Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w00 10/1 p. 8-12
  • Kaunim Baibel—Em i Save Helpim na Amamasim Yumi

No gat vidio bilong dispela seksen.

Sori, popaia kamap long lodim vidio.

  • Kaunim Baibel—Em i Save Helpim na Amamasim Yumi
  • Wastaua i Tokaut Long Kingdom Bilong Jehova—2000
  • Ol Liklik Het Tok
  • Wankain Infomesen
  • Ol Wasman i Mas Kaunim Baibel
  • Ol Yangpela na Lapun
  • Kaunim Baibel​​—⁠Putim i Go Pas
  • Pasin Yu Mekim Long Kaunim Baibel i Kamapim Wanem Samting?
  • Pasin Bilong Kaunim Baibel
  • Amamas Long Kaunim Baibel
  • Kaunim Baibel Long Olgeta De—Dispela Bai Helpim Yu
    Wastaua i Tokaut Long Kingdom Bilong Jehova—1995
  • Wok Strong Long Pasin Bilong Rit
    Kisim Helpim Long Skul Tiokratik Bilong Autim Tok
  • Pasin Bilong Kaunim na Tingim Gut Tok
    Buk Bilong Skul Bilong Wok Autim Tok
  • Amamas Tru Long Tok Bilong God
    Kisim Helpim Long Skul Tiokratik Bilong Autim Tok
Lukim Moa
Wastaua i Tokaut Long Kingdom Bilong Jehova—2000
w00 10/1 p. 8-12

Kaunim Baibel​—⁠Em i Save Helpim na Amamasim Yumi

“Yu mas . . . kaunim long san na long nait.”​​—⁠JOSUA 1:​8, NW.

1. Pasin bilong kaunim buk, na moa yet pasin bilong kaunim Baibel, em inap helpim yumi olsem wanem?

PASIN bilong kaunim ol gutpela tok inap helpim gut yumi. Wanpela saveman bilong Frans, em Montesquieu (Charles-Louis de Secondat), i tok: ‘Taim mi les long i stap bilong mi, pasin bilong stadi i save helpim mi long daunim dispela tingting. Taim mi bel hevi, pasin bilong kaunim buk inap wanpela aua tasol i save pinisim dispela bel hevi.’ Dispela tok i stret moa yet long pasin bilong kaunim Baibel. Man bilong raitim Song i tok: “Lo bilong Bikpela em i stret olgeta, na i save givim nupela laip long yumi. Tok bilong Bikpela em i samting yumi inap bilip tru long en. Em i save givim gutpela tingting long ol man i no gat planti save. Bikpela i save skulim yumi long gutpela tok tumas. Dispela tok i save mekim bel bilong yumi i amamas.”​​—⁠Song 19:​7, 8.

2. I gat wanem as na Jehova i bin lukautim Baibel kirap long bipo yet i kam inap nau? Em i laik bai lain bilong em ol i mas mekim wanem long Baibel?

2 Inap planti handet yia, ol man bilong gavman na lotu tu ol i bin mekim pasin birua long Baibel, tasol Man bilong kamapim ol tok bilong Baibel, em God Jehova, em i bin lukautim gut Baibel na i stap yet. God i gat laik long “kisim bek olgeta [kain] manmeri, bai ol i ken save long as bilong tok tru,” olsem na em i bin stiaim ol samting na bai olgeta man i gat rot long kisim Tok bilong em. (1 Timoti 2:⁠4) Klostu olgeta manmeri long graun, olsem 80 pesen, ol inap kisim dispela tok long rot bilong 100 tok ples. Ol man inap kisim Baibel olgeta long 370 tok ples, na sampela hap bilong en long 1,860 tok ples moa. Jehova i gat laik long lain bilong em ol i mas kaunim Tok bilong em. Em i save mekim gut long ol wokboi bilong em ol i save tingim gut Tok bilong em na kaunim long olgeta de.​​—⁠Song 1:​1, 2.

Ol Wasman i Mas Kaunim Baibel

3, 4. Jehova i laik bai ol king bilong Israel i mas mekim wanem? I gat wanem ol as na ol i mas mekim olsem na dispela i stret tu long ol elda Kristen long nau?

