3
Narapela Kain As Bilong Bikpela Save Tru
1, 2. Bilong wanem yumi mas skelim tok bilong Baibel?
1 Olsem wanem? Baibel i gat ol tok i kamapim ol dispela bikpela save? Em inap bekim stret ol bikpela askim long i stap bilong yumi?
2 Baibel em i bikpela buk tru na yumi mas skelim ol tok bilong en. Wanpela as i olsem: Baibel i narapela kain tru long olgeta narapela buk. Yumi ken stori long dispela samting.
Olpela Tru, i Stap Long Olgeta Hap
3, 4. Ol i bin kirap raitim Baibel inap hamas yia bipo?
3 Baibel em i olpela buk tru, winim olgeta narapela buk. Sampela hap bilong en ol i bin raitim inap 3,500 yia bipo, em paslain tru long ol narapela buk em ol man i ting ol i buk holi. Namba wan bilong ol 66 hap bilong Baibel ol i bin raitim olsem 1,000 yia paslain long taim bilong Buda na Konfusas, na inap 2,000 yia paslain long Mohamet.
4 Baibel i stori long taim ol man i bin kamap long graun long pastaim tru, na ol i bin kamap olsem wanem long graun. Na Baibel i stori tu long taim God i bin wokim graun.
5. Hamas olpela rait bilong Baibel i stap yet? Olsem wanem long ol olpela rait i no bilong lotu?
5 Olgeta narapela buk i no gat planti rait bilong en bilong bipo tru i stap yet. Tasol i gat olsem 11,000 hap bilong Baibel ol i bin raitim long han long tok Hibru na tok Grik, na sampela i olpela tru na ol i bin raitim klostu long taim ol man i bin raitim long pastaim tru. Ol dispela rait i stap yet, maski ol man i bin wok strong tru long bagarapim Baibel.
6. Ol i bin tilim planti Baibel long ol man o olsem wanem?
6 Na tu, ol i bin tilim planti Baibel tru long olgeta hap, winim olgeta narapela buk. Ol i bin tilim olsem 3 bilion Baibel o ol hap bilong en long 2,000 tok ples. Ol i tok, klostu olgeta man long graun ol inap kisim Baibel long tok ples bilong ol yet. I no gat narapela buk em ol i bin tilim planti olsem.
7. Olsem wanem long ol tok bilong Baibel?
7 Na tu, tok bilong Baibel i stret olgeta, na i no gat narapela buk bilong bipo i olsem. Ol man bilong saiens, na ol man bilong raitim stori bilong ol samting i bin kamap bipo, na ol saveman bilong painim ol ples bilong bipo, na ol man i gat save long ol ples na ol tok ples, ol save ol i kisim i kamapim klia olsem ol tok bilong Baibel i stret.
Stret Wantaim Saiens
8. Olsem wanem long tok bilong Baibel long ol samting bilong saiens?
8 Baibel i no wanpela buk bilong saiens, tasol ol tok bilong en long ol samting bilong saiens i stret wantaim ol stretpela save ol man bilong saiens i kisim pinis. Tasol ol narapela buk bilong bipo em ol man i ting ol i buk holi, ol i kamapim ol stori nating i no stret wantaim saiens, na i giaman tasol. I gat planti stori long Baibel i kamapim klia olsem tok bilong en i stret wantaim saiens. Orait nau yumi ken stori long 4-pela samting, olsem:
9, 10. Bipo ol man i gat tingting kranki long samting i holim graun i stap long ples bilong en, tasol Baibel i tok wanem long dispela?
9 Olsem wanem graun i stap long ples bilong en. Long taim bilong ol man i bin raitim Baibel, ol man i gat kain kain tingting long olsem wanem graun i stap gut long ples bilong en. Sampela i ting graun i sindaun antap long 4-pela elefan em ol i sanap antap long traipela trausel long solwara. Na wanpela saveman bilong ol Grik long yia 350 samting paslain long Krais, nem bilong em Aristotal, em i tok graun i no inap hangamap nating. Em i tok, ol samting bilong ples antap i pas long strongpela skin bilong ol raunpela samting, em narapela i stap insait long narapela. Em i tok, graun i pas long wanpela i stap insait tru, na ol sta i pas long wanpela i stap ausait tru.
