Ol Witnes Bilong Jehova Long Is Yurop

TAIM Banis bilong Belin i bruk long Novemba 1989, wanpela nius (Asiaweek) i tok: “Tupela de bihain long banis i bin bruk, inap olsem 2 milion manmeri bilong Is Jemani i kapsait i kam insait long hap wes bilong Jemani.” Ol i go bilong mekim wanem wok?

Sampela i gat planti mani liklik ol i go bilong baim sampela samting bilong ol long ol stua, na ol narapela i go bilong lukluk raun tasol na pilim tru olsem nau ol i fri long raun i go i kam. Sampela ol i bungim ol Witnes Bilong Jehova arere long ol rot nabaut na ol i kisim sampela nius long ol. Kirap long dispela taim planti ol i bin salim pas long brens-ofis bilong Sosaiti Was Taua long Seltes, klostu long Frenkfut, na ol i stori long sampela gutpela samting i bin painim ol.

Wanpela pas i tok olsem: “Namba wan taim bilong mi long i go raun long Wes Belin, mi kisim wanpela Wastaua olsem presen long ol Witnes Bilong Jehova long rot. Kirap long dispela taim mi save kaunim tok bilong Baibel. Maski mi gat planti hevi, i gat wanpela man em inap strongim mi na mi inap i stap amamas. Bai mi amamas tru sapos mi inap kaunim buk Your Youth​—Getting the Best Out of It. Na mi laik tru long bung wantaim ol Witnes Bilong Jehova.”

Na narapela man i tok olsem: “Taim mi kam long rot ol i wokim aninit long graun na i kamap long hap bilong kisim bas long Nurembek, wanpela meri i givim sampela Kirap! na Wastaua long mi. Mi amamas tru taim mi kaunim. Inap sampela de nau mi mekim wok gen long Baibel.”

Long taim bilong biksan long yia 1990, ol Witnes Bilong Jehova i bin mekim tupela bikpela kibung long tupela biktaun long Is Yurop. Ol i mekim wanpela kibung long wanpela haus stediam (Olympia Stadium) em bipo i stap long hap bilong Wes Belin, na planti Witnes long ol narapela kantri na tok ples i bin kam, na sampela bilong Is Jemani tu i bin kam. Inap 44,532 olgeta ol i bung na 30,000 manmeri ol i bilong Is Jemani. Wanpela nius (Berliner Morgenpost) i tok, inap olsem 1,017 nupela Witnes i kisim baptais long wara​—ol i bihainim wankain pasin bilong ol Kristen bilong pastaim.

Olsem wanem na dispela senis i kamap long Jemani? Long Mas 1990, ol nius bilong Is Jemani i tokaut olsem, nau gavman i makim ol Witnes Bilong Jehova i wanpela lotu na ol i ken mekim wok bilong ol ples klia nau, na i no gat tambu moa. Het-tok bilong nius em “Ol i Pinisim Tambu long Ol Witnes Bilong Jehova,” na nius bilong Is Jemani (Mitteldeutsche) i tok: “Long Mas 14, ol i pinisim tambu ol i bin putim inap 40 yia bipo. Long dispela de ol Witnes Bilong Jehova long Jemani ol i kisim pas long Sekreteri bilong Dimokratik Ripablik bilong Jemani, em i lukautim wanpela dipatmen bilong gavman long Lotu samting na dispela pas i tok gavman i tok orait long ol i ken bihainim wanem pasin bilong lotu bilong ol na i no gat lo i pasim ol.”

Wanpela Witnes long Lepsik i salim pas na i stori olsem: “Long wik i go pinis mipela i kisim sampela kaikai moa bilong spirit long pasin hait. Na nau [Mas 14, 1990] gavman i pinisim tambu na mipela i ken mekim lotu olsem ol narapela lotu! Klostu nau bai mipela i kisim wanpela trak em i bringim ol buk na nius samting inap olsem 4-pela ton!” Namba wan trak i bringim 25 ton buk samting bilong Baibel, na insait long tupela mun bihain 250 ton moa bai kam. Dispela samting i kamapim long ples klia olsem ol Witnes i hangre tru long kisim ol kaikai bilong spirit inap 40 yia samting!

Mipela tingim taim bilong [Hitler] long Jemani na taim bilong ol Komyunis ol i bin laik long pinisim wok bilong ol Witnes long Jemani, tasol ol brata i stap strong yet na long nau tu dispela samting i helpim ol long bilip strong, na God i blesim ol long dispela.