3 Jehova i tingim dispela taim ol Israel bai kisim wanpela king bilong graun, na em i tok: “Taim em i kamap king, orait em i mas kisim wanpela buk ol i bin raitim ol lo bilong God long en. [Em] i mas bihainim buk bilong lo ol pris bilong Livai i holim, na raitim wankain tok tasol. Em i mas putim dispela buk i stap klostu long em na ritim hap tok long en long olgeta de. Olsem bai em i ken aninit long Bikpela na bihainim tru olgeta lo na tok bilong God i stap long dispela buk. Olsem na bai em i no ken litimapim nem bilong em yet na daunim ol arapela Israel. Na tu, em i no ken kalapim liklik ol lo bilong Bikpela.”​​—⁠Lo 17:​18-​20.

4 Tingim ol as na Jehova i laik bai ol king bilong Israel i mas kaunim buk bilong lo long olgeta de: (1) “bai em i ken aninit long Bikpela na bihainim tru olgeta lo na tok bilong God i stap long dispela buk”; (2) “bai em i no ken litimapim nem bilong em yet na daunim ol arapela Israel”; (3) bai “em i no ken kalapim liklik ol lo bilong Bikpela.” Ol wasman Kristen long nau ol tu i mas aninit long Jehova, na bihainim ol lo bilong em, na ol i no ken litimapim ol yet na daunim ol brata bilong ol o kalapim liklik ol lo bilong Jehova. Pasin bilong kaunim Baibel long olgeta de em i bikpela samting long ol, olsem bipo em i bikpela samting long ol king bilong Israel.

5. Nau tasol, Lain Bilong Bosim Ol Witnes i salim wanem tok bilong kaunim Baibel i go long ol brata bilong ol Komiti Bilong Brens? I gat wanem as na olgeta elda Kristen ol tu i mas bihainim dispela tok?

5 Ol elda Kristen long nau ol i gat planti wok, na dispela i mekim na i hatwok long ol i kaunim Baibel long olgeta de. Ol brata bilong Lain Bilong Bosim Ol Witnes Bilong Jehova na ol brata bilong Komiti Bilong Brens long olgeta hap, olgeta ol i gat planti wok long mekim. Tasol wanpela pas em nau tasol Lain Bilong Bosim Ol Witnes ol i salim i go long olgeta Komiti Bilong Brens em i tok long pasin bilong kaunim Baibel long olgeta de na stadi gut long en. Pas i tok dispela bai helpim yumi long laikim moa yet Jehova na tok i tru, na em “bai helpim yumi long holimpas bilip na amamas na stap strong i go inap long pinis.” Olgeta elda long ol kongrigesen bilong ol Witnes Bilong Jehova ol tu i pilim olsem. Pasin bilong kaunim Baibel long olgeta de bai helpim ol long “bihainim gutpela tingting.” (Josua 1:​7, 8) Pasin bilong kaunim Baibel bai helpim moa yet dispela lain​—⁠em bai ‘skulim ol long tok tru, na stretim ol, na skulim ol long ol pasin i stret.’​​—⁠2 Timoti 3:​16.

Ol Yangpela na Lapun

6. I gat wanem as na Josua i kaunim ol tok bilong lo bilong Jehova long ol lain bilong Israel na ol man bilong ol arapela ples em ol i bung wantaim?

6 Bipo, ol man i no gat Baibel bilong ol yet, olsem na ol i save bung long wanpela hap na harim ol narapela i kaunim tok bilong Baibel. Taim Jehova i helpim Josua long kisim taun Ai, Josua i bungim ol lain bilong Israel klostu long maunten Ebal na maunten Gerisim. Baibel i tok: “Josua i ritim olgeta tok Moses i bin raitim long buk bilong lo. Em i ritim tok bilong God bai i mekim gut long ol sapos ol i bihainim tru tok bilong God, na tu em i ritim tok bilong God bai i bagarapim ol sapos ol i sakim tok bilong God. Josua i ritim olgeta tok bilong lo bilong Moses na olgeta man bilong Israel i harim. Na ol meri na ol pikinini na ol manmeri bilong ol arapela ples, ol tu i stap wantaim ol na ol i harim dispela tok.” (Josua 8:​34, 35) Ol pasin Jehova i laikim na ol pasin Jehova i no laikim, dispela i mas pas strong long bel na long tingting bilong ol yangpela, ol lapun, ol Israel, na ol man bilong ol arapela ples, i olsem ol i raitim long bel bilong ol. Pasin bilong kaunim Baibel long olgeta taim bai helpim yumi tu long dispela samting.

