Yeloston—Hap Bilong Wara, Ston, na Paia

Wanpela wokman bilong Kirap! long Amerika i raitim dispela stori

Taim yumi stori long Yeloston, yumi stori long samting i kamap paslain long ol narapela, na long samting i win tru. Olsem: Em i namba wan nesenel-pak i bin kamap long graun. Ol man long olgeta hap i save olsem em i nambawan hap bilong lukim ol wara i sut i go antap tru, winim ol narapela wara i sut olsem. Na long Yeloston i gat wanpela wara long ples maunten i winim ol narapela long Not Amerika.

BEL bilong mi na meri bilong mi i kirap tru long lukim ol samting taim mi draivim ka i go long hap not bilong Yeloston Nesenel-Pak long Waioming, long Amerika. Taim mipela i stap pikinini yet, dispela nem Olt Fetful, na ol tok olsem “gaisa” na “hot spring” i kirapim tru tingting bilong mipela. Olsem wanem? Ol samting mipela i laik lukim bai gutpela tru olsem mipela bin tingting long en?

Long namba wan rot bilong go insait long pak, i gat wanpela kain get i traipela tru em ol i wokim long ston. Rait i stap long en i tok olsem: “Bilong helpim na amamasim ol manmeri.” Ol i opim dispela pak long 1872, na em i namba wan nesenel-pak i kamap long graun.

Pastaim mipela raun long hap ol i kolim ol Hot Spring Bilong Mamot, klostu tru long boda bilong Montana. Long dispela hap yu inap lukim ol samting hatpela graun i save kamapim. Wara bilong ol bikpela na liklik hulwara i wok long boil i kam antap. Hat bilong wara i mekim na smok i wok long lusim ol hap bilong graun i bruk. Marasin trevatin i kam long graun i wokim sampela hap graun i retpela liklik na i luk olsem gris bilong kandel.

Wanem Samting i Boil Aninit Long Yeloston?

Long Yeloston Nesenel-Pak i gat 10,000 ol narapela narapela hap i gat ol kain kain samting em hatpela graun i save kamapim. Kil bilong maunten ol i kolim Kontinentel Divaida i brukim hap bilong ol maunten Roki. Na long dispela hap antap, sampela wara i ran i go daun long hap bilong wes, na sampela wara i ran i go daun long hap bilong is, tasol sampela wara i go insait long graun. Na mipela i kisim save olsem, em ol dispela wara i go daun insait long graun i wokim ol narapela kain samting i kamap long Yeloston-Pak. Bipo ol bikpela pairap bilong volkeno i seksekim dispela hap bilong ol maunten Roki. Na long planti tausen yia i go pinis, pairap bilong wanpela volkeno i wokim traipela hul, longpela bilong en i olsem 75 kilomita na braitpela bilong en i olsem 45 kilomita. Ol ston insait long graun i hat nogut tru na i tanim olsem wara, ol i boil i stap aninit long dispela pak.

Rait bilong sampela sain-bot bilong pak i stori olsem wara i save go daun isi isi insait long ol ston na bihain em i kamap long ol ston i hat nogut tru, na aninit long dispela hap ol ston i paia na kamap malumalum. Taim wara i bungim ol dispela ston i hat nogut tru, em nau, dispela i mekim na wara i go antap gen. Sapos ol ston samting i no pasim wara, wara bai kam antap na kamapim wanpela liklik raunwara i hat, ol i kolim hot spring. Tasol taim ol samting i pasim hatwara long kam antap, wara bai boil i stap na kisim strong na bihain em bai sut i kam antap tru, dispela wara i sut ol i kolim gaisa. Long sampela hap, smok tasol bilong wara i save kam antap, dispela ol i kolim fumarol. Na long sampela hap i gat graun malumalum i boil i kam antap. Em narapela kain samting tru long lukim!