Ol Witnes Bilong Jehova long Rasia

Long Disemba 1989, Mikhail Gorbachev em i bungim Pop John Namba 2 long Vatiken long Rom. Wanpela nius bilong Rasia (Pravda) i kolim gen toktok bilong Gorbachev olsem: “Mipela i bin toktok gut wantaim. . . . Mipela i bin stori long ol samting bilong lotu na ol samting bai kamap klostu nau long Yurop na olgeta hap bilong graun, na long Rasia tu.” Na nius bilong Vatiken, (L’Osservatore Romano) i kamapim tok bilong Gorbachev, em i bin tokim pop: “Ol man bilong kain kain lotu i save stap long Rasia, olsem ol lotu ol i kolim Kristen, ol Muslim, ol Juda, ol Buda, na ol narapela lotu tu. Olgeta wan wan i ken kisim ol samting bilong spirit long lotu bilong ol yet. Klostu bai ol i kisim Lo bilong stap fri long ol samting bilong lotu long kantri bilong mipela.”

Ol i truim dispela tok long Septemba 1990. Gavman i kamapim nupela lo olsem olgeta lotu i fri long mekim ol wok samting bilong ol. Hap namba 3 bilong Lo i tok: “Ol man i ken bihainim tingting bilong ol yet, na ol wan wan i ken bihainim wanem lotu em i laik, o em i ken bung wantaim ol narapela tu. O sapos em i no laik long wanpela lotu, em samting bilong em, na em i ken autim bilip bilong em long ol narapela tu.”

I gat sampela tausen Witnes Bilong Jehova ol i stap long Rasia, na ol i wet long taim gavman bai mekim wok long dispela nupela lo. Long ol “Gutpela Tok Ples” Kibung long 1990, i bin i gat 17,000 manmeri bilong Rasia ol i kam long dispela kibung bilong tok ples Rasia long hap bilong Woso. Na nau ol i tingim wanpela taim bai ol yet i mekim ol kibung olsem long Rasia.

Wok i Kamap Gutpela long Polan

Long Me 1989, gavman i rausim tambu long ol Witnes Bilong Jehova long Polan. Bihain long dispela taim ol i bin sanapim wanpela haus brens, na nau ol i wokim ol samting bilong helpim wok bilong autim tok klostu long hap bilong Woso. Long bipo, ol i kalabusim sampela handet yangpela Witnes Kristen, long wanem ol i no laik insait long ami. Nau ol i mas soim wanpela pas na bai ol i no ken kalabus.

Ol kibung i bin kamap long Polan long 1989 na 1990 i kamapim klia olsem ol Witnes i gat bikpela wok tru long mekim. Wanpela ripot i tok namba bilong ol Witnes i go antap long olgeta mun long yia i go pinis, na nau winim pinis 97,000 manmeri i save autim tok. Klostu nau bai Polan i kamap namba 12 kantri i gat wan handet tausen Witnes.a Na long mun Epril i gat 188,861 manmeri ol i kam bung bilong tingim i dai bilong Krais.

Ol i Fri long Mekim Lotu long Romenia

Ol Witnes long Romenia tu ol i amamas tru long harim olsem nau gavman i rausim tambu long ol long mun Epril 1990. (Lukim blok long pes 29.) Bihain liklik, ol i stretim rot bilong mekim kibung sekit long kantri olgeta, na i gat 19,000 Witnes, tasol long wanpela kibung i gat samting olsem 44,000 manmeri ol i kam bung. Olsem na i gat planti manmeri long hap bilong Romenia nau ol i harim gutpela tok bilong Kingdom.

Na long 1990, ol i wokim “Gutpela Tok Ples” Kibung Distrik long tupela biktaun em Brasov na Klus-Napoka. Ol i mekim long tok ples Romenia, na long tok ples Hangari. Winim 36,000 manmeri ol i bung na 1,445 ol i kisim baptais.

Kirap long Janueri 1, 1991, ol i wokim Wastaua long tok ples Romenia long kala kala olsem ol i bin wokim long tok Inglis, na bai ol i kisim tupela taim long olgeta mun.

Na long narapela kantri i stap klostu, em Balgeria, planti ol i bilong lotu Otodoks (Eastern Orthodox), na gavman i tambuim yet ol Witnes long mekim wok bilong ol. Tasol em i larim ol i baim ol haus samting bilong wokim ol miting bilong kongrigesen. Inap 2 handet olgeta ol i go long Salonika, long Grik, long “Gutpela Tok Ples” Kibung Distrik em ol i bin redim long tok ples Hangari na long tok Grik.

