Olsem Wanem Yu Ken Tingim Ol Samting?

YU INAP holim planti samting long tingting bilong yu! I hatwok long yu bilip olsem, a? Tasol tingim ol planti samting yu holim pinis long tingting bilong yu olsem: Ol samting bilong taim yu pikinini yet, nem bilong ol pren na famili na sampela man, stori bilong ol yu bin kaunim long ol buk o lukim long televisen, nek na tok bilong sampela singsing yu laikim tru, ol leta long eibisi, ol namba, na planti tausen ol tok. Yes, yu inap holim planti milion milion samting long tingting bilong yu!

Olsem na ating sampela taim bai yu ting, ‘sapos tingting bilong yumi i gutpela olsem, bilong wanem yumi save lusim tingting long sampela samting? Bilong wanem yumi save putim sampela samting long wanpela hap na bihain yumi no inap painim? Bilong wanem yumi go long stua na yumi lusim tingting long samting yumi laik baim? Bilong wanem i hatwok moa yet long tingim ol nem na namba bilong telefon na wanem klok yumi bin makim long bung wantaim wanpela man?’ Tingting bilong yumi i gutpela​—tasol yumi ken skulim yet.

Bilong Wanem Yumi Save Lusim Tingting?

God i wokim yumi inap yumi ken holim planti samting long tingting bilong yumi. Baibel i tok piksa long kru bilong yumi i olsem wanpela “dis gol”​—em wanpela gutpela samting bilong pulimapim ol samting long en. (Saveman 12:6) Bilong wanem yumi save lusim tingting? Long wanem, planti taim yumi no save givim bel long tingim. Bikpela man bilong bosim musik (Arturo Toscanini) i bin holim planti pilai musik long tingting, na em i no bin lukim buk samting. Bikpela man bilong bisnis (Charles Schwab) i bin tingim nem bilong 8,000 wokman bilong em. Tasol ating ol dispela man i tingim ol samting ol i bin givim bel long en, na ol narapela samting nogat. Maski yu inap holim planti samting long tingting bilong yu, bai i hatwok tru long lainim na tingim ol samting yu no givim bel long en.

Sapos yumi go long narapela ples dispela tu inap mekim na yumi save lusim tingting. Olsem wanpela man i bin go long as ples bilong em na wanpela meri i tok gude long em. Wantu em i ting em i bin kamap bikpela wantaim dispela meri long as ples bilong em. Tasol bihain em i save olsem dispela meri em i wanpela wanwok bilong em. Em tu i bin kam raun long dispela ples. Klostu em i no bin save long em, long wanem, em i bin lukim em long narapela ples.

Gutpela tru yu no gat wok long tingim ol liklik liklik samting i kamap long wanpela de; planti samting i no bikpela samting. Tasol sapos wanpela samting i bikpela samting, yu mas lain long tingim. Bai yu lain olsem wanem? Yu mas givim bel long tingim gut.

Yu Ken Tingim Olsem Wanem?

Sapos yu laik telefon long wanpela man long nait, na yu no laik lusim tingting, yu no ken tingting hariap tasol, yu mas givim bel tru long tingim. Sapos yu no mekim olsem, ating bai yu lusim tingting. Wanpela buk (Instant Recall​—Tapping Your Hidden Memory Power) i tok, sapos yu laik putim gut wanpela samting long tingting bilong yu, ‘tingim longpela taim liklik, no ken tingim wantu tasol’ na dispela samting bai pas gut long tingting bilong yu. Sapos yu tokim yu yet, yu no inap lusim tingting long telefon long dispela man long nait, ating yu no inap lusim tingting.

Tasol i gat wanem ol narapela rot bilong helpim yu na bai yu no ken lusim tingting? Sapos yu bihainim sampela tok nau mipela i laik kamapim ating dispela inap helpim yu.

Yu mas klia gut long tok: Wanpela kompyuta i no inap wok gut sapos em i no klia gut long ol tok yu putim i go insait long en. Wankain samting i kamap long tingting bilong yumi. Olsem wanem sapos yu laik lain long ol nem? Wanpela man i gat namba, em Bruno Furst, i tok long buk bilong em (Stop Forgetting) olsem: ‘Sapos yumi no klia gut long nem bilong wanpela man, bihain yumi no ken tok olsem yumi lusim tingting long dispela nem, long wanem, pastaim yet yumi no bin klia gut long dispela nem. Olsem na yumi mas klia gut long kolim na raitim dispela nem.’ Sapos yu bungim wanpela man na em i no kolim gut nem bilong em, yu mas askim em long kolim gen, na askim em, em i raitim nem bilong em olsem wanem.

Tingim gut: Long tingting wokim wanpela piksa long samting yu laik tingim. Sapos yu mas mekim wanpela wok, long tingting yu mas lukim yu yet olsem yu mekim dispela wok.

