Pasin Yumi Ken Bihainim
WANPELA MAN LONG SILI I RAITIM DISPELA STORI BILONG KIRAP!
Giacomo Castelli em i gat wanpela flet long Antofagasta, em wanpela biktaun long hap not bilong Sili. Inap 170,000 manmeri i sindaun long dispela taun. Long Jun 1996, em i bin sanap long veranda na lukluk i go daun long wanpela pak klostu, na em i lukim wanpela liklik lain i stap long en. Em i salim pas long niuspepa El Mercurio i tok olsem: “Samting mi kirap nogut long en, em long lukim ol yangpela i lap na amamas wantaim papamama bilong ol.” Dispela pasin i narapela kain na bilong save gut long en, em yet i go long pak.
Em i tok: “Mi kirap nogut long narapela samting. Taim sampela bilong ol dispela famili i pinis long kaikai, olgeta wan wan i kisim ol liklik pipia i bin pundaun long gras, na putim insait long bek pipia bilong ol yet. . . .
“Mi gat laik long save, husat ol dispela narapela kain man. Mi wokabaut i go long wanpela pikinini meri i gat naispela skin inap long em i ken winim nambawan prais olsem naispela meri, na long gutpela pasin em i tokim mi: ‘Mipela ol Witnes Bilong Jehova, na mipela i kibung long Rekyonal Stediam.’ ” Winim 3,000 i go long kibung sekit na long belo, sampela bilong ol i bin go long dispela pak bilong kaikai.
Dispela man bilong raitim pas i tok: “Mi wanpela Apostolik Roman Katolik. Mi no save lusim Misa, na sampela yia i go pinis mi bin go long ples holi Lurds, long Frans.
“Mi bin go bikpela olsem wanpela Kristen, tasol mi no ken giaman, mi mas askim mi yet olsem: Ol dispela lain i gat wanem samting yumi ol Katolik—em lotu bilong planti manmeri long Sili—i no gat? Bilong wanem ol dispela yangpela i amamas long stap wantaim papamama bilong ol, tasol 3-pela pikinini meri bilong mi ol i save surik long mi taim mi toktok tasol long mipela i ken raun wantaim?
“Bilong wanem ol pikinini Katolik bilong yumi ol i save kros pait; bilong wanem ol i bikmaus na pilai ‘Paua Rensa’ taim ol i paitim ol narapela pikinini, . . . tasol ol dispela pikinini ol i stap isi, ol i amamas, na ol i no laik bai ples bilong yumi i bagarap? Bilong wanem yumi ol Katolik i no inap bung wantaim na lusim tingting long ol samting bilong bisnis i save kamap long ol bikpela ples holi bilong yumi bilong mekim lotu, olsem ples holi La Tirana, na Abdakoyo, na ol narapela?”
Long rot bilong wanpela askim Mista Castelli i pinisim pas em i bin raitim long niuspepa olsem: “Olsem wanem? Yumi ol man i tok yumi Katolik na Kristen, bai yumi inap kamap olsem ol? Mi laik God na Virgo i helpim yumi long mekim olsem.”