Jisas i Skulim Ol Man

LUKIM Jisas. Em i sindaun long wanpela maunten long Galili na skulim ol man. Ol man i sindaun klostu tru long em, em ol disaipel bilong em. Em i bin makim 12-pela bilong kamap aposel. Jisas i bin givim narakain gutpela wok long ol aposel. Yu save long nem bilong ol?

Wanpela em Saimon Pita na brata bilong em Andru. Na Jems na Jon, tupela tu i brata. Narapela aposel tu i gat nem Jems, na narapela tu em Saimon. Tupela aposel i gat nem Judas. Wanpela em Judas Iskariot, na narapela Judas ol i kolim tu Tadius. Na Filip na Nataniel (narapela nem bilong em Bartolomyu), na Matyu na Tomas.

Taim Jisas i lusim Samaria i kam, long namba wan taim em i kirap autim tok olsem: ‘Kingdom bilong heven i klostu pinis.’ Yu save dispela Kingdom em i wanem samting? Em i wanpela gavman tru bilong God. Jisas em i King bilong en. Em bai mekim wok king long heven na kamapim gutaim long graun. Kingdom bilong God bai mekim olgeta hap bilong graun i kamap Paradais.

Jisas i stap long maunten na em i skulim ol man long dispela Kingdom. Em i tok, ‘Yupela i mas beten olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Laik bilong yu i ken kamap long graun olsem i kamap long heven.” ’ Planti man i kolim dispela beten olsem ‘Beten Bilong Bikpela.’ Sampela i kolim olsem ‘Papa Bilong Mipela.’ Yu inap kolim olgeta tok bilong dispela beten?

Na tu, Jisas i skulim ol manmeri long pasin ol i mas mekim long ol narapela. Em i tok: ‘Olgeta pasin yupela i laik bai ol i mekim long yupela, ol dispela pasin tasol yupela i mas mekim long ol.’ Yu laik bai ol man i mekim gutpela pasin long yu, a? Olsem na Jisas i tok yumi mas mekim gutpela pasin long ol narapela. Taim graun i kamap Paradais, olgeta man bai mekim gutpela pasin tasol. Dispela i gutpela samting bilong amamas long en, a?