Pasin Bilong Holim Ol Samting Long Tingting Inap Kamap Gutpela Moa
GOD JEHOVA i bin wokim kru bilong man na kru inap tingim ol samting. Em i wokim kru bilong bungim ol tingting insait long en na man inap kamapim dispela tingting na i no inap lus. God i laik bai ol man i ken i stap oltaim na em i wokim kru bilong man i stret wantaim dispela laik.—Sng. 139:14; Jo. 17:3.
Tasol ating yu pilim olsem planti samting yu putim long tingting i save lus. Yu no inap tingim samting taim yu gat laik long mekim olsem. Yu ken mekim wanem na pasin bilong yu long tingim ol samting inap kamap gutpela moa?
Mas i Gat Laik
Bilong mekim pasin bilong yu long holim ol samting long tingting i kamap gutpela, yu mas i gat laik long samting yu laik tingim. Sapos yumi kisim pasin bilong lukluk gut long ol samting, na yumi gat laik long save long ol samting bilong ol man na long ol samting i wok long kamap, dispela bai kirapim tingting bilong yumi. Taim yumi mekim olsem, orait em bai isi moa long yumi mekim wankain pasin taim yumi ritim o harim sampela gutpela tok.
Planti man i hatwok long tingim nem bilong ol manmeri. Tasol yumi ol Kristen i save, yumi mas ting olsem ol manmeri ol i bikpela samting—ol wanbilip Kristen, ol man yumi autim tok long ol, na ol narapela man yumi bungim taim yumi mekim ol samting yumi mas mekim long i stap bilong yumi. Wanem samting inap helpim yumi long tingim nem bilong ol? Long wanpela kongrigesen aposel Pol i bin raitim pas long en, em i kolim nem bilong 26 brata sista. Yumi save em i gat laik long ol, long wanem, em i no save long nem tasol, nogat, em i kolim sampela samting bilong ol tu. (Ro. 16:3-16) Long nau, sampela wasman raun bilong ol Witnes Bilong Jehova ol i save tingim gut nem bilong planti brata sista, maski ol i go long ol narapela narapela kongrigesen long olgeta wik. Wanem samting i helpim ol? Namba wan taim ol i toktok wantaim wanpela man, ol bai kolim nem bilong em planti taim liklik. Ol i wok strong long tingim pes bilong man wantaim nem bilong em. Na tu, ol i save autim tok na kaikai wantaim sampela. Taim yu bungim man, bai yu tingim nem bilong em? Kamapim wanpela gutpela as bilong tingim dispela nem; na bihainim sampela tok i stap long dispela paragraf.
Pasin bilong holim long tingting ol samting yu ritim pinis em i bikpela samting tu. Wanem samting inap helpim yu? Yu mas i gat laik long samting yu ritim na yu mas save gut long en. Laik bilong yu long samting yu ritim i mas kirapim yu long tingting long dispela samting tasol. Yu no inap tingim tok yu ritim sapos yu wok long tingting long narapela samting. Pasin bilong kisim gut mining bilong tok, em i kamap gutpela moa taim yu skelim dispela tok wantaim sampela tok yu save pinis long en. Askim yu yet olsem: ‘Olsem wanem na long wanem taim bai mi mekim wok long dispela save? Olsem wanem bai mi yusim dispela save bilong helpim narapela man?’ No ken lukim na ritim ol wan wan tok tasol, nogat, yu mas bungim planti tok liklik na ritim wantaim. Dispela bai helpim yu long kisim gut mining bilong ol tok yu ritim na bai yu inap holim long tingting ol dispela tok.
Lusim Sampela Taim Long Tingim Gen
Ol man i gat bikpela save long skulim ol man, ol i tok pasin bilong mekim riviu em i bikpela samting. Wanpela profesa bilong yunivesiti i soim olsem sapos wantu bihain long stadi ol sumatin i wokim riviu inap long wanpela minit tasol long ol samting ol i bin stadi long en, dispela i dabolim save ol i holim long tingting. Olsem na wantu, taim yu ritim pinis wanpela hap, orait tingim gen ol bikpela tok na bai yu ken putim gut long tingting. Tingting long olsem wanem bai yu kamapim klia long tok bilong yu yet ol nupela tok yu bin lainim. Taim yu ritim pinis wanpela nupela tok, kwiktaim kamapim gen long tingting na dispela bai helpim yu long tingim dispela tok inap longpela taim.
Orait, insait long ol de bihain, painim rot bilong toktok wantaim narapela long dispela nupela tok yu bin ritim. Yu ken toktok wantaim wanpela wanfamili, wanwok, wanskul, wanpela insait long kongrigesen, o wanpela yu bungim taim yu mekim wok autim tok. Traim long kolim gen ol bikpela tok na ol skripsa i as bilong dispela tok. Dispela bai helpim yu long holim ol dispela tok long tingting bilong yu, na em bai helpim ol narapela tu.
Tingim Tingim Ol Bikpela Samting
Pasin bilong wokim riviu long ol tok yu ritim na kamapim long ol narapela, dispela bai helpim yu long tingim ol bikpela tok. Na pasin bilong tingim tingim ol dispela bikpela tok yu lainim, em tu bai helpim yu. Tupela man i bin raitim hap bilong Baibel, em Asap na Devit, ol i bin mekim olsem. Asap i tok: “God, bai mi tingting gen long ol bikpela wok bilong yu. Yes, bai mi tingting bek long ol kain kain bikpela samting bipo yu bin mekim. Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.” (Sng. 77:11, 12) Devit i mekim wankain tok olsem: “Taim mi slip long bet mi save tingting long yu,” na “Mi tingting gen long ol samting i bin kamap bipo. Na mi tingting long ol samting yu bin mekim na long ol gutpela wok bilong yu.” (Sng. 63:6; 143:5) Olsem wanem? Yu save mekim olsem?