Olt Fetful

Taim mipela lukim ol dispela samting long ol Hot Spring Bilong Mamot, mipela i gat tingting olsem mipela stap klostu long dispela gaisa i gat biknem tru, em Olt Fetful. Tasol taim mipela lukim mep, mipela i kisim save olsem Olt Fetful i stap longwe olsem 80 kilomita long hap saut. Pastaim mipela i no ting Yeloston-Pak i karamapim bikpela hap tru olsem 900,000 hekta.

Bilong kamap long hap Olt Fetful i stap long en mipela bihainim wanpela rot i stap long hap wes bilong pak. Long dispela rot ol turis i ken lukim 5-pela hap i gat ol gaisa long en. Long dispela hap smel bilong salfa i stap na mipela lukim ol smok i lusim graun na kam antap.

Olsem planti milion manmeri long bipo, taim mipela kamap long dispela hap bilong Olt Fetful (insait bilong dispela nem i olsem man i stap gut long wok) mipela laik save wanem taim wara bai sut i kam antap. Mipela i bin tingting olsem dispela gaisa i save bihainim taim bilong sut i kam antap​—⁠olsem em bai sut na 57 minit bihain em bai sut gen. Mipela lukim wanpela sain-bot i toksave olsem ol i ting dispela gaisa bai sut gen long 12:47 long belo bek. Nau mipela mas wet longpela taim liklik, winim wanpela aua, na ol i no save gut olsem em bai sut o nogat! Mipela givim askim long Rick, em wanpela man i wok long pak.

Rick i tok: “Em wanpela stori nating olsem Olt Fetful i save bihainim wankain taim na sut i kam antap, em i save sut long kain kain taim. Tasol ol guria na pasin bilong ol hambak lain long tromoi ol pipia insait long hul em wara i save sut long en, ol dispela samting i mekim na wara i no save sut klostu klostu olsem bipo. Long nau, em bai sut na insait long 80 minit samting em bai sut gen. Mipela ol lain i wok long pak inap toksave tasol long taim mipela ting olsem em bai sut.”

Klok i makim olsem em 12:30. Mipela wokabaut i go long Olt Fetful bilong lukim wara i sut long taim ol i ting em bai mekim. Planti handet manmeri i stap, sampela i sindaun pinis long hap bilong lukim wara na sampela i wokabaut i kam. Inap 10-pela minit mipela wetim wara i sut. Na taim wara i sut, em samting i gutpela tumas na i winim tru pasin bilong lukim long poto tasol. Pastaim em i sut liklik na bihain em i sut strong moa. Olgeta i paitim han. Wara i sut i go antap inap long 3-pela minit samting, na mipela amamas, long wanem, wara i sut i go antap tru, winim planti ol narapela taim. Wara i sut na bihain i sut strong moa, sampela taim wara i go antap olsem 37 mita na sampela taim i go antap olsem 46 mita. San i mekim na wara i lait gut tru taim wara i bihainim kain kain rot long kam daun long graun gen.

Taim wara i no sut moa, mipela go long haus pasindia i stap klostu. Tasol Olt Fetful i mekim yet ol samting ol man i no inap lusim tingting long en. Long dispela de olgeta, taim ol i ting olsem em bai sut, ol man bilong haus pasindia i lusim ol samting ol i wok long mekim na go ausait bilong lukim wara. Planti taim long dispela de wara i gutpela tru long lukim, em i sut longpela taim na i go antap tru, na em i naispela moa yet taim san i laik go daun. Mipela ting dispela olpela gaisa i stap gut yet long wok bilong en.

Dispela man i wok long pak, em Rick, em i tok: “I gat 500 gaisa i stap long graun olgeta, na planti bilong ol, olsem 300, i stap long Yeloston. Na 160 bilong ol gaisa bilong Yeloston ol i stap long wanpela hap graun i bikpela olsem 2 kilomita tasol, nem bilong dispela hap em Apa Gaisa Beisin. Sampela gaisa i save sut na bihain ol i no sut moa​—⁠olsem sampela i wok yet na sampela i slip i stap​—⁠tasol Olt Fetful i wok yet.” Gaisa i stap klostu long Olt Feftul, em Grand, na em inap sutim wara i go antap olsem 60 mita. Narapela em Stimbot, em inap sutim wara i go antap olsem 120 mita, na dispela i winim tru Olt Fetful, tasol Stimbot inap slip i stap planti yia na bihain em i sut gen. Long hap ol i kolim Noris, sampela taim gaisa Ekinus i sutim wara i hat liklik i go long ol man.