7, 8. (a) Husat long nau i kain olsem “ol manmeri bilong arapela kantri”? Bilong wanem ol i mas kaunim Baibel long olgeta de? (b) Olsem wanem ol “pikinini” namel long lain bilong Jehova i ken bihainim pasin bilong Jisas?

7 Long nau, planti milion wokboi bilong Jehova ol i kain olsem ol dispela “manmeri bilong ol arapela ples” long ol samting bilong spirit. Bipo, ol i bihainim pasin bilong ol man bilong dispela graun, tasol bihain ol i senisim pasin bilong ol. (Efesus 4:​22-​24; Kolosi 3:​7, 8) Oltaim ol i mas tingim ol lo bilong Jehova i makim wanem pasin i stret na wanem pasin i no stret. (Amos 5:​14, 15) Pasin bilong kaunim Tok Bilong God long olgeta de i helpim ol long mekim dispela samting.​​—⁠Hibru 4:​12; Jems 1:⁠25.

8 Na namel long lain bilong Jehova i gat planti “pikinini” em papamama i bin lainim ol long ol lo bilong Jehova, tasol nau ol yet i mas kirap na bilip tru long bel olsem ol lo bilong Jehova i stret. (Rom 12:​1, 2) Ol inap mekim olsem wanem? Long Israel, Moses i tokim ol pris na ol hetman: “Yupela i mas ritim lo long ol arapela Israel . . . Singautim olgeta man wantaim meri na pikinini na ol man bilong arapela kantri i stap long ol taun bilong yupela, bai olgeta i ken kam na harim dispela tok. Ol i ken harim na i stap aninit long God, Bikpela bilong yumi, na bihainim gut olgeta tok bilong em. Yupela i mekim olsem, orait ol tumbuna pikinini bilong yupela i no bin harim lo bilong God, bai ol i ken harim. Na bai ol i ken stap aninit long em.” (Lo 31:​11-​13) Jisas i stap aninit long Lo, na taim em gat 12-pela krismas tasol, em i kamapim klia olsem em i laikim tumas long kisim gut as bilong ol lo bilong Papa bilong em. (Luk 2:​41-​49) Bihain, em pasin bilong em long go insait long haus lotu na harim ol i kaunim tok bilong God na em tu i kaunim. (Luk 4:​16; Aposel 15:21) I gutpela sapos ol yangpela long nau ol i bihainim pasin bilong Jisas na kaunim Tok Bilong God long olgeta de na go oltaim long ol miting, em ples ol i save kaunim na stadi long Baibel.

Kaunim Baibel​​—⁠Putim i Go Pas

9. (a) Bilong wanem yumi mas skelim ol tok yumi laik kaunim? (b) Namba wan edita bilong dispela nius em i tok wanem long ol buk bilong stadi long Baibel?

9 Saveman King Solomon i tok: “Ol man i save raitim planti buk, na dispela kain wok i no gat pinis bilong en. Na sapos yu wok oltaim long stadi, bai skin bilong yu i les olgeta. Olsem na yu mas lukaut long dispela pasin.” (Saveman 12:12) Pasin bilong kaunim planti buk ol i wokim long nau em inap mekim skin i les, tasol i no dispela samting tasol; em inap paulim tingting bilong man. Olsem na yumi mas skelim gut ol tok yumi laik kaunim. Yumi mas kaunim ol buk bilong stadi long Baibel, na yumi mas kaunim Baibel tu. Namba wan edita bilong dispela nius em i tokim ol man i kaunim, olsem: “Yupela i no ken lusim tingting olsem Baibel em i Lo bilong yumi, na ol buk bilong helpim yumi, maski i olsem God i givim long yumi, ol i ‘helpim’ tasol; ol i no senis bilong Baibel.”a Olsem na yumi mas kaunim Baibel, tasol yumi no ken les long kaunim ol buk na nius em Baibel i as bilong en.