Pasin bilong tingting strong long ol samting Jehova i mekim, ol pasin bilong em, ol samting em i tokaut long mekim, na ol kain samting olsem, dispela i save helpim yumi long holim ol dispela tok long tingting. Na i no dispela tasol. Sapos yu bihainim pasin bilong tingting strong olsem, ol bikpela samting yu mas tingim bai pas strong long bel bilong yu. Em bai helpim yu long kisim ol gutpela pasin, na ol dispela tok yu holim gut long tingting bai makim tru pasin bilong yu.—Sng. 119:16.
Wok Bilong Spirit Bilong God
Taim yumi laik tingim ol tok tru bilong ol samting Jehova i bin mekim na ol tok Jisas Krais i autim, i no olsem yumi no gat helpim. Long nait paslain long indai bilong em, Jisas i tokim ol disaipel: “Taim mi stap yet wantaim yupela, mi tokim yupela long ol dispela samting. Tasol Helpim tru bilong strongim yupela em i Holi Spirit. Na long nem bilong mi, Papa bai i salim em i kam. Em bai i skulim yupela long olgeta samting. Na bai em i kirapim tingting bilong yupela na bai yupela i tingim gen olgeta tok mi bin givim long yupela.” (Jo. 14:25, 26) Matyu na Jon i bin stap taim Jisas i mekim dispela tok. Olsem wanem? Spirit holi i bin helpim ol olsem? Tru tumas, em i bin mekim! Klostu 8-pela yia bihain Matyu i raitim namba wan stori bilong i stap bilong Krais, na insait long dispela stori em i kamapim bikpela tok Jisas i mekim antap long maunten na mak bilong makim olsem Krais i kam i stap na pasin bilong dispela graun i laik pinis. Na 65 yia bihain long i dai bilong Jisas, aposel Jon i raitim Gutnius bilong em, na em i stori gut long ol tok Jisas i mekim long laspela nait em i stap wantaim ol aposel paslain long indai bilong em. Ating Matyu na Jon inap tingim gut ol samting Jisas i bin mekim na toktok long en taim ol i stap wantaim em, tasol spirit holi i givim bikpela helpim long ol bambai ol i no ken lusim tingting long ol bikpela tok Jehova i laik bai ol i raitim long Baibel.
Olsem wanem? Spirit holi i save helpim ol wokboi bilong God long nau? Yes, em i save mekim olsem! Tru, spirit holi i no save putim sampela save long tingting bilong yumi sapos yumi no bin lainim pastaim, tasol em i ken helpim yumi long tingim bek ol bikpela tok yumi bin stadi long en long bipo. (Lu. 11:13; 1 Jo. 5:14) Orait, taim yumi gat wok long dispela tok yumi lainim pinis, tingting bilong yumi i kirap “tingim gen tok bilong samting i laik kamap bihain, em ol profet bilong God i bin autim. Na [yumi] i mas tingim tu lo bilong Bikpela, em Man bilong kisim bek yumi.”—2 Pita 3:1, 2.
‘Yu No Ken Lusim Tingting’
Planti taim Jehova i tok lukaut long ol Israel: ‘Yu no ken lusim tingting.’ I no olsem em i ting ol inap tingim gut olgeta samting. Nogat. Tasol ol i no ken tingting tasol long ol samting bilong ol yet na ol i no tingim ol samting Jehova i bin mekim long ol. Ol i mas tingim yet ol samting Jehova i bin mekim bilong kisim bek ol long Isip taim em i kilim i dai ol nambawan pikinini bilong ol Isip, na em i brukim solwara Retsi na king bilong Isip wantaim ami bilong em i bagarap. Ol Israel i mas tingim bek dispela taim God i bin givim Lo bilong em long ol long maunten Sainai na em i go pas long ol long ples drai nating na bringim ol long Graun Bilong Promis. Ol i mas holim ol dispela samting long tingting na i mas stiaim ol samting ol i mekim long olgeta de.—Lo 4:9, 10; 8:10-18; Kis. 12:24-27; Sng. 136:15.
Yumi tu mas was gut na no ken lusim tingting. Taim yumi wok long karim ol hevi i save painim yumi long olgeta de, yumi mas tingim Jehova, tingim pasin bilong em na pasin sori em i kamapim taim em i givim Pikinini bilong em olsem presen bilong baim bek yumi long ol sin bambai yumi ken kisim laip oltaim. (Sng. 103:2, 8; 106:7, 13; Jo. 3:16; Ro. 6:23) Pasin bilong ritim Baibel long olgeta taim na insait long ol miting bilong kongrigesen na mekim wok autim tok bai mekim na ol dispela gutpela tok i tru bai i stap strong long bel na tingting bilong yumi.
Taim yu mas mekim wanpela samting, maski em i bikpela o liklik samting, tingim bek ol dispela tok i tru, na larim ol i stiaim tingting bilong yu. No ken lusim tingting. Larim Jehova i stiaim yu. No ken bihainim tingting bilong graun o tingting i save kamap nating long bel, nogat. Askim yu yet: ‘Wanem tok kaunsel o stiatok bilong Baibel i stori long samting mi laik mekim?’ (Snd. 3:5-7; 28:26) Yu no inap tingim bek ol tok yu no bin ritim o harim. Tasol taim yu wok long kisim stretpela save na pasin bilong laikim tru Jehova, ol save em spirit bilong God inap kirapim yu long tingim bek em bai i go bikpela, na pasin bilong yu long laikim tru Jehova bai i go bikpela na kirapim yu long bihainim ol dispela save.