10 Tasol long yia 1473 samting paslain long Krais, Baibel i tok klia olsem: “God i bin mekim dispela graun i hangamap nating.” (Jop 26:7) Ol saveman bilong saiens i kirap nogut long dispela stretpela save i bin kamap bipo yet long Baibel. Wanpela buk i tok: “Long Jop 26:7 Baibel i stori klia tru olsem graun i hangamap nating, na dispela tok i wankain long stretpela save ol man bilong saiens i kisim bihain.”—Theological Wordbook of the Old Testament.
11, 12. Wanem taim ol man i bin kisim save long dispela tok i tru olsem i stap long Jop 26:7?
11 Dispela stretpela tok bilong Baibel i bin kamap olsem 1,100 yia paslain long taim bilong Aristotal. Tasol ol i bin skulim ol man long tok bilong em i go inap 2,000 yia samting bihain long taim em i dai! Orait, long yia 1687, wanpela saveman bilong saiens, em Bikman Isaac Newton, em i raitim buk i kamapim ol save em i bin kisim, olsem wanpela kain strong yumi no inap lukim, ol i kolim graviti, i holim graun na san na mun na ol sta long ples bilong en na i olsem ol i hangamap nating. Tasol em i bin kamapim dispela save klostu 3,200 yia bihain long taim Baibel i bin tokaut klia olsem graun i “hangamap nating.”
12 Em nau, dispela save em Baibel i bin kamapim klostu 3,500 yia bipo i stret wantaim save ol man i kisim long lo bilong graviti samting. Wanpela saveman i tok: “Olsem wanem Jop i save long dispela tok i tru? Ol man i no bilip olsem God yet i as bilong ol tok bilong Baibel, ol i no inap bekim dispela askim.”
13. Bipo ol man i ting olsem wanem long mak bilong graun? Tasol wanem samting i mekim na ol i senisim tingting bilong ol?
13 Mak bilong graun. Wanpela buk i tok: “Ol man bilong bipo i bin ting dispela graun i stret olsem wanpela plang samting na i stap namel tru long olgeta samting. . . . Dispela tok long graun i raunpela, paslain long yia 1500 samting ol man i no bilip long en.” (The Encyclopedia Americana) Sampela kepten bilong sip long bipo ol i pret, nogut sip i go i go na kamap long arere bilong graun na nau sip i pundaun na ol i lus. Tasol bihain ol man i kisim save long wokim kompas samting na nau ol sip inap raun i go longwe. Narapela buk i tok, “taim ol sip i go longwe na ol i painim ol nupela kantri, dispela i kamapim klia olsem graun i raunpela.”
14. Baibel i tok wanem long mak bilong graun? Wanem taim Baibel i bin kamapim dispela tok?
14 Tasol long 2,700 yia samting bipo, Baibel i tok, graun i raunpela. Long Aisaia 40:22 i gat hap tok Hibru em yumi tanim olsem “raunpela.” Olsem na sampela Baibel i tanim tok bilong Aisaia 40:22 olsem God i stap antap long “raunpela graun.”—Baibel New World Translation, Baibel Douay, Baibel Moffatt.
15. Olsem wanem na tingting kranki bilong ol man i no bin paulim tok bilong Baibel long mak bilong graun?
15 Olsem na tingting kranki bilong ol man bilong bipo long graun i hangamap olsem wanem, na wanem mak bilong en, dispela i no paulim tok bilong Baibel, long wanem, Man bilong kamapim Baibel em dispela Man i bin wokim graun na olgeta narapela samting. Em i save graun i hangamap olsem wanem, na wanem mak bilong graun. Olsem na em i bin stiaim tingting bilong ol man bilong raitim Baibel na bai ol i no ken raitim ol tok kranki i no stret wantaim saiens tru.