Resis Wantaim Bafalo

Long moning antap mipela skelim wanpela pepa ol i wokim bilong ol turis. Pepa i tok: “Graun antap long sampela wara i hat tru em i no strong tumas; sampela wara i wok long boil na i hat nogut tru. Long olgeta yia hatwara i save kukim nogut tru skin bilong sampela turis na sampela ol i save dai long dispela samting taim ol i lusim rot bilong wokabaut na raun long dispela graun i gat hatwara aninit long en.” Narapela pepa i tok olsem: “Lukaut: Ol bafalo i bin sutim planti manmeri long kom bilong ol. Sampela i bikpela olsem 900 kilogram, na ol inap ran spit tru insait long sotpela hap olsem 50 kilomita insait long wanpela aua, tasol yu no inap ran spit olsem.” Mipela no laik resis wantaim bafalo!

Long olgeta hap bilong pak, ol ka i mas larim ol animal i wokabaut long laik bilong ol long rot. Taim ol man i lukim wanpela animal long rot, planti ka bai sanap i stap long ol hap yu no ting bai i gat samting i pasim ol. Mipela i kamap long wanpela hap olsem, na mipela lukim ol turis i kalap gen long ka bilong ol. Taim mipela askim wanpela meri, ol man i lukluk long wanem samting, meri i tok: “Em wanpela traipela bafalo, tasol em i go pinis.”

Bihain mipela lukim ol narapela kain dia ol i subim ol nupela pikinini bilong ol long brukim wanpela wara. Long taim bilong kol ol dispela kain dia i stap long ples maunten, tasol long dispela taim ol i wok long lusim maunten na stap daunbilo. Tasol ol pikinini bilong ol i no laik kam​—⁠ol i no save olsem ol i mas brukim wanpela wara. Ol mama bilong ol i wok long singaut long ol, na isi isi ol i brukim wara.

“I Olsem Mi Samting Nating, i Olsem Mi No Gat Strong”

Bihain mipela kalap long ka na go long traipela baret tru bilong Yeloston. Mipela lusim ka long ol narapela narapela hap ol i makim bilong lukim gut baret, na maski mipela pret liklik mipela wokabaut i go long arere bilong baret na lukluk i go daun olsem 360 mita. Long buk i stori long raun bilong em long 1870, Nathaniel Langford i tok “i olsem mi samting nating, i olsem mi no gat strong,” em i kisim dispela tingting taim em i lukluk long tupela wara kalap na traipela baret i longpela olsem 32 kilomita na graun bilong en i yelo tru​—⁠em as bilong nem bilong wara Yeloston. Na mipela tu, taim mipela lukluk long ol dispela samting mipela pilim olsem mipela yet i samting nating.

Long de antap mipela raun i go long hap is. Nau ol samting i senis gen long pak. Long dispela hap i gat ol bikbus bilong maunten, na tupela taim rot i brukim Kontinentel Divaid. Na mipela lukim yet ol bafalo na ol narapela traipela animal; ol bafalo i sanap olsem mipela save lukim long ol poto. Tasol sori tru, mipela i no lukim ol bea​—⁠em narapela as na ol turis i save kam long Yeloston. Wanem samting i kamap long ol?

