Mekim Wok Long Win

TAIM ol i wokim namba wan stesin bilong mekim wok long win long Briten, wanpela hevi i bin kamap na i pasim wok bilong ol inap liklik hap taim. Nius The Independent bilong Landon i stori olsem taim ol i laik sanapim wanpela masin em win bai tantanim han bilong en bilong kamapim paua, wanpela krein i bin pundaun long bikpela win. Tasol ol man i tok, pasin bilong mekim wok long win em wanpela gutpela rot tru bilong kamapim paua​—em i no pulim bikpela mani tumas, na i wok hariap moa. Na nambawan samting bilong en​—em i no save tromoi ol marasin nogut bilong bagarapim win olsem i save kamap taim ol man i kukim kol samting.

Sampela kantri long Yurop olsem Denmak, Jemani, Netelan​—na Kalifonia tu, ol i amamas long ol stesin win bilong wokim paua, tasol sampela i no amamas. Ol i gat tok long pairap bilong ol bikpela han bilong masin taim ol i tantanim, na ol narapela i ting ol i no luk nais liklik​—na ol i nogut tru long lukim taim ol i stap long ol naispela hap.

Tasol long Briten, em wanpela kantri bilong Yurop i gat bikpela win moa, ol man bilong givim tingting long gavman i mekim gutpela tok long dispela pasin bilong mekim wok long win, olsem ‘em inap kamap nambawan rot tru bilong kamapim paua long nau.’ (Nius New Scientist) Tasol sampela man i no amamas long ol i sanapim ol dispela masin long hap bilong nambis, na ol i tok, i gutpela long sanapim ol long solwara​—maski ol i mas tromoi bikpela mani bilong mekim olsem. Na ol inap mekim wok long ol bikpela winis bilong karim ol hevipela masin samting i go long solwara.