Hangre Long Ol Samting Bilong Spirit Long Romenia
WANPELA ripot bilong wanpela lain (Associated Press) long Brasov, Romenia, i tok, inap 90 pesen bilong ol 23 milion manmeri long Romenia ol i bilong Misin Otodoks, em misin gavman Komyunis i bin orait long en long mekim wok bilong en. Tasol nius Daily Record bilong Kanon Siti, Kolorado, Yunaitet Stets, i tok, long nau planti man i luksave olsem misin i no moa mekim ol gutpela wok. Het-tok bilong nius i tok: “Ol Manmeri Bilong Romenia i Ting Misin Otodoks i No Inap Helpim Ol.”
Long Oktoba 1996, nius i tok, “Alexandru Paleologu, wanpela saveman na man bilong raitim ol buk, em i tok, ol manmeri i no bilip long ol bikman bilong misin, na pasin na wok bilong lotu i paul pinis. Olsem: Ol manmeri i save wokim mak bilong kruse na i stap tambu long kaikai long ol de bilong en. Tasol pasin bilong rausim bel, em misin i tok em wanpela sin, dispela pasin i go bikpela.”
Nius Daily Record i tok, planti man i kamap Witnes Bilong Jehova, na nius i stori long olsem wanem pasin bilong ol Witnes long skulim ol man long Baibel i bin helpim wanpela famili: “Florentina Petrisor i tok, man bilong em i bin dring planti na paitim em, tasol taim tupela i kamap Witnes Bilong Jehova, famili bilong em i stap bel isi.”
Florentina i gat 38 krismas, na em i save mekim wok bilong samapim ol klos, “em i lusim Misin Otodoks, long wanem, misin i no save skulim gut ol na pris i save tingting tumas long kisim ol samting bilong skin.” Nius i stori: “Petrisor i tok, taim tambu papa bilong em i dai, paslain long em i baim kaikai bilong ol pikinini, famili i mas givim mani na kaikai long pris bambai pris i ken mekim gutpela tok bilong planim tambu papa. Em i tok, ‘Mi bin ting dispela pasin i no stret.’ ”
Long ol samting misin i mekim bilong kamapim ol tok giaman long ol Witnes Bilong Jehova, nius Daily Record i tok: “Long Romenia, Misin Otodoks, em ol i kisim gen strong, ol i kirapim gavman long senisim ples bilong wanpela bikpela bung bilong ol Witnes Bilong Jehova long dispela yia long nambawan biktaun Bukares na ol i mas kibung long biktaun Brasov na Klus.”
Kirap! (tok Inglis) bilong Februeri 22, 1997, i stori long ol samting misin i mekim bilong kirapim gavman long pasim kibung intenesenel em ol Witnes i makim bilong kamap long Bukares long Julai 1996. Long dispela nius, yu inap kaunim stori long olsem wanem ol i bin stretim rot hariap bilong mekim kibung long Klus-Napoka na Brasov olsem senis bilong dispela na olsem wanem 34,866 manmeri i bin bung long en. Planti man long olgeta hap ol i bin save long dispela samting. Wanpela Witnes i tok: “Misin Otodoks Bilong Romenia i ting dispela samting bai pasim mipela, tasol dispela i kamap olsem samting bilong mekim gutnius i go bikpela.”
[Piksa long pes 31]
Ol manmeri i mekim singsing long kibung long Brasov