Stori Bilong Aiskrim

AISKRIM i no nupela samting, bipo tru ol man i bin kaikai. Tasol aiskrim bilong nau i winim aiskrim bilong bipo. Ol Rom bilong bipo i bin wokim wanpela kain kaikai long ais ol i kolim sobet, na sampela taim ol maniman i bin kaikai. Ol i bin wokim sobet long ais na prut na hani. Inap longpela taim liklik ol man i bin wok long mekim sobet i kamap gutpela moa. Ol Arap bilong bipo i gat save long kukim kaikai, ol i bin wokim sobet i kamap nambawan. Ol man i ting dispela tok ‘sobet’ i kam long tok ples Arap.

Bikpela hap bilong sobet em wara, na ating yumi ken tok sobet i as na yumi gat aiskrim long nau. Aiskrim i kirap taim ol man i tanim susu na kiau na suga wantaim na dispela i kamap olsem strongpela susu. Sapos yu bin stap long yia 1643 samting long haus bilong King Luis Namba 14 bilong Frans, bai yu lukim namba wan taim ol man i kaikai aiskrim. Long dispela taim ol dokta na ol saveman i gat tupela tingting long aiskrim​—i gutpela samting bilong helpim bel o nogat.

Olsem wanem ol man bilong bipo inap wokim aiskrim, long wanem, ol i no gat masin bilong wokim? Bipo ol i bin mekim wok long tupela baket ol i bin wokim long diwai o kapa, na wanpela baket i save sindaun insait long narapela. Ol i bin wokim aiskrim insait long liklik baket, na namel long tupela baket ol i bin putim ais na sol. Ol samting bilong wokim aiskrim ol i tanim wantaim na lusim i stap insait long baket. Nau aiskrim i redi. Tasol ol i kisim ais we? Sampela handet yia bipo ol man i kisim save olsem: Sapos ol i bungim ais long taim bilong bikpela kol na putim insait long wanpela hul insait long graun, ais bai go strong na em i no kamap wara. Na antap long hul ol i bin karamapim kunai na sampela han bilong diwai yar. Long yia 1834 ol man i kisim save long wokim masin bilong kamapim ais na ol i kirap na wokim planti. Long haus ol man i bin putim ais insait long wanpela bokis ol i bin wokim long diwai na long wanpela samting ol i kolim cork.

Long nau ol man i bin skelim na stretim pasin bilong wokim aiskrim. Nau i gat frisa na masin bilong wokim aiskrim na sampela samting moa, olsem na i no hatwok long ol faktori i wokim aiskrim o meri i wokim long haus bilong em. Na nau ol man i gat save long wokim aiskrim long klinpela pasin.

Pasin Bilong Wokim Aiskrim

Man bilong wokim aiskrim i mas save tru long pasin bilong wokim. Na em i mas save long kukim ol switpela kaikai i gat suga long en, na save long pasin bilong bilasim kaikai, na sampela samting moa. Wanem samting i mekim na aiskrim i kamap olsem strongpela susu na i swit moa? Orait, yumi ken tingim aiskrim ol i wokim long faktori. Bilong mekim aiskrim i kamap strong, ol i save kapsaitim wara bilong sampela kain sayor na wanpela kain gris na tanim wantaim aiskrim. Na ol i skelim gut hamas kiau na suga ol bai putim, na sapos ol i laik kala bilong aiskrim i narapela kain, ol i save putim kopi o kakau o prut o sampela samting moa olsem pinat-bata.

Taim ol i tanim gut olgeta samting bilong wokim aiskrim, nau ol i hatim long 70 digri Selsias. Bihain ol i hatim long 90 digri Selsias. Ol i mekim olsem bilong kilim ol jem, nogut jem i stap insait long aiskrim. Ol i larim aiskrim i go kol inap long 4 digri Selsias, na em bai stap olsem sampela aua inap long em i go strong liklik. Nau kwiktaim ol i daunim hat na i go long mak bilong kol tru, na taim ol i mekim olsem ol i save tanim isi isi aiskrim bilong larim win i go insait long aiskrim, olsem na aiskrim i no hevi, em i kamap olsem strongpela susu. Nau ol i putim long frisa.

Planti handet yia i go pinis taim ol Rom i bin amamas long kaikai sobet na ol man i bin amamas long kaikai aiskrim long haus bilong King Luis Namba 14. Tasol taim yu amamas long kaikai sobet o aiskrim yu laikim tumas, tingim ol Rom bipo na amamas long ol i bin kisim tingting long wokim dispela nambawan kaikai!