Narapela Kain Maunten Ais Long Ajentina
“YU MAS go na lukim.” “Em nambawan samting tru.” Ol i bin salim mipela i go long Buenos Ares bilong helpim ol man long wokim ol nupela haus samting bilong Sosaiti Was Taua. Tasol taim ol man i tokim mipela long dispela maunten ais, mitupela man bilong mi i bin go long hap saut bilong Ajentina bilong lukim. Nem bilong dispela narapela kain maunten ais em Perito Moreno.
Mipela kamap long ol maunten Andis, em ol diwai i karamapim as bilong en. Rot i ran arere long wara Rico na dispela wara i ran i go long Raunwara Ajentino. Bihain mipela kamap long pinis bilong wanpela poin bilong dispela raunwara, na long dispela hap wara i save ran long baret na go insait long raunwara. Namel long dispela baret mipela lukim Perito Moreno, em dispela maunten ais. Em traipela banis ais—braitpela bilong en i winim 4-pela kilomita, na longpela bilong en i go antap i winim 50 mita. Olaman! Mipela kirap nogut tru long lukim dispela samting!
Dispela maunten ais i save wokabaut isi isi long wara inap 5-pela mita long wanpela de o 460 mita long wanpela yia! Mipela kisim ol piksa taim strong bilong san i holim ais na ais i lait long dispela blupela maunten. Olsem wanem na maunten ais i blupela? Ais i hevi na i no gat liklik hap win i stap insait long en, olsem na ais i kisim blupela kala olsem blupela glas. Na mipela harim ol narapela kain pairap. Dispela 195 skwea kilomita maunten ais i wokabaut isi isi i go, na taim em i mekim olsem ol bikpela hap ais i bruk bruk na pundaun long wara. Taim ol i paitim wara, pairap bilong en i olsem pairap bilong klaut.
Perito Moreno i wokabaut i go, olsem na sampela yia em i pasim rot na wara Rico i no inap ran i go insait long Raunwara Ajentino. Olsem na long wanpela hap, wara Rico i go antap long mak tru bilong en olsem 20 i go inap 35 mita. Taim wara i mekim olsem, strong bilong wara i wok long sutim dispela maunten ais na em i bruk bruk na wara i sut i go namel long ol hap i bruk.
Nau raunwara i no slip isi, em bikpela si i kamap long en na planti aua liklik em i stap olsem. Wanpela stori (La Guerra Del Hielo) bilong televisen i tok: ‘Ol traipela hap hap bilong ais i winim longpela bilong haus i gat 15 plua na i wok long bruk bruk na pundaun long wara. Na taim em i mekim olsem, pairap i no liklik. Olgeta man i lukim dispela samting i save singaut na kalap kalap, long wanem, ol i lukim narapela kain strong.’
Mipela i amamas tru long ol pren bilong mipela i strong long mipela i mas go na lukim dispela maunten ais Perito Moreno.—Wanpela meri i salim dispela stori i kam.