Wanpela Paradais i Narapela Kain
WANPELA MAN LONG KANADA I RAITIM DISPELA STORI BILONG KIRAP!
TAIM yu sanap antap long kil bilong wanpela baret na lukluk i go long ples daun, bai yu kirap nogut long lukim gutpela ples tru—ol liklik maunten na ol traipela baret. Yu inap lukim bikpela hap graun i gat gras long en na i olsem i no gat pinis bilong en. Win i kam na bringim strongpela smel bilong wanpela kain sayor ol i kolim sej, em gutpela smel bilong dispela hap.
Tingim dispela: Long 200 handet yia i go pinis, yu inap raun planti de long dispela bikpela hap graun bilong Kanada i gat gras long en na oltaim yu inap lukim traipela lain bafalo, na taim planti milion lek bilong ol bafalo i pairap yu inap pilim graun i guria. Ol bikpela lain animal bilong Afrika i save wokabaut i go longwe long ol narapela hap, ol i no inap winim ol dispela bafalo i raun long dispela bikpela ples gras.
Long nau i gat sampela samting tasol i stap olsem mak i kamapim klia olsem bipo ol bafalo i bin raun long dispela hap, em ol bikpela ston ol bafalo i bin rapim skin bilong ol long en. Han bilong yu inap pilim ol kona bilong ston i stret na long graun yu inap lukim ol baret i raunim ol ston. Em samting ol dispela planti tausen bafalo i bin mekim taim skin bilong ol i skrap na ol i bin rapim skin long ol ston. I no strongpela win tasol i kam long hap bilong wes i mekim na aiwara i pulap long ai bilong yu, nogat; yu kirap nogut long lukim ol gutpela samting God i bin wokim na yu pilim dispela long bel bilong yu. Yu stap we? Yu stap long wanpela paradais i narapela kain.
Wanpela Pak i Narapela Kain
Mipela tok amamas long yu kam long nesenel-pak ol i kolim Grasslands, long hap bilong saut-wes long Saskatsiwan, Kanada. Dispela pak tasol long Not Amerika ol man i bin makim bilong lukautim kain kain gras. Pak i gat hap bilong is na hap bilong wes, na narapela i stap longwe long narapela inap 22.5 kilomita. Bihain ol bai skruim dispela pak i go bikpela moa inap 900 skwe kilomita.
Planti samting i mekim na i hatwok long raun long dispela hap. Bilong lukim dispela pak, em i gutpela long wokabaut long lek o raun long hos. Ol man i no save pret, ol inap wokim kem na slip ausait aninit long ol sta, tasol ol i mas kisim wara na kaikai samting i go wantaim ol. (Lukim blok “Raun na Lukim Pak.”) Taim yu raun long dispela pak, yu no inap lukim ol haus bilong nau, ol rot i gat kolta, ol waia bilong paua, ples bilong tromoi pipia, na ples bilong putim ol ka. Na ating yu no inap bungim narapela man. Tru tumas, em i wanpela paradais i narapela kain! Taim yu go insait long dispela pak, yu go insait long wanpela hap i gutpela tru.
I no gat narapela hap long graun ol man i bin senisim ol samting bilong en olsem ol i bin mekim long dispela bikpela hap graun tru bilong Not Amerika i olsem ples stret (Great Plains). Klostu 200 handet yia i go pinis, dispela hap graun olgeta em i stap nating tasol. Long nau, liklik hap tasol (25 pesen) bilong dispela ples gras long Kanada ol man i no bin mekim wanpela samting long en. Long 1833 samting, ol man i kisim tingting long lukautim dispela ples gras na mekim dispela hap i kamap wanpela pak. Winim wan handet yia bihain, em long 1957, wanpela lain (Saskatchewan Natural History Society) i kirap mekim wok bilong kamapim wanpela nesenel-pak.
Tasol ol i mas wet inap long 1988, na gavman i tok dispela hap graun em wanpela nesenel-pak. Dispela pak na sampela pak moa long dispela bikpela hap graun bilong Kanada i gat gras long en, i lukautim 22 narapela narapela kain liklik diwai na plaua, na ol animal, na ol pisin, em ol i stap long lista bilong gavman bilong Kanada i tok, ol i laik pinis. Na ol dispela pak i lukautim planti narapela animal, plaua, na pisin, em sampela bilong ol i no stap long narapela hap bilong graun.
Sampela taim dispela pak ol i kolim Grasslands i kol nogut tru na sampela taim i hat nogut tru. Dispela pak i stap namel long kantri, olsem na solwara i no inap daunim kol na hat bilong pak. Olsem na long taim bilong kol, em i kol nogut tru (-50°C) na long taim bilong san, em i hat nogut tru (40°C). Ren i save pundaun liklik tasol na win i save kam olgeta taim, olsem na em i no gutpela hap bilong i stap long en.
I gat planti wel animal i stap, maski yu no inap lukim ol hariap. Tasol sapos yu no les, ating long tulait na long taim san i laik go daun, yu inap kisim poto bilong dia, weldok, bikpela rabit, bikpela pusi, pisin, snek, kain kain tarangau, wanpela kain antelop (ol man i tok, em i save ran hariap tru, winim ol narapela bikpela animal long Not Amerika), o wanpela lain dok i gat blakpela mak long tel na ol i stap long dispela hap tasol long Kanada. Yu inap lukim tu planti narapela pisin na binatang na ol liklik diwai na plaua i bilong dispela hap stret.
