Tingting Bilong Yu Inap Kamap Gutpela Moa
“Mi no inap holim planti samting long tingting bilong mi.” Yu bin tok olsem? Sapos olsem, yu no ken bel hevi. Wok strong long bihainim dispela tok nau mipela kamapim na ating tingting bilong yu inap kamap gutpela moa. Yu no ken ting kru i no inap wok gut. Em inap mekim bikpela wok moa yet.
OLSEM wanem kru i save mekim bikpela wok bilong en? Bipo ol saveman i no bin glasim kru olsem ol i save mekim long nau. Tasol maski ol i wok long kisim sampela save moa long wok bilong kru, ol i no save tumas long kru i wok olsem wanem.
Ol i no save olsem wanem yumi lain na bungim ol save na kru inap tingim bek ol samting, tasol ol saveman i wok yet long kisim save long dispela samting. Bilong kru i ken lain na tingim ol samting, inap olsem 10 bilion i go inap 100 bilion liklik rop wailis i save wok insait long kru. Tasol i gat planti tausen milion liklik rop i pas long ol rop wailis na ol narapela liklik hap bilong kru. Sampela i tok, taim ol dispela liklik rop wailis samting i mekim wok, dispela i save strongim ol, na nau kru i wok long kisim save.
Taim yumi go lapun ating yumi hatwok long holim planti samting long tingting; yumi no inap tingim kwik wanpela samting yumi mas mekim. Ol liklik sel insait long kru i no save kamap nupela gen long olgeta taim, na sampela sel bilong man i wok long lus long olgeta taim. Sapos olgeta taim yumi mekim wok long kru, tingting inap holim planti samting inap longtaim.
Tingting bilong yumi long ol samting, em i gat strong long stiaim kru. Olsem: Maski yumi lapun o yangpela, kru bai wok gut sapos olgeta taim yumi amamas na yumi ting gutpela samting tasol bai kamap long wok yumi mekim. Sapos sampela taim yumi tingting planti long wanpela samting, ating em inap helpim kru, tasol sapos yumi tingting planti oltaim oltaim, kru i no inap wok gut. Na pasin bilong wokim skin olsem eksasais, em inap helpim yumi sapos yumi tingting planti long wanpela samting.
Em ol gutpela tok, tasol ating yumi save lusim tingting long sampela bikpela samting maski yumi lapun o yangpela, a? Olsem wanem? Yumi ken stretim dispela hevi? Ating planti bilong yumi i hatwok long tingim nem bilong ol man yumi save bungim, a?
Tingim Nem Bilong Man
Sampela liklik samting em inap helpim yu long tingim gut ol nem, em i olsem: Taim yu bungim wanpela man, yu mas laik long save long em. Nem i bikpela samting long man. Planti taim yumi no inap tingim nem bilong man, long wanem, pastaim yet yumi no bin klia gut long nem bilong em. Olsem na taim yu bungim man na wanpela i kolim nem bilong em, kisim gut dispela nem. Sapos yu no kisim gut nem, askim em long kolim gen o askim em—em i raitim nem bilong em olsem wanem. Taim yu toktok wantaim man, mekim wok planti taim long nem bilong em. Taim yu tok gutbai long em, kolim gen nem bilong em. Ating bai yu kirap nogut long olsem wanem dispela bai helpim yu.
Narapela samting em inap helpim yu long tingim gut ol nem, em long wokim wanpela piksa long tingting i stret long nem bilong man yu laik tingim. Na yu bai tingim gut nem bilong em sapos long tingting yu inap lukim dispela man yet i mekim wanpela samting.
Olsem: Wanpela meri i hatwok long tingim namba wan nem bilong wanpela meri em i save liklik long em, nem bilong em Rose. Olsem na taim em i bungim dispela meri, em i bin tingim “rose” i olsem nem bilong “wanpela plaua.” Long tingting bilong em, em i lukim dispela meri i sanap long wanpela gaden plaua i gat ol “rose” i stap. Em nau, olgeta taim em inap tingim nem bilong dispela meri; wantu tasol nem Rose i bin kamap long tingting bilong em.
Ating long yu planti nem i no gat insait bilong en, olsem na yu mas tingim narapela samting i wankain liklik long dispela nem. I no bikpela samting sapos nem yu tingim i no wankain olgeta long nem yu laik kolim. Tingting bilong yu inap tingim nem bilong man sapos yu tingim wanpela nem o samting i wankain liklik long nem. Na sapos yu yet yu tingim sampela tok na wokim ol piksa long tingting bilong yu, bai yu tingim gut ol samting.