Olsem: Sapos yu mas baim susu na marasin bilong klinim tit, long tingting yu ken wokim wanpela piksa bilong bulmakau i klinim tit. Ating dispela kain piksa yu no inap lusim tingting long en hariap.

Kolim long maus: Narapela rot long helpim yu​—kolim long maus olsem, ‘mi mas ringim Jon long nait,’ na ating yu no ken lusim tingting. Olsem wanem? Sampela taim yu lusim tingting long yu bin lokim dua? Wanpela buk (How to Improve Your Memory) i tok olsem: ‘Sapos yu kolim long maus samting yu mekim long taim yu mekim, dispela samting bai helpim yu long tingim. Taim yu lokim dua, yu mas kolim long maus, “mi lokim dua.” ’ Ating taim yu mekim olsem bai yu ting olsem yu longlong liklik, tasol dispela samting bai helpim yu long tingim.

Givim bel long tingim samting yu mas holim gut long tingting: Sampela taim ating yu no amamas tumas long lainim sampela samting. Tasol sapos yu tingim samting olsem: I gat wanem as na yu mas kisim save, na wanem samting bai painim yu sapos yu no lainim, ating bai i no hatwok tumas long yu long lainim. Sapos yu kisim bikpela save long wanpela samting dispela bai helpim yu. Baibel i tok: “Sapos tingting bilong man i gutpela, em bai i no inap hatwok long kisim gutpela save.”​—Sindaun 14:6.

Kaunim: Sapos yu mas kisim sampela samting i go long wok long tumora, i gutpela yu kaunim hamas yu mas kisim na ating bai yu no inap lusim tingting long wanpela samting.

Stretim gut: Sapos yu mas baim planti samting long stua, gutpela sapos yu stretim gut long tingting bilong yu wanem samting yu mas baim. Tripela samting olsem susu na bata na sis, tupela samting olsem abus, na tupela narapela samting. Stretim gut ol samting long tingting bilong yu, na yu no ken lusim tingting long wanem samting yu mas baim.

Mekim wok long en na tingim gen: Yu no inap lusim tingting long nem bilong yu, na ol leta long eibisi, o olsem wanem yu mas mekim wok long spun na pensil samting. Bilong wanem yu no save lusim tingting? Long wanem, olgeta taim yu save mekim wok long dispela samting. Sapos yu mekim o tingim wanpela samting planti taim, bai i no hatwok long tingim gen. Taim wanpela man i kolim nem bilong em, mekim wok long dispela nem planti taim. O sapos yu bin lainim wanpela nupela samting, toktok long narapela man long dispela samting.

Sapos Yu Tingim, Em Gutpela

Ating bai yu tok: ‘Bilong wanem mi mas hatwok olsem? Em i no hatwok sapos mi raitim wanpela lista long helpim mi long tingim ol samting.’ Yumi ken mekim wok long kalenda na lista na raitim pepa bilong helpim yumi long tingim ol samting. Tasol taim yu bungim wanpela man, i no gutpela sapos yu kisim wanpela pepa, na nau yu raitim nem bilong em long pepa. O yu bin raitim wanpela lista long tingim ol samting na bihain yu no inap painim dispela lista. O yu raitim wanpela samting long kalenda na bihain yu lusim tingting long lukluk long kalenda. Olsem na i gutpela tru sapos yu skulim tingting bilong yu long tingim ol samting.

Sapos planti taim yu mekim wok long tingting bilong yu, dispela samting bai helpim yu long tingim ol samting. Ating bihain bai yu amamas moa long tingim ol samting, na i winim tru pasin bilong raitim ol samting long wanpela pepa. No ken ting sapos yu mekim wok long tingting bilong yu long olgeta taim, tingting bilong yu bai paul o i no inap wok gut moa. Sapos olgeta taim yu mekim wok long tingting bilong yu, tingting bilong yu bai kamap sap moa yet. Wanpela meri i gat namba (Joan Minninger) i tok: ‘Planti man i ting ol i mas rausim sampela olpela tingting na bai ol inap long kisim sampela nupela tingting. Tasol nogat. Kru bilong yumi inap holim planti samting tru.’

Narapela man i gat namba (Dr. Furst) em tu i tok, ‘yumi kranki tru sapos yumi ting yumi no ken mekim wok long tingting bilong yumi, olsem tingting i mas malolo, na dispela samting bai lukautim gut tingting bilong yumi. Nogat. Yumi mas mekim wok long tingting bilong yumi long olgeta taim na tingting bilong yumi inap holim planti samting.’ (Hibru 5:14) Wanpela buk (The Memory Book) i tok olsem, ‘taim yumi go lapun tingting bilong yumi inap holim planti samting moa, winim taim yumi yangpela.’

Maski dispela tok i tru o nogat, sapos yu mekim gut wok long presen God i givim long yu​—em tingting bilong yu, bai yu amamas, na ating bai yu kisim planti gutpela samting long en.