16. Ol marasin samting i stap long skin bilong ol samting i gat laip, olsem wanem dispela i truim tok bilong Baibel?
16 Ol samting i gat laip. Baibel i tok: “Bihain God, Bikpela i kisim graun na em i wokim man long en.” (Stat 2:7) Wanpela buk i tok: “Olgeta marasin i stap long skin bilong ol samting i gat laip, ol i stap tu long ol samting i no gat laip.” (The World Book Encyclopedia) Olsem na olgeta marasin samting i stap long skin bilong yumi ol man na ol narapela samting i gat laip, ol dispela marasin i stap tu long graun yet. Dispela save i stret wantaim tok bilong Baibel long God i bin kisim graun na wokim man na olgeta narapela samting i gat laip.
17. Ol samting i gat laip ol i bin kamap olsem wanem?
17 “God i kamapim kain kain.” Baibel i tok, God i bin wokim namba wan man na meri, na long rot bilong tupela em olgeta narapela manmeri i bin kamap. (Stat 1:26-28; 3:20) Baibel i tok, ol narapela samting i gat laip, olsem ol pis, pisin, animal, ol tu i bin kamap olsem—God i bin kamapim ol i kain kain, na ol i kamapim ol pikinini i kain olsem ol yet. (Stat 1:11, 12, 21, 24, 25) Dispela i stret wantaim save ol man bilong saiens i bin kisim, olsem olgeta kain samting i gat laip ol i kamap long wanpela mama i kain olsem ol yet. Saveman Raymo i tok: “Samting i gat laip i kamapim samting i gat laip. . . . Tasol olsem wanem samting i no gat laip i bin kamapim samting i gat laip? Ol saveman i no inap bekim dispela askim—ol i mekim nating tasol. I olsem ol i tok, samting i no gat laip em yet i mekim na em i kamap samting i gat laip. . . . Olsem na ating man bilong kamapim tok bilong Stat em i bin tok stret.”
Ol Stori Bilong Baibel i Stret
18. Wanpela loya i tok wanem long ol stori bilong Baibel long ol samting i bin kamap bipo?
18 Ol stori bilong Baibel long ol samting i bin kamap bipo i stret olgeta. I no gat narapela buk i olsem. Wanpela buk i tok: ‘Ol stori nating na ol man i mekim tok giaman long kot ol i no save kamapim klia olsem samting ol i tok long en i bin kamap long wanem hap stret o long wanem taim stret. Dispela i brukim lo em mipela ol loya i mas lainim, olsem “stori i mas kolim klia taim na ples dispela samting i bin kamap.” Ol stori bilong Baibel i kolim taim na ples stret ol samting i bin kamap na i no popaia liklik.’—A Lawyer Examines the Bible.
19. Wanpela buk i tok wanem long ol stori bilong Baibel long ol samting i bin kamap bipo?
19 Wanpela buk dikseneri bilong Baibel i tok: “ [Man bilong raitim Aposel] em i bin raitim stori bilong ol samting i bin kamap long taim bilong em; em i bin kolim nem bilong planti majistret bilong ol taun, na ol provinsial gavman, na ol king samting, na olgeta dispela nem i stret tru long ples na taim ol dispela stori i bin kamap.”—The New Bible Dictionary.
20, 21. Wanpela saveman bilong Baibel i tok wanem long ol stori bilong Baibel long ol samting i bin kamap bipo?
20 Long wanpela buk (The Union Bible Companion) S. Austin Allibone i tok: “Bikman Isaac Newton . . . i gat nem olsem man bilong skelim skelim ol rait bilong bipo, na em i bin skelim gut Baibel Holi. Em i ting olsem wanem long Baibel? Em i tok, ‘Long Nupela Testamen mi lukim planti samting i makim olsem ol tok bilong en i tru, winim olgeta narapela buk i stori long ol samting i bin kamap bipo.’ . . . Bikman Johnson i tok, i gat planti samting tru i kamapim klia olsem Jisas i bin i dai long ples Golgota, olsem ol Fopela Gutnius i stori long en, winim tru ol samting i makim olsem Julius Sisar i bin dai long Haus Gavman long Rom.”
