Amamas Tru Long Tok Bilong God

MAN i laikim tumas lo bilong God, em i ken “amamas tru.” Kain man olsem i “save tingting long dispela lo long san na long nait.” (Sng. 1:1, 2) Yu save amamas olsem? Yu ken mekim wanem na amamas yu kisim long Tok Bilong God i ken go bikpela moa?

Putim Yau Taim Jehova i Toktok

No ken ritim tasol ol tok. Nogat. Wokim piksa long tingting bilong yu long ol samting yu ritim. Tingim olsem yu inap harim nek bilong ol man em toktok bilong ol i stap long Baibel. Taim yu ritim ol sapta long kirap bilong Baibel, tingim olsem yu harim nek bilong Jehova yet taim em i tokaut long ol samting em i mekim pastaim na bihain bilong redim graun bambai man i ken stap long en. Harim Jehova i tokim Pikinini bilong em, em Saveman i Bosim Wok, olsem em i taim bilong wokim man. Long tingting lukim dispela samting i kamap: Adam na Iv i bikhet, God i kotim ol na rausim ol long Paradais. (Stat, sap. 1-3) Yumi pilim pret na yumi laik litimapim nem bilong God taim yumi ritim olsem long heven wanpela maus i singaut olsem Jisas Krais em i Pikinini bilong God em God i laikim tumas, na em i man God i salim bilong givim laip bilong em long baim bek ol man. (Mt. 3:16, 17) Traim long tingim pes bilong aposel Jon taim em i harim Jehova i tokaut: “Harim. Mi mekim olgeta samting i kamap nupela.” (KTH 21:5) Tru tumas, taim yu bihainim dispela kain pasin bilong ritim Baibel bai yu amamas tru!

Wok long ritim tok God i kamapim, na bai yu kisim save olsem Jehova em i wanpela man i antap tru na i gat bikpela strong. Bai yu gat laik long stap klostu long Em, long wanem, em i laikim yumi tru, na em i save marimari long yumi na helpim yumi sapos long pasin daun yumi traim long bihainim laik bilong em, na em i soim yumi long ol samting yumi mas mekim bambai ol wok bilong yumi i ken kamap gutpela.—Jos. 1:8; Sng. 8:1; Ais. 41:10.

Amamas bilong yu bai go bikpela taim yu wok long ritim Baibel na kisim save moa long ol samting God i laik bai yu mekim. Tasol dispela amamas bai go bikpela moa yet. Taim ol tok yu ritim i helpim yu long bihainim savepasin long stretim sampela hevi, bai yu pilim olsem man bilong raitim song, em i tok: “Tok bilong yu i gutpela tumas. Olsem na mi save bihainim olgeta.” (Sng. 119:129) Bai yu amamas tu long luksave olsem ol stiatok bilong Baibel i helpim yu long kamapim pasin bilong God long tingting na laik bilong bel bilong yu.—Ais. 55:​8, 9.

Tok bilong Baibel i stiaim yumi gut long bihainim stretpela pasin na ol hevi i no bagarapim yumi. Yumi wok long ritim Baibel na yumi save olsem Jehova em i wanpela Papa i save gut long ol hevi inap painim yumi sapos yumi bihainim ol laik nogut bilong skin. Em i no laik bai yumi karim ol pen na hevi i save painim ol man i save sakim ol stretpela lo bilong em. Em i laikim yumi na em i laik bai yumi stap amamas. Long rot bilong ritim Baibel yumi kisim save olsem em i wanpela blesing em i stap God na Papa bilong yumi.

Ritim Baibel Long Olgeta De

Man bilong raitim song i tok long man i ritim Baibel long olgeta de: “Olgeta samting em i mekim i save kamap gutpela.” (Sng. 1:3) Em nau, maski yumi no gutpela olgeta, na yumi stap long graun Satan i bosim, na em i laik bagarapim yumi, pasin bilong ritim na bihainim tok bilong Baibel long olgeta taim inap mekim olgeta samting yumi mekim bilong i stap gut wantaim Jehova i kamap gutpela.

Pasin bilong dispela graun i laik pundaunim yumi, olsem na sapos yumi kisim sampela tok bilong Man bilong wokim yumi long olgeta de, dispela bai strongim yumi. Sampela ol i kalabus, long wanem, ol i Witnes, ol i gat ol wan wan ves bilong Baibel tasol ol i lukim long ol niuspepa. Ol i bin katim na rausim ol dispela ves, na putim gut long tingting, na ol i wok long tingim tingim ol dispela ves. Jehova i blesim hatwok bilong ol, long wanem, ol i bin mekim olgeta samting ol i inap long mekim bilong kisim save long Baibel. (Mt. 5:3) Tasol wan wan bilong yumi i gat kain hevi olsem. Yumi no ken ting pasin bilong ritim hariap wanpela ves bilong Baibel wanpela taim long olgeta de bai mekim bikpela senis long yumi. Nogat. Tasol yumi bai kisim ol blesing sapos yumi stretim gut sediul bambai yumi ken ritim hap bilong Baibel long olgeta de, na tingting gut long en, na bihainim dispela tok long i stap bilong yumi.

