Painim Ol Gutpela Samting i Stap Hait

KIRAP long bipo yet i kam inap nau, ol man i amamas long ol gutpela samting bipo ol i bin stap hait insait long graun. Kantri Havila long Arebia bilong bipo i gat nem long ol naispela ston kanilian i gat kala. (Stat 2:​11, 12) Na hetpris bilong Israel long bipo, em i bin pasim long bros wanpela liklik laplap i gat 12-pela ston i dia tumas, olsem ston kanilian, rubi, emeral, topas, na planti moa. Na ol i bin pasim olgeta ston long gol. Bai yumi amamas sapos yumi inap lukim dispela naispela samting, a? (Kisim Bek 28:​15-20) Taim ol i wokim haus lotu bilong Jehova long Jerusalem ol i bin mekim wok long planti ston i dia tumas. (1 Stori 29:2) Ating planti ston ol i bin polisim na bai ol i lait moa. Ol man bilong painim ol samting bilong bipo i painim wanpela liklik masin ol man i bin mekim wok long en planti tausen yia bipo. Ol i bin wokim lek bilong kirapim dispela masin long tanim wanpela bikpela ston na taim ston i tantanim em i bin polisim ol liklik ston. Olsem na pasin bilong yumi long nau long bungim ol gutpela gutpela ston i no nupela samting​—ol man bilong bipo i bin mekim tu.

Ol Tul na Ples Bilong Painim

Ating yu gat askim olsem: ‘Bilong painim ol ston, mi mas holim wanem ol tul?’ Yu mas i gat wanpela kain hama, wanpela arere i skwea na stret olgeta na narapela arere i gat sap. Yu mas i gat pepa bilong karamapim gut ol ston na bek bilong pulimapim ol ston long en. Em nau, yu no ken tromoi bikpela mani long baim ol dispela samting, a?

Nau yu mas save wanem ol hap yu inap painim ol ston long en, a? Ol ples daun na as bilong ol liklik wara i gutpela, long wanem, ol ston inap bruk long ol bikpela ston long ples antap na pundaun long maunten o kalap kalap i kam daun long wara. Na taim ol i kam daun olsem, graun o wara i mekim na stretim na polisim dispela ol ston. Long lek bilong wara yu inap painim sampela ston, na long nambis tu, long wanem, solwara i save tromoi ol liklik ston bilong rip i kam long nambis. Sampela hap moa em ol ples ol i bin kamautim graun bilong wokim ol rot o long ol olpela main nau ol i no mekim wok moa long en. Tasol was gut long ol dispela kain ples, long wanem, ating graun i no strong moa na sampela ston inap pundaun. Na ating long sampela ples yu mas kisim tok orait bilong raun painim ol ston.

Sapos yu stap long Saut Afrika o Brasil ating yu inap painim ol ston daimon. Long as bilong ol wara long India na Mianma na Tailan yu inap painim ol rubi na sapaia, na long Kalombia, India, Saut Afrika, Simbabwe, yu inap painim ol emeral. Long Saina na Japan planti man i laikim bilas na sampela samting moa ol i bin wokim long ston jeit. Ol kantri olsem Mianma, Nu Silan, Alaska, Japan, i gat jeit.

Wanpela gutpela ston tru em opal. Yu inap painim long Ostrelia na Meksiko. Opal i gat planti kala​—retpela, yelopela, grinpela, blupela. Opal i no strongpela ston, olsem na taim ol i polisim ol i mas putim liklik kwots long en, nogut wanpela samting i skrapim.

Bilong Ol Man i Lain Yet

Ol man i gat save long ol ston i no hatwok long painim ol dispela gutpela ston. Ol man i gat liklik save bai hatwok. Tasol i gat planti kwots i stap na em i no hatwok long painim, long wanem, planti ston i gat kwots long en. Wanpela kain kwots i olsem glas na i lait moa na narapela kain i no lait tumas. Na sampela kwots i gat retpela na yelopela na grinpela makmak. Na maski yu painim wanem kain ston, sapos em i gat kala na makmak, gutpela yu kisim na polisim, long wanem, dispela ston inap kamap naispela ston bilas bilong pasim long skin o bilong putim insait long haus.

Taim yu bungim planti ston, nau yu mas save long pasin bilong polisim. Sampela lain i tok, i gutpela long putim ol ston insait long wanpela dram em liklik ensin i save tanim na ol ston bai tantanim insait. Na insait long dram i mas i gat wara na wesan i gat ol liklik liklik ston long en. Bihain yu mas putim wesan nating long dram na bihain long dispela, putim paura bilong polisim ol ston. No ken les maski sampela wik i mas lus, long wanem, taim yu lukim ol ston bai yu save, hatwok bilong yu i no bin lus nating.

Ol Narapela Kain Ston

Ol man i no save bungim ol liklik ston tasol. Long Japan ol i mekim wok long ol bikpela ston bilong wokim gaden bilas. Na sampela kain ston olsem i gat bikpela pe. Pe bilong wanpela kain retpela ston, hevi bilong en inap 700 kilo, em 2,300 kina. Bilong wanem dispela ston i gat bikpela pe? Long wanem, mak bilong en i gutpela na ol man i no bin sapim. Dispela kain ston inap sindaun long gaden bilong yu na yu inap stretim rot bilong wara i ken kirap long het bilong ston na kapsait i kam daun olsem planti ol liklik liklik wara i kapsait i go daun long maunten.

Olsem wanem? Nau yu laik go na painim ol gutpela ston? Sapos olsem, ating yu inap painim ol gutpela samting i stap hait.​—Em stori bilong wanpela man.