Kain Kain Samting i Kamap Bipo Long Dispela Hap
Sapos yu laik go lukim dispela narapela kain pak, mipela i laik kirapim yu long kisim sampela save long en. Bai yu kisim save olsem, bipo kain kain samting i bin kamap long dispela hap. Olsem: Ol mak bilong wanpela rot (North West Mounted Police Red Coat Trail) bilong bipo i stap yet. Long 1874, gavman bilong Kanada i harim tok win olsem ol Indian i laik pait wantaim ol waitman, orait gavman i salim 300 polis i go long hap bilong Wes bambai ol man i mas bihainim lo na i stap gut. Na dispela i daunim pret bilong planti man em ol i bin pret olsem Yunaitet Stets bai kisim hap Wes bilong Kanada. Ol polis i pasim retpela saket na ol i raun long ol gutpela hos, olsem na ol i luk naispela tru. Dispela i mekim na i kam inap long nau ol man i save kolim dispela rot ol i bin raun long en olsem Rot Retpela Saket.
Long 1878, dispela hap i kamap ples sindaun bilong wanpela Indian bilong pait. I no gat narapela Indian ol man i save pret nogut tru long em long Not Amerika. Nem bilong dispela Indian em Sitting Bull na em i bikman bilong lain Su. Bihain long dispela, lain Indian bilong Su i winim lain soldia bilong Custer long wanpela hap (Little Bighorn), planti tausen Indian bilong Amerika na ol i bilong lain Su ol i ranawe i kam long dispela hap bilong Kanada bilong painim ples hait na ami bilong Amerika i no ken kisim ol.
Long dispela pak i gat inap 1,800 ples bilong bipo tru, na ol i bikpela samting long ol man i save painim ol samting bilong bipo. Long planti kil bilong maunten, na antap long ol liklik maunten i gat ol bikpela ston i sindaun long raunpela lain. Bipo ol dispela bikpela ston i holim arere bilong ol haus sel ol Indian i bin wokim long skin bilong bafalo bambai win i no inap rausim haus sel. Na i gat sampela rot ol Indian bilong dispela ples gras ol i bin mekim wok long en bilong bungim ol bafalo. Inap planti handet yia i go pinis, dispela hap graun i gutpela ples bilong ol lain Indian olsem ol Grovan, Kri, Asiniboin, Blakfut, na Su ol i painim abus long en.
Long bipo tru, long hap is bilong pak, ol i bin painim ol bun samting bilong animal dainaso namel long sampela liklik maunten (Killdeer Badlands) em graun bilong en i bruk bruk.
Gutpela Hap Tru
Sapos yu no kirap nogut long planti kain kain plaua na diwai na animal o long ol samting i bin kamap bipo tru long dispela hap, bai yu kirap nogut long bikpela bilong dispela hap graun. I gat krai bilong planti tausen kain kain pisin, na smel bilong liklik sayor sej, na yu inap pilim hat bilong san na strong bilong win long skin bilong yu. Na kaikai ol i bin redim long stov bai swit moa taim yu lukluk long dispela hap i gutpela tru na ai bilong yu i no inap les long en. Na gutpela samting tru, i no gat wanpela samting i pasim ai bilong yu long lukluk i go long olgeta hap bilong dispela pak, na i gutpela moa sapos yu raun long wanpela rot (Two Trees Interpretive Trail) i stap long hap wes bilong pak. Skai antap i blupela na wan wan waitpela klaut i bilasim gut skai. Dispela bikpela hap graun i mekim na yu pilim olsem yu stap fri, na yu pilim olsem yu samting nating na ol samting yu lukim i bikpela samting.
Taim yu stap long dispela bikpela hap graun i gat gras long en, i no ol samting yu lukim tasol i olsem bikpela samting, nogat; em ol samting yu pilim long bel tu. Samting yu pilim long bel bai pulim yu long kam bek long dispela paradais i narapela kain. Ol samting yu lukim long ai bai kirapim bel bilong yu long tenkyu long God. Ol tingting bilong givim biknem long Jehova, em Bikpela Man bilong wokim ol dispela samting, bai pulap long tingting bilong yu. Klostu nau, dispela taim yumi wet long en inap longpela taim bai kam, na graun olgeta bai kamap wanpela paradais i gutpela olgeta.
[Blok long pes 24]
Raun na Lukim Pak
Tingim dispela
1. Taim yu no go insait yet long pak, givim nem bilong yu long ol wokman bilong pak na kisim ol pepa i gat ol toksave long en.
2. Kisim planti wara bilong dring i go wantaim yu. Yu inap kisim wara bilong dring long wanpela hap tasol, em long hap yu kisim ol pepa i gat toksave long en.
3. Putim hat bilong pasim san na putim strongpela su i gutpela bilong wokabaut long en na i kam antap long skru daunbilo long lek, nogut plaua i gat nil i sutim lek.
4. Taim yu wokabaut, holim wanpela stik bilong paitim longpela gras.
5. Sapos yu gat kamera na kompas bilong lukluk longwe, kisim ol i go wantaim yu. Long tulait na long taim san i go daun, em gutpela taim long lukluk long ol animal.
TOK LUKAUT: No ken putim han o lek bilong yu long ol hap yu no inap lukim. Ol snek inap kaikaim yu sapos em i no gat rot long ranawe o yu mekim sampela samting snek i kirap nogut long en. I tambu long mekim nogut long ol animal o raunim ol animal i stap long wanpela nesenel-pak.
[Piksa Kredit Lain long pes 23]
Olgeta piksa: Parks Canada