Liklik Diwai i Gat Gutpela Kala na Planti Wok

DISEL, kaikai bilong bulmakau, sop, bata​—⁠ol dispela samting i wankain olsem wanem? Long sampela kantri ol i save wokim ol dispela samting long liklik diwai rep i gat gutpela yelopela plaua.

Dispela liklik diwai i gat gutpela kala i wankain olsem mastet, na ol i save planim long sampela hap bilong Yurop, Esia, na Not Amerika. Planti man i save laikim, long wanem, pikinini bilong en i gat planti wel. Klostu 40 pesen bilong pikinini bilong diwai rep em wel ol man inap mekim planti wok long en.

Long bikpela hap bilong wel, inap 90 pesen bilong en, ol i save wokim kaikai olsem bata, bisket, sop, ais-krim, na ol loli. Tasol ol i mekim wok long en tu bilong kamapim wanpela kain disel i no save kamapim planti smok nogut, olsem na em i no bagarapim tumas dispela graun. Taim ol i rausim pipia long wel, ol inap mekim wok long en bilong welim ol masin i no strong tumas, na taim ol i kisim pinis olgeta wel, ol inap memeim skin bilong en na wokim gutpela kaikai bilong ol animal.

Man! Em liklik diwai i gat planti wok bilong en! Tru tumas, yumi ken mekim wankain tok olsem man bilong raitim Song i bin tok: “Bikpela, yu bin wokim planti samting.”​—⁠Song 104:⁠24.