10. “Wokboi i gat gutpela tingting” i bin mekim wanem na yumi save pasin bilong kaunim Baibel em i bikpela samting?

10 “Wokboi i gat gutpela tingting” i save dispela em i bikpela samting, olsem na inap planti yia pinis ol i save putim sedyul bilong kaunim Baibel long Skul Bilong Wok Autim Tok. (Matyu 24:45) Pasin bilong nau long kaunim Baibel i olsem: Ol i makim sedyul bilong kaunim Baibel olgeta insait long 7-pela yia. Dispela sedyul inap helpim yumi olgeta, tasol i helpim moa yet ol nupela man ol i no kaunim yet Baibel olgeta. Ol manmeri i go long Wastaua Baibel Skul Bilong Gileat bilong lain long kamap misineri na Skul Bilong Lainim Wok Bilong Lukautim Kongrigesen, na ol nupela bilong famili Betel, ol i mas kaunim Baibel olgeta insait long wanpela yia. Tasol maski wanem wanem sedyul yu bihainim, olsem bilong yu yet o famili olgeta, sapos yu laik bihainim gut dispela sedyul, yu mas putim wok bilong kaunim Baibel i go pas long ol narapela samting.

Pasin Yu Mekim Long Kaunim Baibel i Kamapim Wanem Samting?

11. Olsem wanem yumi inap kisim sampela tok bilong Jehova long olgeta de? Bilong wanem yumi mas mekim olsem?

11 Sapos yu hatwok long bihainim sedyul bilong yu long kaunim Baibel, i gutpela sapos yu askim yu yet: ‘Pasin bilong mi long kaunim buk o lukim TV, dispela inap mekim wanem long pasin bilong mi long kaunim Tok bilong Jehova?’ Tingim tok Moses i raitim​—⁠na Jisas i kolim​—⁠olsem: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Matyu 4:4; Lo 8:⁠3) Yumi mas kaikai bret o narapela kaikai long olgeta de bambai skin i ken i stap strong, na olsem tasol yumi mas kisim sampela tingting bilong Jehova long olgeta de bambai yumi ken i stap strong long ol samting bilong spirit. Yumi inap kisim tingting bilong Jehova long olgeta de long rot bilong kaunim Baibel.

12, 13. (a) Aposel Pita i mekim wanem tok piksa bilong soim olsem yumi mas laikim tumas long kisim save long Tok Bilong God? (b) Olsem wanem tok piksa bilong Pol long susu i narapela kain long tok piksa bilong Pita?

12 Sapos bel bilong yumi i pilim tru olsem Baibel em i “tok tru bilong God,” na i no “tok bilong man,” orait dispela bai helpim yumi long laikim tumas long kisim tok bilong Baibel, wankain olsem nupela pikinini i laikim tumas long dring susu bilong mama. (1 Tesalonaika 2:​13) Aposel Pita tu i mekim tok piksa olsem. Em i tok: “Nupela pikinini em i save laikim tumas susu. Olsem tasol yupela i mas laikim tumas long kisim gutpela susu i kam long God, na i no gat samting nogut i stap long en. Em dispela kain susu i save helpim spirit bilong yupela i kamap bikpela na strongpela long nupela laip God i givim long yupela, na bai yupela i stap gut wantaim God. Yupela i traim pinis pasin Bikpela i save mekim long yumi, na yupela i save, Bikpela i gutpela tru.” (1 Pita 2:​2, 3) Sapos yumi tingim ol samting i bin kamap long yumi na yumi pilim pinis olsem “Bikpela i gutpela tru,” dispela bai helpim yumi long kisim pasin bilong laikim tumas long kaunim Baibel.

