Jisas i Makim Twelpela Aposel

Jisas i autim tok inap wan na hap yia pinis, na em i mas mekim wanpela bikpela disisen. Em bai makim husat long wok wantaim em? Em bai trenim husat long go pas long kongrigesen Kristen? Bilong mekim ol dispela disisen, Jisas i laik bai Jehova i stiaim em. So em i go long wanpela maunten na bai em i stap wanpis, na em i beten long nait olgeta. Long moning, Jisas i singautim sampela disaipel na em i makim 12-pela aposel bilong em. Yu tingim nem bilong sampela? Nem bilong ol em Pita, Andru, Jems, Jon, Filip, Bartolomyu, Tomas, Matyu, Jems em pikinini man bilong Alfius, Tadius, Saimon, na Judas Iskariot.

Dispela 12-pela aposel i save raun wantaim em. Bihain long em i trenim ol, em i salim ol yet i go bilong autim tok. Jehova i givim strong long ol na bai ol inap rausim ol dimon na oraitim ol sikman.

Jisas i kolim 12-pela aposel olsem pren bilong em, na em i trastim ol. Ol Farisi i tingim ol aposel olsem ol i no go long bikpela skul na ol i man nating. Tasol Jisas i givim trenim long ol long mekim wok bilong ol. Ol bai stap wantaim Jisas long ol haptaim we i bikpela samting long laip bilong em, olsem paslain long em i dai na bihain long em i kirap bek. Olsem Jisas, klostu olgeta bilong dispela 12-pela man i bilong Galili. Na sampela i marit.

Ol aposel i no gutpela olgeta, na ol i save popaia. Sampela taim ol i no tingting gut pastaim na toktok na ol i mekim ol disisen nogut. Na sampela taim ol i les kwik. Na tu, ol i bin kros long husat i stap nambawan. Tasol ol i gutpela man husat i laikim Jehova. Ol bai stap olsem faundesen bilong kongrigesen Kristen bihain long Jisas i go.