Ol Meri i Stap Longpela Taim Moa, Tasol i Stap Bilong Ol i No Gutpela Moa
LONG olgeta hap bilong graun, planti meri i no save marit taim ol i yangpela, na ol i no karim planti pikinini, na ol i stap longpela taim moa. Nius UNESCO Sources i tok, “I stap bilong ol meri i wok long senis.” Namel long 1970 na 1990, long ol kantri i gat planti wok bisnis, kirap long taim mama i karim ol, ol meri i stap inap 4-pela yia moa, na long ol kantri i kamap gutpela liklik long wok bisnis em klostu 9-pela yia. “Dispela i makim olsem, long ol kantri i gat planti wok bisnis long nau, ol meri i save stap laip inap 6 na hap yia moa, winim ol man. Na long ol kantri i no gat planti wok bisnis, olsem long Latin-Amerika na ol ailan bilong Karibian, ol meri i save stap laip 5-pela yia moa, na long Afrika 3 na hap yia, na long Esia na ol ailan Pasifik, 3-pela yia.”
Tasol planti meri, maski ol i stap longpela taim moa, dispela i no makim olsem i stap bilong ol i gutpela moa. Wanpela nius (Our Planet) bilong Yunaitet Nesen i tok, planti meri ol i no kisim ol ‘samting i stret ol i mas kisim. Ol i wok yet long kisim liklik samting bilong skin.’ Tasol Yunaitet Nesen i tok, planti milion meri long olgeta hap, ol i no inap kisim ol dispela samting i stret ol i mas kisim, long wanem, long bikpela lain i stap long graun na ol i no inap rit rait, na ol i refyuji, na ol i stap rabis, em ol meri. Nius UNESCO Sources i pinisim tok olsem, maski i gat sampela gutpela samting i kamap, ‘long olgeta hap i no gat planti gutpela samting i wok long painim ol meri.’