13 Tasol tok piksa Pita i mekim long susu long dispela ves em i narapela kain long tok piksa aposel Pol i mekim. Susu tasol em inap long nupela pikinini. Tok piksa bilong Pita i soim olsem Tok Bilong God i gat olgeta samting yumi mas kisim bilong helpim yumi long “kamap bikpela na strongpela” na bai yumi inap kisim laip i stap oltaim. Tasol Pol i mekim tok piksa long susu bilong makim sampela man ol i tok ol i bikpela man pinis long ol samting bilong spirit, tasol ol i no bin kisim strongpela kaikai. Long pas Pol i raitim long ol Hibru Kristen, em i tok: “Yupela i kamap Kristen longpela taim pinis, na inap yupela i wok long skulim ol arapela long ol tok bilong God. Tasol nogat. Yupela i sot long tingting, na ol arapela man i mas skulim yupela gen long ol namba wan hap tru bilong tok bilong God. Yupela i no redi yet long kisim strongpela kaikai. Nogat. Yupela i dring susu i stap yet. Yumi save, ol dispela lain i save dring susu tasol, em ol liklik pikinini. Na ol i no save gut long wanem ol pasin i stret. Tasol strongpela kaikai em i bilong ol man i kamap bikpela pinis. Ol kain man olsem ol i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.” (Hibru 5:​12-​14) Pasin bilong kaunim gut Baibel inap helpim yumi long lainim gut tingting na kirapim yumi long laikim tumas long kisim save long ol samting bilong spirit.

Pasin Bilong Kaunim Baibel

14, 15. (a) Man bilong kamapim ol tok bilong Baibel i laik helpim yumi olsem wanem? (b) Wanem samting yumi ken mekim na bai gutpela tingting na save bilong God i ken helpim yumi? (Kamapim stori bilong sampela man.)

14 Bilong kaunim Baibel na em i ken helpim tru yumi, pastaim yumi mas beten​—⁠no ken kirap kaunim tasol. Beten em i wanpela gutpela samting tru yumi ken mekim. I olsem yumi kirap kaunim wanpela buk i gat ol strongpela tok na yumi singaut long man bilong raitim dispela buk long helpim yumi long kisim gut ol tok yumi laik kaunim. Dispela inap helpim tru yumi, a? Man bilong kamapim ol tok bilong Baibel, em Jehova, em i laik helpim yumi olsem. Wanpela bilong lain bilong bosim ol Kristen bilong pastaim em i tokim ol brata bilong em: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i askim em. Tasol dispela man i mas bilip tru na i beten long God. Em i no ken lusim bilip liklik na i ting olsem, ‘Ating God bai i givim dispela long mi, o nogat?’ ” (Jems 1:​5, 6) Lain Bilong Bosim Ol Witnes long nau ol i wok oltaim long kirapim yumi long kaunim Baibel.

15 Gutpela tingting i olsem man i mekim gutpela wok long ol save em i kisim. Olsem na taim yu no opim yet Baibel, askim Jehova long helpim yu long taim yu kaunim Baibel bambai yu ken save long ol tok yu mas bihainim long i stap bilong yu. Bungim ol nupela samting yu lainim wantaim ol save yu kisim pinis. Wok long tingting long olsem wanem dispela nupela save i stret wantaim “ol dispela gutpela tok” yu kisim save pinis long en. (2 Timoti 1:​13) Tingim gut stori bilong ol wokboi bilong Jehova long bipo, na askim yu yet olsem yu bai mekim wanem sapos kain samting olsem i bin painim yu.​​—⁠Stat 39:​7-9; Daniel 3:​3-6, 16-​18; Aposel 4:​18-​20.

