Ol Man Husat i Kamap Disaipel Bilong Jisas

HUSAT em i nambawan gutpela wokman bilong God?— Yu tok stret, em Jisas Krais. Yu ting yumi inap bihainim pasin bilong em?— Baibel i tok em i stap olsem gutpela piksa yumi ken bihainim. Na em i singautim yumi long kamap disaipel bilong em.

Yu save long ol samting yumi mas mekim bilong i stap disaipel bilong Jisas?— I gat planti samting yumi mas mekim. Pastaim yumi mas kisim skul long em. Tasol i no dispela samting tasol, nogat. Yumi mas bilip tru long ol tok bilong em. Sapos yumi mekim olsem, yumi bai mekim ol samting em i tokim yumi long mekim.

Planti man i tok ol i bilip long Jisas. Yu ting olgeta bilong ol i disaipel tru bilong em?— Nogat, planti bilong ol i no disaipel tru. Ating ol i save go long lotu. Tasol planti bilong ol i no bin lusim haptaim bilong kisim save long ol samting Jisas i bin skulim ol man long en. Em nau, ol man i bihainim pasin bilong Jisas, ol tasol i disaipel bilong em.

Yumi ken stori long sampela man husat i disaipel bilong Jisas taim em i bin stap olsem man long graun. Wanpela bilong ol namba wan lain i kamap disaipel bilong Jisas em Filip. Filip i go painim pren bilong em Nataniel (narapela nem bilong em Bartolomyu), long piksa yu inap lukim em i sindaun aninit long diwai. Taim Nataniel i kam long Jisas, Jisas i tok: ‘Lukim, dispela em i man bilong mekim tok tru, em i man tru bilong Israel.’ Nataniel i kirap nogut na em i askim: “Olsem wanem na yu save long mi?”

Jisas i tok: “Taim Filip i no singautim yu yet, mi lukim yu i stap long as bilong diwai fik.” Nataniel i kirap nogut tru olsem Jisas i save long wanem hap stret em i bin stap long en, olsem na Nataniel i tok: “Yu Pikinini Bilong God. Yu King bilong Israel.”—Jon 1:49.

Sampela arapela i bin kamap disaipel bilong Jisas wanpela de paslain long Filip na Nataniel. Em Andru na brata bilong em Pita, na Jon na ating brata bilong em Jems. (Jon 1:​35-51) Tasol bihain liklik, ol dispela 4-pela man i go bek long mekim wok bisnis bilong ol long kisim pis. Orait wanpela taim, taim Jisas i wokabaut long nambis bilong raunwara Galili, em i lukim Pita na Andru i tromoi umben long wara. Jisas i singaut i go long ol: “Yutupela kam bihainim mi.”

Jisas i wokabaut i go liklik moa na em i lukim Jems na Jon. Ol i stap long bot wantaim papa bilong ol, na ol i wok long stretim ol umben bilong kisim pis. Jisas i singautim ol tu long bihainim em. Yu bai mekim wanem sapos Jisas i bin singautim yu? Wantu bai yu go bihainim em?— Ol dispela man i save Jisas em i husat. Ol i save olsem God i bin salim em i kam. Olsem na wantu tasol ol i lusim wok bilong kisim pis na ol i bihainim Jisas.—Matyu 4:​18-22.

Taim ol dispela man i kamap disaipel bilong Jisas, yu ting dispela i makim olsem long olgeta taim bihain ol i mekim stretpela pasin?— Nogat. Ating yu inap tingim olsem ol dispela man i bin tok pait namel long ol yet long husat bilong ol em i nambawan. Tasol ol i harim tok bilong Jisas, na ol i redi long senisim tingting na pasin bilong ol. Sapos yumi redi long senisim pasin bilong yumi, yumi tu inap kamap disaipel bilong Jisas.

Jisas i singautim olgeta kain man long kamap disaipel bilong em. Wanpela taim, wanpela yangpela maniman i kam long Jisas na askim em long olsem wanem em inap kisim laip oltaim. Taim maniman i tok olsem em i bin bihainim ol lo bilong God kirap long taim em i pikinini yet, Jisas i tokim em: “Yu kam bihainim mi.” Yu save wanem samting i kamap?—

Dispela man i bel hevi tru taim em i harim olsem em i bikpela samting moa long i stap disaipel bilong Jisas, winim pasin bilong bungim planti mani kago. Em i no kamap disaipel bilong Jisas, long wanem, em i laikim tru mani bilong em, winim God.—Luk 18:​18-25.

Jisas i autim tok klostu wan na hap yia pinis, na bihain em i makim 12-pela disaipel long kamap olsem ol aposel bilong em. Ol aposel em ol man Jisas i salim ol i go bilong mekim narakain gutpela wok. Yu save long nem bilong ol?— Yumi ken traim long lainim nem bilong ol. Lukim piksa bilong ol long hia, na traim long kolim nem bilong ol. Orait nau traim long kolim nem bilong ol long tingting.

Bihain, wanpela bilong ol 12-pela aposel em i kamap man nogut. Em Judas Iskariot. Bihain ol i makim narapela disaipel long kisim ples bilong em na kamap aposel. Yu save long nem bilong em?— Em Matias. Bihain, Pol na Barnabas tu ol i kamap aposel, tasol ol i no insait long lain bilong 12-pela aposel.—Aposel 1:​23-26; 14:​13, 14.

Olsem yumi bin lainim long Sapta 1 bilong dispela buk, Jisas i tingim tru ol liklik pikinini. Bilong wanem em i mekim olsem?— Long wanem, em i save olsem ol tu inap kamap disaipel bilong em. Ol pikinini inap mekim tok long pasin i kirapim ol bikpela manmeri long putim yau na laik long kisim sampela save moa long Bikpela Tisa.

Planti meri tu ol i bin kamap disaipel bilong Jisas. Sampela i bin raun wantaim em taim em i go long ol narapela taun long autim tok. Maria bilong Makdala, Joana, na Susana ol i bin mekim olsem. Ating ol i bin kukim kaikai bilong em na wasim klos bilong em.—Luk 8:​1-3.

Olsem wanem? Yu laik kamap disaipel bilong Jisas?— Tingim, sapos yumi tok yumi disaipel bilong em, dispela i no mekim na yumi kamap disaipel. Yumi mas mekim pasin i soim olsem yumi disaipel bilong Krais long olgeta hap yumi stap long en, na i no long ol miting Kristen tasol, nogat. Yu inap tingim sampela hap we em i bikpela samting long yumi mas mekim pasin olsem disaipel bilong Jisas?—

Yes, yumi mas mekim olsem long haus. Na narapela hap em skul. Samting yu na mi i no ken lusim tingting long en i olsem: Bilong i stap disaipel tru bilong Jisas, yumi mas bihainim pasin bilong em long de olgeta, maski yumi stap long wanem wanem hap.