Laikim Tru Papamama Kristen

Papamama i save wok strong long mekim bikpela long pikinini bilong ol, ol i amamas tru sapos pikinini i kamap gutpela man na man bilong lotu long Jehova. Na papamama i amamas sapos pikinini i tok tenkyu long ol long gutpela wok ol i bin mekim long lukautim ol.

Nau mipela kamapim tok bilong wanpela pas pikinini man na meri bilong em i bin salim long papamama bilong man bihain long tupela i marit:

‘Yes Papa na Mama:

‘Mipela inap tok wanem? Pastaim mipela mas tok tenkyu long pasin sori bilong yupela, na ol samting yupela i givim long mipela, na ol samting yupela i mekim bilong strongim mipela long de mipela i marit. Em bikpela de na mipela amamas long yupela i bin stap. Na yupela i no mekim ol dispela samting tasol, yupela i bin helpim mipela long amamas taim mipela malolo bihain long marit. Dispela olgeta samting i makim gutpela pasin yupela i bin mekim bipo na long nau tu!

‘Olsem wanem? Yupela i save long as na mi no bin lusim rot i go long laip na mi wokabaut yet long en? Tru, mi laikim Jehova, tasol olgeta taim mi tingim gutpela pasin bilong yutupela. Dispela na ol samting yupela i mekim bilong skulim na stretim mi, i bin helpim mi long tingting gut taim mi laik mekim wanpela samting. Mi stap gut long wok bilong God, long wanem, olgeta taim yupela i bin laikim mi na skulim mi, na yupela daun tru long Jehova na oganaisesen bilong em.

‘Sapos mi tingting bek long taim mi pikinini na long ol samting yupela i mekim, mi save mi no inap tingim olgeta samting yupela i bin toktok long en, tasol mi save tingim gutpela pasin bilong yupela long laikim Jehova na ol narapela man.

‘Mipela i laikim tru yupela.

‘Mipela i pikinini na tambu bilong yupela,

‘L. na W.’