21 Na buk i tok: “Ol man i tok ol stori bilong Fopela Gutnius i no tru, askim ol, i gat wanem as na ol i bilip olsem Sisar i bin dai long Haus Gavman long Rom, o Pop Leo Namba 3 i bin putim Salemein i stap King bilong Wes long yia 800. . . . Olsem wanem yu save, King Sals Namba Wan [bilong Inglan] i bin i stap tru, na ol i bin katim nek bilong em, na Oliva Kromwel i senisim em na kamap king? . . . Olsem wanem yu save, Bikman Isaac Newton i bin kisim save long lo bilong graviti? . . . Yumi bilipim olgeta stori bilong ol dispela man bilong bipo, long wanem, i gat ol samting i makim olsem ol dispela stori i tru. . . . Orait, sapos sampela i no laik bilip long en, yumi save tok ol i longlong o ol i no gat save liklik.”
22. Bilong wanem sampela man i no bilip olsem tok bilong Baibel i tru?
22 Laspela tok bilong buk i tok: “Orait, bai yumi tok wanem long ol man i lukim planti samting i kamapim klia olsem ol stori bilong Baibel i tru na ol i strong yet long tok, ol i no bilip? . . . I gat as na yumi ken ting, bel bilong ol i no stret; i no olsem tingting bilong ol i kranki;—ol i no laik bilip long wanpela samting i daunim ol yet na i subim ol long senisim pasin bilong ol.”
Ol Tok i Stret Wantaim
23, 24. Olsem wanem yumi kirap nogut long olgeta tok bilong Baibel i stret wantaim?
23 Olsem wanem sapos i gat wanpela buk em ol man i bin kirap raitim long taim Rom i kamap Nambawan Gavman long graun, na ol narapela narapela man i raitim ol hap tok bilong en i kam inap long nau? Na olsem wanem sapos ol man bilong raitim ol i gat kain kain wok, olsem soldia, king, pris, man bilong kisim pis, wasman bilong sipsip, dokta? Yu ting olgeta tok bilong dispela buk i stret wantaim na i gat wanpela as tok bilong en tasol? Ating bai yu tok, ‘Nogat tru!’ Tasol Baibel em i kain buk olsem, na olgeta tok bilong en i stret wantaim—narapela tok i no pait wantaim narapela tok.
24 Baibel i gat 66 hap bilong en ol i bungim wantaim, na inap olsem 40 man i bin raitim insait long 1,600 yia. Ol i kirap raitim Baibel long yia 1513 paslain long Krais, na ol i pinisim long yia 98 bihain long Krais. Ol dispela man i gat kain kain wok na sindaun bilong ol, na planti ol i no bin bungim ol narapela man bilong raitim Baibel, tasol dispela buk i gat wanpela as tok tasol, na olgeta tok i stret wantaim—i olsem wanpela man tasol i bin raitim. Sampela man i ting ol man bilong Wes i bin raitim Baibel, tasol nogat. Ol man long hap bilong Is i bin raitim.
25. Ol man bilong raitim Baibel i no bin haitim ol pasin kranki bilong ol, na dispela i strongim wanem tok bilong ol long Baibel?
25 Planti man bilong raitim buk long bipo ol i stori long ol gutpela wok ol i bin mekim na ol gutpela pasin bilong ol, na ol i no kamapim ol pasin kranki o popaia bilong ol. Tasol ol man bilong raitim Baibel ol i kamapim ol pasin kranki bilong ol yet na bilong ol king na bikman bilong ol. Namba 20:1-13 na Lo 32:50-52 i kamapim ol pasin kranki bilong Moses, tasol Moses yet i bin raitim ol dispela hap bilong Baibel. Na Jona 1:1-3 na 4:1 i kamapim ol pasin kranki bilong Jona, tasol em yet i bin raitim dispela tok. Na Matyu 17:18-20; 18:1-6; 20:20-28; 26:56 i kamapim pasin kranki bilong ol disaipel bilong Jisas. Em nau, ol man bilong raitim Baibel ol i no haitim ol pasin kranki bilong ol yet, na dispela i strongim tok bilong ol, em ol i tok, God yet i givim tingting long ol na ol i raitim ol dispela tok.