16. Wanem sampela samting yumi ken mekim na bai pasin bilong kaunim Baibel inap helpim yumi moa yet?

16 No ken kaunim Baibel bilong inapim sampela pes tasol. No ken kaunim hariap. Tingim gut ol tok yu kaunim. Taim yu laik save moa long as bilong wanpela tok yu kaunim, lukim ol narapela hap bilong Baibel em ol ves i stap daunbilo tru long pes i makim, sapos Baibel bilong yu i gat. Sapos yu no klia yet, orait raitim long wanpela hap pepa na wok long kisim sampela save moa long en long bihain. Taim yu kaunim, putim mak long ol tok yu laik tingim gen, o raitim long notbuk samting. Yu ken raitim tu sampela hap tok long arere bilong ol pes bilong Baibel. Taim yu lukim sampela ves yu ting bihain yu laik mekim wok long en long wok bilong autim tok na lainim ol man, lukim bikpela tok bilong ves na lukim lista bilong ol tok i stap long baksait bilong Baibel.b

Amamas Long Kaunim Baibel

17. Bilong wanem yumi mas amamas long kaunim Baibel?

17 Man bilong raitim Song i tok, man i amamas tru em “i save laikim tumas lo bilong God, na em i save tingting long dispela lo long san na long nait.” (Song 1:⁠2) Pasin bilong kaunim Baibel long olgeta de i no ken i stap olsem wanpela wok yumi mas mekim tasol, nogat; yumi mas amamas tru long kaunim. Wanpela samting yumi ken mekim na bai yumi amamas long kaunim, i olsem: Yumi mas save long olsem wanem ol samting yumi lain na kisim save long en inap helpim yumi. Saveman King Solomon i tok: “Man i kisim gutpela tingting na save, em i ken amamas tru . . . Gutpela tingting bai i mekim yu belgut oltaim na mekim sindaun bilong yu i kamap gutpela. Gutpela tingting i olsem diwai bilong givim laip. Olsem na ol man i holimpas gutpela tingting, ol i gat laip i gutpela tru na ol i amamas.” (Sindaun 3:​13, 17, 18) Hatwok yumi mekim long kisim gutpela tingting na save em i no inap lus nating, long wanem, em bai mekim yumi belgut, na amamas, na sindaun bilong yumi bai kamap gutpela, na bihain bai yumi inap kisim laip i gutpela tru.

18. Yumi mas kaunim Baibel na mekim wanem samting moa? Bai yumi stori long wanem samting long stori i kamap bihain long dispela?

18 Tru tumas, pasin bilong kaunim Baibel i save helpim na amamasim yumi. Tasol yu ting dispela tasol em inap? Ol lain bilong ol misin i bin kaunim Baibel inap planti handet yia​—⁠ol “i save laikim tumas long kisim skul, tasol ol i no inap kisim save long tok tru bilong God.” (2 Timoti 3:⁠7) Bilong kaunim Baibel na em i ken helpim tru yumi, yumi mas tingting long olsem wanem yumi inap bihainim dispela save long i stap bilong yumi na long wok yumi mekim long autim tok na lainim ol man. (Matyu 24:14; 28:​19, 20) Bilong mekim olsem, yumi mas wok strong na stadi gut, tasol yumi inap amamas na kisim gutpela samting long en, olsem yumi bai lukim long stori i kamap bihain long dispela.

[Ol Futnot]

a Lukim buk Jehovah’s Witnesses​​—⁠Proclaimers of God’s Kingdom, em Sosaiti Wastaua Bilong Nu Yok i wokim, pes 241.

b Lukim Wastaua, Me 1, 1995, pes 16-17, “Bilong Helpim Yu Long Amamas Long Kaunim Baibel.”

Ol Askim Bilong Tingim Gen

• Jehova i tokim ol king bilong Israel long mekim wanem na dispela i stret long ol wasman bilong nau? Bilong wanem i olsem?

• Husat long nau ol i kain olsem “ol manmeri bilong ol arapela ples”? Husat ol i kain olsem “ol pikinini”? Bilong wanem ol i mas kaunim Baibel long olgeta de?

• Lain “wokboi i gat gutpela tingting” i bin mekim wanem bilong kirapim yumi long kaunim Baibel long olgeta taim?

• Yumi ken mekim wanem na bai pasin bilong kaunim Baibel i ken helpim na amamasim yumi?

[Piksa long pes 9]

Ol elda i mas wok strong long kaunim Baibel long olgeta de

[Piksa long pes 10]

Em pasin bilong Jisas long go long haus lotu na kaunim buk bilong God

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim