Ol Bulmakau i Flai

LONG Janueri 5, 1993, olgeta man i kisim save long ol strongpela win i save kamap long ol ailan Setlan, em ol ailan i stap longwe liklik long noten Skotlan. Win i mekim na wanpela sip (Braer) bilong karim wel, longpela bilong en 243 mita, na hevi bilong en 41,000 ton, i bin bruk long rip bilong nambis. Wanpela wik tasol na win na si i sakim dispela traipela sip na sip i bruk long 4-pela hap.

Ol strongpela win i no nupela samting long ol man bilong dispela hap. I gat olsem 100 ailan long lain ailan Setlan, na ol i stap longwe tru long bikples. Twenti ailan tasol i gat man long en. Ol bikpela win i kirap long solwara klostu long Aislan na ol i siksti i kam na sakim ol dispela ailan.

Olsem na ol man i stap long dispela hap i save lukim ol narapela kain samting. Nius The Wall Street Journal i kamapim tok bilong wanpela man olsem: ‘Ating ol i mas sanapim ol mak long Setlan i gat toksave olsem: “Was gut long ol bulmakau i flai antap.” ’ Dispela man i stori long bulmakau bilong wanpela pren bilong em. Strongpela win i bin kam na apim bulmakau long hap graun em i stap long en na tromoi em i go long narapela hap. Narapela man i stap long dispela hap em i bin lukim win i apim pusi bilong em na pusi i “flai” i go inap 5 mita samting na pundaun long lek bilong en. Planti taim ol draiva bilong trak i save putim ol hevipela samting long trak bilong ol. Ol i mekim olsem na win i no ken rausim trak long rot. Win i bin apim ol manmeri tu na sampela i bin dai. Wanpela taim strongpela win i bin kilim i dai wanpela meri. Ol i ting strong bilong dispela win i olsem 323 kilomita long wanpela aua. Ol i no save tru long strong bilong en, long wanem, win i bin karim i go masin bilong glasim strong bilong win!