Wanpela Bikpela Samting Bilong En
26, 27. Olsem wanem na tok bilong Baibel i stret tru long ol samting bilong saiens na ol narapela samting tu?
26 Olsem wanem na olgeta tok bilong Baibel i stret wantaim saiens, na ol stori bilong en long ol samting i bin kamap bipo i stret, na narapela tok i no pait wantaim narapela tok? As bilong en i olsem: God i gat olgeta strong, em yet i as bilong olgeta tok bilong Baibel. Long strong bilong spirit holi em i bin stiaim ol man long raitim ol tok bilong em long Baibel.
27 Long Baibel aposel Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong . . . stretim wokabaut bilong yumi na bilong skulim yumi long ol pasin i stret long ai bilong God.” Na Pol i tok: “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God.”—2 Timoti 3:16, 17; 1 Tesalonaika 2:13.
28. Orait, Baibel i kamap olsem wanem?
28 Olsem na Baibel i kamap long tingting bilong wanpela Man tasol—em God. Em i gat bikpela strong tru, olsem na i no hatwok long em i lukautim gut Baibel i kam inap nau na ol man i no ken paulim tok bilong en. Long 1940, wanpela saveman bilong ol olpela rait bilong Baibel, em Bikman Frederic Kenyon, em i tok: “Nau yumi ken save tru, ol tok bilong Baibel yumi kisim pinis em i wankain olsem ol i bin raitim long pastaim.”
29. Yumi ken mekim wanem tok piksa long strong bilong God long salim tok i kam long ol man?
29 Long nau long rot bilong redio na televisen ol man inap salim tok i kam long ol longwe longwe hap, na long mun tu. Ol i bin salim ol roket samting i go antap tru na ol i bin kisim piksa bilong ol planet olsem sta em ol i stap longwe moa yet, inap planti milion kilomita, na ol i salim tok na ol dispela piksa i kam long graun. Orait, Man bilong wokim yumi, em yet i bin kamapim dispela rot na bai tok bilong redio i ken i kam long en, olsem na em inap tru long salim ol tok na piksa long tingting bilong ol man em i bin makim bilong raitim ol tok bilong Baibel.
30. Yu ting God i laik bai ol man i ken save, em i gat wanem laik long ol?
30 Na i gat planti samting bilong graun na ol samting i stap long en i kamapim klia tru olsem God i save tingim ol man. Olsem na yumi save, em i laik bai ol man i ken save long em na long ol samting em i laik mekim bilong helpim ol, na em bai i kamapim klia dispela laik bilong em long rot bilong wanpela buk i no ken bagarap.
31. Wanpela buk em God i bin kamapim ol tok bilong en, olsem wanem dispela i winim pasin bilong kolim ol tok long maus tasol i kam inap nau?
31 Na yumi ken tingim wanpela buk em God yet i As bilong en—em i winim tru pasin bilong kolim ol tok long maus, kirap long ol tumbuna na i kam long yumi. Yumi save, sapos ol i kolim tasol long maus, ol bai sotim ol dispela tok na senisim nabaut, na bihain tok bai paul na bai ol man i no inap kisim gut as bilong tok. Tasol wanpela buk em God i as bilong en, em bai i no gat sampela tok kranki long en. Na yumi inap wokim sampela buk moa olsem, na yumi ken tanim long ol narapela tok ples bilong helpim ol man. Olsem na i stret God i mas kamapim wanpela buk bilong givim ol tok long yumi, a? Na God i tok em i bin mekim olsem.
Ol Tok Profet
32-34. Baibel i gat wanem samting na ol narapela buk nogat?
32 Na i gat narapela samting tu i makim olsem God yet i bin kamapim ol tok bilong Baibel, na i no gat narapela buk i gat dispela mak. Em olsem: I gat ol tok profet long Baibel long ol samting i mas kamap bihain, na truim bilong sampela tok profet i kamap pinis, na sampela i wok long kamap long nau.
