Samting Bilong Skulim Ol Man

Long Natsime Koles long Simbabwe, Afrika, wanpela tisa i tok, ol i save skulim ol sumatin long wanpela kos, nem bilong en, ‘Skul Bilong Helpim Ol Man.’ Em i stori long hevi bilong famili i bin painim em yet na em i tok, bilong stretim ol dispela hevi, sampela narapela i bin helpim em.

Em i stori long ol samting i bin kamap bihain long em i marit, na em i tok: “Ol hevi i bin kamap wantu tasol, na dispela i mekim na mitupela meri bilong mi i brukim marit long Novemba 1989.” Na tu i gat ol narapela hevi. Em i tok: “Mi namba wan pikinini bilong mama bilong mi na em namba wan meri bilong papa. Taim mi stap long namba tu yia bilong mi long koles bilong lain long kamap tisa, papa bilong mi i dai, na mi kisim wok bilong lukautim 16 liklik brata na susa.”

Taim dispela tisa i stadi long Baibel wantaim ol Witnes Bilong Jehova, dispela i bin helpim em long stretim ol hevi long famili bilong em. Em i stap gen wantaim meri bilong em na ol i stap amamas. Em i tok: “Ol samting i painim mitupela meri bilong mi i bin lainim mipela olsem, sapos man yet i laik stretim ol hevi bilong em na em i no laik God i helpim em, dispela i no inap kamap gut.” Em i bin mekim wanem bilong helpim ol sumatin bilong em long ol hevi bilong ol?

Em i tok: “Mi tokim het-tisa na ol narapela tisa olsem, buk Sampela Askim Bilong Ol Yangpela​—⁠Ol Gutpela Bekim em i gutpela buk tru. Olgeta i wanbel long tok bilong mi, na skul i putim oda bilong kisim 56 buk, em mi kisim ol i go pinis long skul.”

Mipela i ting dispela gutpela buk i gat 320 pes na ol naispela piksa long en, em bai helpim yu tru. Sapos yu laik kisim wanpela o yu laik bai wanpela i mekim Baibel-stadi wantaim yu, no gat pe, salim pas long IBSA, Box 636, Boroko, NCD 111, Papua New Guinea, o lukim atres long pes 5 em i stret long yu.