Yu mas traim dispela pasin planti taim—no ken les. Em bai helpim yu. Long buk bilong em, Harry Lorayne i stori long dispela pasin, na em yet i bin mekim wok long en taim em i toktok planti taim long ol man. Em i tok: “Planti taim mi bin bungim 100 man i go inap 200 man insait long 15 minit samting, tasol mi bin tingim nem bilong olgeta wan wan!”—How to Develop a Super-Power Memory.
Yu Ken Tingim Lista Olsem Wanem
Olsem wanem yu ken tingim planti samting long wanpela lista ol i narapela narapela kain? Wanpela rot em pasin bilong tingim olsem wanem wanpela samting i save poromanim narapela samting. Olsem: Long tingting yu ken wokim piksa long wan wan samting, na tingim olsem wanem namba wan samting long lista i poroman wantaim namba 2 samting, na olsem wanem namba 2 samting i poroman wantaim namba 3 samting, i go i go.
Olsem: Sapos yu mas baim 5-pela samting long supamaket olsem susu, bret, lait-glop, anian, aiskrim, orait, pastaim poromanim susu wantaim bret. Nau tingim ol i bin pulapim susu i go insait long bret na man i holim bret na kapsaitim susu i go daun. Tru, dispela samting yu tingim i no inap kamap tru, tasol em bai helpim yu long tingim bret na susu. Na i gutpela sapos long tingting, yu lukim yu yet i mekim dispela wok long holim bret na kapsaitim susu i go daun.
Orait, bihain long yu tingim susu i poroman wantaim bret, tingim namba 3 samting—em lait-glop. Nau yu ken tingim bret i poroman wantaim lait-glop, na bilong helpim yu long wokim piksa long tingting, tingim olsem yu wok long putim bret i go insait long hap bilong lait yu save skruim lait-glop long en. Nau lait-glop i mas poroman wantaim anian. Orait, tingim olsem lait-glop em i wanpela anian na yu laik rausim skin bilong en, na taim yu mekim olsem, aiwara i pundaun. Olsem wanem? Yu inap tingim olsem wanem ol dispela samting i poroman wantaim laspela samting—em aiskrim? Ating yu ken tingting olsem yu kaikai wanpela aiskrim ol i bin wokim long anian!
Orait, mekim traim long kolim olgeta samting long lista. Nau mekim traim long tingting bilong yu long kolim wanpela lista bilong yu yet. Hamas samting yu laik i stap long lista bilong yu, em samting bilong yu. Bilong tingim gut olsem wanem olgeta wan wan samting yu bin raitim long lista i poroman wantaim, tingim sampela samting i pani o i narapela kain stret. Na no ken tingim nating, i gutpela sapos wanpela samting i mekim samting long narapela samting.
Ating sampela bai tok, ol i mas tromoi bikpela hap taim long bihainim dispela kain pasin, na pasin bilong tingim bek tasol ol samting i stap long lista, em i no hatwok olsem. Tru, bikpela hap taim i lus long stori long dispela samting, tasol bilong mekim wok long en, nogat. Taim yu traim traim long bihainim dispela pasin, yu bai tingim kwik ol samting na olsem wanem wanpela samting i poroman wantaim narapela samting, na yu bai tingim bek ol samting, na kisim kwik save. Tasol sapos yu no bihainim wanpela kain pasin olsem, ating tingting bilong yu i no inap kamap gutpela moa. Wanpela lain i bin kolim nating 15 samting long wanpela lista, na ol i bin askim 15 man long tingim ol dispela samting na kolim gen. Ol i kolim stret 8-pela tasol. Tasol taim ol i askim ol dispela wankain man long kolim 15 narapela samting, tasol nau ol i mas wokim piksa long tingting bilong tingim ol dispela samting na kolim, ol i kolim stret 14 samting. Tru, sapos yu no lusim tingting long kisim lista i go wantaim yu long stua, bai yu tingim stret olgeta 15 samting!
Holim Long Tingting Samting Yu Kaunim
Long nau i gat planti planti samting yumi inap kaunim, tasol planti bilong yumi i mas kisim save long rot stret bilong stadi gut. Stadi em i bikpela samting long skul, wok bisnis, bilong helpim yumi yet, na long toktok long ai bilong planti man. Na tu, Kristen i mas makim hap taim bilong em yet i ken stadi long Baibel.—Jon 17:3.
Ating bai yu tok: ‘Tasol mi hatwok long holim long tingting ol samting mi bin stadi long en.’ Orait, yu ken mekim wanem? Sapos yu mekim gutpela wok long taim bilong stadi, dispela bai helpim yu long holim long tingting ol samting yu kaunim. Sampela samting bilong helpim yu i olsem:
Taim yu laik stadi, yu yet mas stretim gut olgeta samting—dispela i bikpela samting. Putim ol buk, pepa, pensil samting i redi i stap na bai i no hatwok long kisim. I gutpela long stadi long wanpela hap i gutpela bilong sindaun long en, na i gat gutpela lait, na i no gat planti pairap samting. Pasim redio na televisen.
