“Em i Winim Olgeta Narapela Nius”

EM TOK bilong wanpela pas i stori long nius Kirap! Long 1992 dispela pas i kam long brens-ofis bilong ol Witnes Bilong Jehova long Naijiria, na pas i tok:

‘Mi save wok wantaim ol man i wokim wanpela nius (Eko), na dispela nius em hap nius bilong nambawan nius (Newswatch) bilong Naijiria em planti man i save kaunim. Mi no wanpela Witnes tasol mi bin kirap kaunim nius Kirap! long 1985. Hap asde long ples wok mi lusim Kirap! tok Inglis bilong Epril 22, 1991, long tebol bilong mi taim mi laik mekim liklik wok.

‘Wanpela wanwok bilong mi i kisim na em i laik lukim ol bikpela tok tasol bilong wan wan stori insait long en, tasol taim em i lukim em i tromoi bikpela hap taim liklik long kaunim ol stori i kamapim tok long pasin bilong katim marit. Bihain narapela i kisim nius long wanwok bilong mi, na bihain narapela i kisim long em, i go i go. Wanpela bilong ol dispela meri i kaunim Kirap!, em bilong misin Otodoks Kristen, na em i tokim mi, bipo em i no laik kisim Kirap!, tasol em i kirap nogut long lukim ol gutpela stori insait long en. Em i askim mi long rot bilong kisim nius Kirap! long olgeta taim. Narapela wanwok i tokim mi long givim ol nius long em taim mi kaunim pinis.

‘Mi no laik kamap wanpela Witnes, tasol mi amamas tru mi kisim ol nius Kirap! i kam inap long nau. Olsem na mi tok amamas long yupela, long wanem, yupela i save wokim wanpela nius i winim olgeta narapela nius.’

Winim 4 milion Witnes Bilong Jehova i stap long olgeta hap na ol i wok strong long helpim olgeta man long save long ol samting God i laik mekim.

Sapos yu laik kisim sampela save moa, o yu laik bai wanpela man i lainim yu long tok bilong Baibel long haus bilong yu yet, no gat pe, salim pas na toksave long I.B.S.A., Box 636, Boroko, N.C.D., o lukim atres i stret long yu long pes 5.