Stadi 2

Pasin Bilong Kaunim na Tingim Gut Tok

¹ Ol Kristen i save kaunim tok bambai ol i ken save gut long Jehova na autim tok bilong em. (Lo 17⁠:19) Ol i save, tok bilong Baibel inap bringim man long laip oltaim.

² Taim yumi kaunim tok i olsem yumi kisim kaikai. Sapos yumi kisim kaikai nogut, bai skin bilong yumi i no ken strong. Sapos yumi kaunim tok nogut, bai yumi no ken strong long spirit. Yumi no ken kaunim tok i stori long pasin nogut o i toknogutim God.​—⁠Fl 4⁠:⁠8.

³ Sedyul bilong kaunim tok. Yumi mas i gat sedyul. Yumi ken makim 10 o 15 minit bilong olgeta de na yumi kaunim sampela tok. Yumi ken mekim long moningtaim o long apinun. Sampela famili i save kaunim tok inap 5 o 10 minit taim ol i kaikai pinis o taim ol i laik i go long slip.

⁴ Insait long sedyul, yumi mas makim taim bilong kaunim tok bilong Baibel. Gutpela sapos yumi kaunim olgeta tok bilong Baibel. Yumi no ken kaunim nating; yumi mas tingim gut ol dispela tok.

⁵ Yumi mas kaunim ol tok bilong Stadi Wastaua na bilong Miting Bilong Wok na bilong Skul Bilong Wok Autim Tok. Yumi no kaunim bilong katim bekim tasol; nogat; yumi mas kaunim gut bambai yumi pilim gut as bilong ol dispela tok na yumi ken bihainim. Gutpela sapos yumi kaunim olgeta buk bilong Sosaiti ol i bin wokim long tok ples bilong yumi.

⁶ Taim yumi kaunim sampela tok, yumi mas tingim gut dispela tok; nogut bihain yumi lusim tingting long en. Taim yumi kaunim, yumi ken kolim long maus tu. Em bai helpim yumi long tingim gut dispela tok. (Sng 1⁠:⁠2) Na taim yumi kaunim tok, yumi ken katim ol bikpela tok. Tasol nogut yumi katim bikpela hap tok tumas. Sapos yu lukim sampela gutpela tok bilong kamapim taim yu autim tok, yu ken raitim pes na paragraf bilong dispela tok long baksait bilong buk.

⁷ Taim yumi kaunim tok, yumi ken wok long painim ol gutpela lo bilong helpim yumi long bihainim stretpela pasin. Taim yu laik kaunim wanpela buk bilong Sosaiti, pastaim lukim nem bilong buk na nem bilong ol sapta bilong buk na tingim ol dispela tok. Wok long painim ol bikpela tok bilong ol paragraf.

⁸ Taim yu kaunim tok, tingim dispela tok olsem yu lukim wanpela piksa. Taim yu kaunim pinis hap tok, tingim bek ol dispela tok yu kaunim pinis. Gutpela sapos yu tokim narapela man long ol tok yu bin kaunim, olsem bai yu no ken lusim tingting long dispela tok. Taim yumi autim tok, yumi ken kamapim ol nupela tok yumi bin kaunim.

⁹ Sapos yumi kaunim na tingim gut ol tok, bai yumi kamap strong long spirit. Em bikpela samting. Ol papamama i mas helpim ol pikinini bambai ol inap kaunim gut tok. Sapos yu no save gut long kaunim tok, gutpela sapos long olgeta de inap 15 o 30 minit yu kaunim sampela tok, mekim mekim na bai yu inap kaunim gut tok.

¹⁰ Sapos yumi bihainim olgeta tok bilong dispela stadi, bai yumi inap autim gut tok. God i putim ol gutpela tok long Baibel bilong helpim ol man long tingim gut ol bikpela wok em i bin mekim. (Sng 78⁠:​5-7) Sapos yumi kaunim na tingim gut tok bilong Baibel, God bai save yumi laikim tumas gutpela pasin bilong Em.