Buk i Kirapim Em Long Mekim Wok!
Wanpela man bilong Karakas, em nambawan biktaun bilong Veneswela, em i bin i go lukim lapun papa bilong em, Rufino. Papa bilong em i bin stap long La Loma, wanpela ples i stap longwe long taun. Pikinini i kisim buk Yu Inap i Stap Oltaim Long Paradais Long Graun i go long Rufino.
Bihain, ol Witnes Bilong Jehova long Los Humokaros ol i bin i go long La Loma bilong autim tok. Ol i kirap nogut long harim ol man i tok, wanpela Witnes i kam pinis long lukim ol. Ol Witnes i tingting planti, long wanem, ol i save i no gat wanpela Witnes i stap long dispela hap. Wanpela man i makim haus bilong man ol i tok em i wanpela Witnes—em haus bilong Rufino!
Rufino i bin amamas tru long bungim ol man i kam lukim em. Bilong wanem ol man long ples bilong em ol i bin tok em wanpela Witnes Bilong Jehova? Rufino i kirap long kaunim buk Stap Oltaim, na taim em i kaunim sapta 13, em i lukim piksa i kamapim Jisas taim em i salim ol disaipel bilong em i go autim tok. Rufino i save olsem, ol Kristen long nau i mas mekim wankain wok. Olsem na em i kirap long stori wantaim ol manmeri bilong ples long ol tok i tru bilong Baibel em i wok long kisim save long en.
Ol i kirapim Baibel-stadi wantaim Rufino, na ol i tokim em long ol miting bilong kongrigesen. Long Sande bihain, em i go long Haus Kingdom. Maski Rufino i gat 80 krismas, em i bin wokabaut inap 3-pela aua bilong i kam kamap! Kirap long dispela taim, em i no save lusim wanpela miting sapos em i no sik. Na em i insait tu long Skul Bilong Wok Autim Tok na em i mekim wanpela gutpela tok. Rufino i kisim sik, na em i dai long Julai 1996, na em i gat strongpela bilip long kirap bek na stap long Paradais long graun.
Mipela i ting taim yu kaunim dispela buk Yu Inap i Stap Oltaim Long Paradais Long Graun, em buk i gat 256 pes na ol gutpela gutpela piksa long en, em bai helpim yu tu. Sapos yu laik kisim wanpela o yu laik bai wanpela i mekim Baibel-stadi wantaim yu, no gat pe, orait raitim pas long IBSA, Box 636, Boroko, NCD 111, Papua New Guinea, o salim pas long atres i stret long yu long pes 5.