33 Olsem: Baibel i tok profet long taun Tair bilong bipo bai bagarap, na ol birua bai daunim taun Babilon, na ol bai wokim gen Jerusalem, na ol king bilong Midia na Persia na bilong kantri Grik bai kamap strong na bihain strong bilong ol bai pinis. Orait, olgeta samting i kamap stret tru olsem ol dispela tok profet i bin makim planti handet yia paslain. Sampela man i laik daunim Baibel ol i tok, ol man i bin raitim ol dispela tok profet taim ol dispela samting i kamap pinis.—Aisaia 13:17-19; 44:27–45:1; Esekiel 26:3-6; Daniel 8:1-7, 20-22.
34 Ol tok profet bilong Jisas long bagarap bai painim Jerusalem, dispela i kamap tru long yia 70. (Luk 19:41-44; 21:20, 21) Na ol tok profet bilong Jisas na aposel Pol long taim bilong “las de,” ol i wok long kamap tru long taim bilong yumi.—2 Timoti 3:1-5, 13; Matyu 24; Mak 13; Luk 21.
35. Olsem wanem Man bilong wokim yumi em tasol inap kamapim ol tok profet bilong Baibel?
35 I no gat wanpela man bilong graun long tingting bilong em yet em inap kolim stret tru ol samting bai kamap bihain. Man bilong wokim olgeta samting, em i gat olgeta strong na olgeta save, em tasol inap mekim, olsem 2 Pita 1:20, 21 i tok: “I no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.”
Baibel i Bekim Ol Askim
36. Baibel i tok wanem long yumi?
36 Olsem na i gat planti samting i makim klia olsem Baibel em i tok bilong God. Em i bekim ol bikpela askim olsem: I gat wanem as na yumi stap long graun? Bilong wanem i gat planti hevi na pen? Wanem samting bai painim yumi long bihain? Na Baibel i tokim yumi, i stap bilong yumi long bihain bai kamap gutpela. Na em i tokaut tu olsem i gat wanpela God i stap, em i nambawan bikpela God, na em i gat wanpela laik na em i bin wokim yumi ol man na dispela graun, na em bai truim dispela laik bilong em. (Aisaia 14:24) Na Baibel i tokaut tu long lotu i tru na olsem wanem yumi ken painim. Olsem na Baibel tasol inap bekim tru ol bikpela askim long i stap bilong yumi.—Song 146:3; Sindaun 3:5; Aisaia 2:2-4.
37. I gat wanem askim long lain bilong ol kantri i tok ol i Kristen?
37 Tru i gat planti samting i makim olsem God i as bilong Baibel na tok bilong en i tru. Tasol yu ting olgeta man i tok ol i bilip long Baibel ol i save bihainim tok bilong en? Yumi ken tingim lain bilong ol kantri ol i tok ol i Kristen: Ol i bin holim Baibel inap planti handet yia pinis. Tasol olsem wanem? Ol tingting na pasin bilong ol i makim olsem ol i bihainim tok bilong God?
[Ol Piksa long pes 11]
Bikman Isaac Newton i bilip olsem graviti i holim graun i stap gut long ples bilong en
Ol saveman i kirap nogut long dispela stretpela save i bin kamap bipo yet long Baibel olsem graun i hangamap nating
[Piksa long pes 12]
Bipo sampela kepten bilong sip i pret, nogut sip i kamap long arere bilong graun na i pundaun
[Piksa long pes 13]
I gat planti samting tru i kamapim klia olsem Jisas i bin i stap laip, winim tru ol samting i makim olsem Julius Sisar o King Salemein o Oliva Kromwel o Pop Leo Namba 3 i bin i stap
[Piksa long pes 15]
Tok profet bilong Jisas long Jerusalem bai bagarap, truim bilong en i kamap long yia 70, na Banis Ston bilong Taitus long Rom i kamapim klia dispela samting