Long olgeta taim yu mas stadi long wankain taim. Sampela i save stadi inap sotpela taim long olgeta de, na ol i ting dispela i winim pasin bilong sindaun longtaim na stadi. I gutpela long hapim taim bilong yu. Yu no ken stadi i go i go inap 2-pela aua, no gat malolo; mobeta yu makim olsem 25 i go 40 minit bilong stadi na bihain yu malolo sampela minit; mekim olsem i go i go inap long yu inapim pinis taim yu bin makim bilong stadi. Ol saveman i tok, ol man i bihainim dispela kain pasin long stadi, ol inap tingim bek planti samting moa ol i bin stadi long en.
Tingim wanem ol samting yu laik stadi long en long dispela taim yu bin makim. Dispela inap helpim yu long putim gut tingting long samting yu laik stadi long en. Taim yu laik kirap na stadi long wanpela buk, pastaim skelim dispela buk inap liklik taim. Lukim het-tok bilong en. Na lukim lista bilong ol stori i stap insait long buk. Bihain kaunim ol tok i go pas long buk. Ating long dispela hap bai yu kisim tingting bilong man i bin raitim buk.
Pastaim long yu kaunim wanpela sapta lukim ol liklik het-tok insait long ol sapta, na ol piksa, na mep, na lista, na tok bilong namba wan paragraf na tok bilong laspela paragraf. Lukim tasol namba wan sentens bilong olgeta wan wan paragraf. Planti taim ol dispela sentens i save stori long bikpela tok bilong paragraf. Olsem na taim yu laik kirap na stadi long buk, kisim sampela save long buk pastaim. Askim yu yet olsem: ‘Man i bin raitim dispela buk em i laik bai mi save long wanem ol samting? Dispela buk inap helpim mi olsem wanem? Wanem ol bikpela tok bilong dispela buk?’
Putim gut tingting long samting yu laik stadi long en—em bikpela samting. Yu mas givim bel long stadi. Sapos yu laik bai stadi i helpim yu, wokim strong tingting bilong yu taim yu stadi, nogut dispela hap taim i lus nating. Tingim ol samting dispela save bai helpim yu long en na nau bai yu amamas long stadi. Wokim piksa long tingting bilong yu. Na sapos yu kaunim buk na em i stori long wanpela samting, orait, long tingting bilong yu tingim olsem yu smelim dispela samting, o pilim swit bilong en, o han bilong yu i holim.
Taim yu kisim gut ol samting yu bin kaunim, nau yu redi long raitim ol tok. Sapos yu raitim gut ol tok, dispela bai helpim yu long kisim kwik save na long tingim bek ol samting yu bin kaunim. Nogut yu raitim planti tok—raitim ol bikpela tok tasol, em ol samting bai helpim yu long tingim bek ol bikpela tok bilong buk.
Taim yu kisim gut ol tok, i no olsem bihain bai yu inap tingim bek olgeta samting yu bin lain long en, nogat. Ol save yu bin kisim, bihain long 24 aua inap 80 pesen bilong en, em inap lus inap liklik taim. Ating dispela inap mekim na yu ting wok bilong yu i no inap kamap gutpela, a? Tasol sapos yu lukluk bek long ol samting yu bin kaunim, sampela tok o bikpela hap bilong ol dispela tok yu bin kaunim, yu inap tingim gen. Long olgeta taim yu stadi, inap sampela minit lukluk bek long ol samting yu bin stadi long en. Na sapos yu inap, mekim wankain samting wanpela de bihain, na wanpela wik bihain, na wanpela mun bihain. Sapos yu bihainim dispela pasin, ating dispela bai helpim yu long kisim gut ol tok yu stadi long en na holim gut long tingting ol samting yu bin kaunim.
Olsem na yu no ken ting kru bilong yu i no inap holim planti samting, em inap. Yu inap helpim tingting long mekim gutpela wok moa. Wanpela saientis i stori long kru olsem: “Inap long nau, i no gat wanpela samting mipela painim pinis long antap na long graun i winim kru—i hatwok tumas long save long en.” Kru i save litimapim narapela kain bikpela save na strong bilong Man i bin wokim, em Jehova.—Song 139:14.
[Sat long pes 28]
Bilong tingim ol samting i stap long lista, bihainim pasin bilong poromanim wanpela samting wantaim narapela samting: Wokim piksa bilong wan wan samting long tingting bilong yu. Nau poromanim namba 1 samting wantaim namba 2 samting i go i go
Lista:
1. Susu 1 na 2 i poroman
2. Bret 2 na 3 i poroman
3. Lait-glop 3 na 4 i poroman
4. Anian 4 na 5 i poroman
5. Aiskrim