamas, long wanem, dispela bai inapim laik bilong yu long samting bilong spirit. (Matyu 5:3) Baibel bai soim yu long rot bilong mekim i stap bilong yu i kamap gutpela na long stretim ol hevi i kamap. Yes, man i “bihainim [ol lo bilong God long Baibel], . . . sindaun bilong [em bai] i kamap gutpela tru.” (Song 19:11) Na tu, pasin bilong bilip strong long ol promis bilong God bai helpim yu long dispela taim nau na yu inap wetim gutpela samting i kamap bihain.

Baibel i tok: “Yumi save, nupela pikinini em i save laikim tumas susu. Olsem tasol yupela i mas laikim tumas long kisim gutpela susu i kam long God, na i no gat samting nogut i stap long en.” (1 Pita 2:2) Nupela pikinini i mas kisim susu na em i strong long em i mas kisim. Na olsem tasol, yumi mas kisim save i kam long God. Olsem na yu mas “laikim tumas long kisim” ol tok i kam long Tok Bilong God. Baibel em wanpela buk i gat ol tok i tru i kam long God long en. Putim mak bilong stadi oltaim long Baibel. Ol Witnes Bilong Jehova long hap bilong yu bai amamas long helpim yu long stadi yu mekim. Mipela i laik singautim yu long go lukim ol. O yu ken raitim pas i go long ol lain bilong wokim dispela nius.

[Ol Futnot]

[Piksa long pes 7]

“Laikim tumas long kisim” ol tok i kam long Tok Bilong God. Oltaim stadi long Baibel

[Piksa Kredit Lain long pes 5]

NASA photo