Tru, sampela samting inap kamap bilong pasim yumi long mekim ol samting yumi tok pinis long mekim. Long kain taim olsem yumi mas mekim ol samting em i bikpela samting moa. Olsem: Long laik bilong yumi yet yumi no inap lusim wara na yumi no dring inap tupela de samting, a? Maski wanem samting i painim yumi, yumi mas kisim nupela strong long rot bilong kisim wara bilong tok i tru long olgeta de.—Ap. 17:11.

Ritim Baibel Olgeta

Yu yet i bin ritim Baibel olgeta? Sampela i bin ting em i bikpela wok tumas long ritim Baibel kirap long Stat na i go pinis long Kamapim Tok Hait. Olsem na sampela, ol i laik ritim Baibel olgeta, ol i kirap long Ol Skripsa Grik. Bilong wanem? Long wanem, ating ol inap luksave olsem wanem dispela hap i stret long laik bilong ol long bihainim pasin bilong Krais. O ating ol i luksave olsem Ol Skripsa Grik i liklik hap bilong Baibel, olsem 25 pesen samting. Tasol ol i pinis long ritim dispela 27 buk, orait nau ol i kirap na amamas long ritim ol 39 buk bilong Ol Skripsa Hibru. Orait, taim ol i pinisim Ol Skripsa Hibru, pasin bilong ritim Baibel long olgeta taim i kamap pasin bilong ol, olsem na ol i kirap ritim gen Ol Skripsa Grik na ol i no lusim dispela pasin. Gutpela sapos yu tu i ken mekim olsem.

Olsem wanem? I gat wanpela long famili o kongrigesen bilong yu i no inap rit? Tokim ol olsem yu laik ritim Baibel long ol long olgeta taim. Dispela bai helpim yu, na man ya bai kisim helpim taim em i tingim tingim ol tok em i harim na em i wok long bihainim long i stap bilong em.—KTH 1:3.

Bihain, ating bai yu gat laik long mekim sampela stadi moa taim yu ritim Baibel. Sampela bilong ol dispela kain stadi i ken helpim yu long save olsem wanem narapela hap bilong Baibel i helpim narapela. Sapos Baibel bilong yu i gat ol rait i stap arere, orait ating dispela inap stiaim yu i go long sampela hap i stori long ol samting i bin kamap bipo na ol hap bilong Baibel i stori long wankain samting. Ating ol i ken helpim yu long save long as na ol man i raitim sampela hap bilong Buk Song, na ol aposel bilong Jisas Krais i bin raitim ol pas. Buk Insight on the Scriptures i kamapim planti save long ol man, ol ples, na ol pasin Baibel i kolim. I gat ol sat i stori long truim bilong ol tok profet bilong Baibel, na i soim wanem ol king na ol profet i bin i stap long wankain taim, na i kolim ol yia ol samting bilong Baibel i bin kamap long en.

Taim yu tingting strong long ol samting yu lainim pinis, bai yu kisim save long as na ol samting i bin kamap long ol manmeri bilong God. Na tu, bai yu kisim save long as bilong ol samting Jehova i bin mekim long ol. Bai yu lain long olsem wanem Jehova i save skelim ol samting ol gavman, ol pipel, na ol wan wan man i save mekim. Dispela bai mekim na bai yu save moa long tingting bilong em.

Bai yu gat laik moa long save long ol samting i bin kamap bipo em Baibel i stori long en, sapos long tingting yu inap lukim piksa bilong dispela hap graun Baibel i stori long en. Ol mep bilong graun Baibel i stori long en i kamapim olsem graun i wanem kain na narapela ples i stap longwe long narapela ples olsem wanem. Olsem: Ol Israel i brukim solwara Retsi we? Graun Bilong Promis i bikpela olsem wanem? Jisas i bin wokabaut hamas kilomita long mekim wok autim tok bilong em? Pol i bin lukim wanem ol samting long raun bilong em olsem misineri? Ol mep na ol tok i stori long graun i stap olsem wanem i save helpim yumi long tingim na pilim tru ol tok yumi ritim. Bai yu painim we ol mep bilong ol hap Baibel i kolim? Sampela i stap long Baibel New World Translation of the Holy Scriptures. Buk Insight i gat 70 samting mep long en, na i gat indeks bilong ol mep long pinis bilong volium wan. Yusim Watchtower Publications Index bilong painim sampela mep moa. Sapos yu no gat ol dispela buk, orait yusim ol mep i bin stap insait long ol Wastaua bilong helpim yu taim yu ritim Baibel.

Long Ol Skripsa Hibru, King Devit i givim biknem long Jehova, na i tok: “God, i hat tumas long mi save long olgeta tingting bilong yu. Tingting bilong yu i no liklik, na i no gat rot long mi ken save long en.” (Sng. 139:17) Long Ol Skripsa Grik, aposel Pol i litimapim nem bilong Jehova, long wanem, “lait bilong God yet i bin i kam i stap long mipela, na . . . mipela i lukim pes bilong Jisas Krais na mipela i lukim lait tru na mipela i save long bikpela lait na strong bilong God.” (2 Ko. 4:6) Devit i bin i stap planti handet yia paslain long Pol, tasol tupela wantaim i bin amamas long Tok Bilong God. Yu tu inap amamas olsem sapos yu makim taim bilong ritim olgeta tok Jehova i givim yumi long Baibel.