Inap planti yia ol bea i stap long hap ol man i save raun long en, long dispela rot sampela turis i bin kisim bagarap o indai. Na dispela i no gutpela long ol bea tu. Olsem na long 1972 samting, ol lain bilong lukautim Nesenel-Pak ol i pasim ol ples pipia, na isi isi ol bea i lusim pasin bilong kisim ol kaikai bilong man tasol. Dispela i mekim na ol bea i go long ol bikbus. Wok bilong pasim ol ples pipia i kamapim ol gutpela samting. Long nau ol bea i save kaikai ol samting i kru long bus, na ol i gat strongpela skin moa. Tasol ol turis i save bungim yet ol bea long sampela hap, olsem long dispela hap ol i kolim Fising Bris, ol bea i raun long dispela hap bilong painim kaikai, slip, na kisim pis, na ol man tu i save raun long dispela hap.

Mipela i bin makim Fising Bris olsem laspela hap mipela laik stap long en. Long dispela hap mipela i lukim laspela samting bilong dispela pak mipela i kirap nogut long en. Mipela lukluk i go long hapsait bilong raunwara Yeloston​—⁠em nambawan bikpela raunwara bilong ples maunten i stap long Not Amerika​—⁠na mipela lukim ol traipela maunten Titon i gat ais antap long het bilong ol. I no gat ol bea i raun, tasol samting mipela lukim i kirapim mipela long tingim wanpela hap not bilong Itali; olsem wara na ples maunten i wankain.

Nau em taim bilong mipela long lusim Yeloston. Mipela bin lukim ol gutpela samting long ai, na bel bilong mipela i amamas. Ol samting mipela lukim i gutpela moa yet, winim ol samting mipela ting bai mipela i lukim.

[Futnot]

[Blok/Piksa long pes 19]

Ol Paia Bilong 1988

Long pinis bilong mun Julai na Ogas long 1988, sampela liklik paia i kirap long Yeloston i kamap olsem 8-pela traipela paia ol man i no inap kilim i dai. Traipela san em i wanpela as bilong dispela hevi. Long taim bilong san long 1988 dispela hevi bilong bus i paia long Yeloston i bikpela tru winim olgeta narapela taim bipo. Ol bikpela win i narapela as bilong hevi. Strongpela win i raun spit tru olsem 80 kilomita insait long wanpela aua, na dispela i mekim na paia i wok long karamapim bikpela hap graun olsem 20 kilomita insait long wanpela de. Bipo ol man i no bin lukim pasin bilong win long kisim pipia bilong paia i go longwe tru olsem. Na dispela pipia i kirapim ol nupela paia.

Taim wok bilong kilim i dai paia i bikpela tru, bikpela mani olsem 325 milion kina i go bilong baim ol samting olsem 100 paia ka na 10,000 ol lain bilong mekim dai paia, em ol man bilong ami wantaim ol narapela man. Ol helikopta na balus i gat tang long en i wok long lusim 5,000,000 lita marasin samting bilong kilim i dai paia, na 40,000,000 lita wara. Tasol dispela i olsem samting nating long paia; paia i go bikpela moa yet na klostu em i kisim sampela hap ol man i stap long en. Olgeta de i gat bikpela smok i stap long win. Long pinis bilong mun Ogas, pak i luk olsem wanpela ples pait. Paia i kukim bikpela hap graun olsem 600,000 hekta, na i no pinis inap long taim kolwin i kirap na i gat ren na liklik ais i pundaun namel long mun Septemba.

Paia i no bin bagarapim tumas ol animal, na namba bilong ol turis i wok long go bikpela gen. Taim smok bilong paia i pinis, ol kala bilong ol lip long taim bilong kol i kamap ples klia long ol hap em bipo i hatwok long lukim, na taim kol i pinis ol plaua i save kamap nating long bus i kamap planti tru long ol hap bipo ol i no stap long en. Kirap long taim bilong paia i kam inap long nau, i gat planti ol nupela diwai i karamapim ol hap em bipo paia i kukim.

[Ol Piksa long pes 17]

Olt Fetful

Ol wara kalap

[Kredit Lain]

NPS Photo

[Piksa long pes 18, 19]

Wara Paiahul

[Piksa long pes 19]

Hul Moning Glori

[Kredit Lain]

NPS Photo