Gutpela Samting long Hangari

Jun 27, 1989 em i bikpela de long ol Witnes long hap bilong Hangari, olsem wanpela nius (Magyar Nemzet) i tok: “Lain bilong gavman i lukautim wok bilong ol lotu samting, nau ol i tok lain Witnes Bilong Jehova i kamap fri long ol samting bilong lotu na i no gat tambu moa.” Ol i kamapim dispela stori long redio na long televisen olsem nau gavman i rausim tambu long ol Jehova Tan’ui (Witnes Bilong Jehova).

“Gutpela Tok Ples” Kibung Distrik i bin kamap long ol narapela biktaun bilong dispela kantri olsem: Peks, Miskolk, Debrin, Budapes. Na inap 2,000 samting bilong Sekoslovakia na Rasia tu i bin kam na 700 handet moa bilong Finlan tu. I gat 2,000 samting ol i bin kam long Romenia na sapos yumi bungim olgeta wantaim, em i inap olsem 21,568.

Kirap long Janueri 1990, ol Witnes long Hangari ol i kisim ol magasin long olgeta mun na i gat kala kala long en wankain olsem ol i wokim long tok Inglis.

Wok i Go Bikpela long Sekoslovakia

Kantri Sekoslovakia i gat ol naispela maunten, na tu graun bilong en i gat gutpela gris, na maski wok bilong ol Witnes long dispela hap i tambu yet, wanpela ripot i tok: “Ol i autim tok long ples klia tru na ol i mekim ol bikpela bung tu. Ol i pilim olsem klostu nau bai gavman i rausim tambu long ol.

Bihain long ol dispela senis i bin kamap long Is Jemani long Novemba 1989, kwiktaim ol Witnes long Sekoslovakia i kirap stretim rot bilong mekim ol kibung sekit long mun Epril i go inap long Jun 1990. Na em namba wan taim ol man bilong wokim nius ol i mekim sampela gutpela tok long ol Witnes. Nau i gat olsem 21,000 Witnes long Sekoslovakia, na long 1990 i gat 40,295 ol i bin kam long bung bilong tingim i dai bilong Krais. Planti kongrigesen i bin baim long mun ol haus samting bilong mekim ol kibung, na 12-pela kongrigesen i gat Haus Kingdom bilong ol yet.

Long wanpela kibung ol i bin mekim long Prak long Ogas 1990, inap 23,876 manmeri ol i bin kam bung na 1,824 manmeri i kisim baptais. Na samting olsem 9,500 Witnes ol i lusim olsem 58,000 aua bilong i go klinim na penim stediam bai ol i bung long en. Wanpela man bilong kisim stori bilong televisen long Sekoslovakia em i tok: “Mipela i bungim planti lain manmeri tasol mipela i laikim tru pasin bilong lain bilong yupela hia long stediam. Mipela i kirap nogut olsem em namba wan taim nau yupela i redim wanpela bikpela kibung olsem.” Narapela man em i tok: “Mi laikim pasin i stap namel long yupela, em yupela i amamas long lukim ol narapela, na yupela gat pasin sori tru i stap namel long yupela. Yupela i mekim gut long mi olsem wanpela gutpela pren tru bilong yupela.”

Nau ol i wokim ol nius Wastaua na Kirap! long kala kala long tok ples Sekoslovakia na tok ples Slovak, na ol i wokim tupela Wastaua long olgeta mun, long tupela tok ples wantaim. Taim yumi skelim ol samting i bin kamap long yia i go pinis, yumi save dispela em i gutpela senis tru.

Ol Samting Bai i Kamap long Bihain

Orait, olsem wanem long wok bilong ol Witnes long autim tok long ol kantri em ol lain bilong nau i no save bilip long God? Wanpela ripot i tok: “I olsem planti ol i no save tumas long tok bilong Baibel na long God yet. Tasol gutpela samting em ol i no save bilip long ol tok giaman bilong ol lotu, olsem na ol i no gat wok long lusim ol dispela bilip giaman. Olsem na i gat bikpela wok tru long bungim ol dispela kain manmeri na autim tok bilong Baibel long ol.”

Orait, i gat wanem gutpela tok bilong Baibel ol Witnes Bilong Jehova bai givim long ol dispela manmeri bilong Is Yurop? Narapela stori i kamap bihain bai i stori moa long dispela samting.

[Ol Futnot]

[Blok long pes 18, 19]

Nau Ol i Fri long Mekim Lotu!

Daunbilo em sampela toktok ol Witnes bilong Is Jemani i bin mekim long taim ol i bin kam long “Gutpela Tok Ples” Kibung long Belin, long Julai 1990.

“Nem bilong mi Lidia. Mi gat 8-pela krismas, na mi bilong Dimokratik Ripablik bilong Jemani. Mi amamas tru long i go long dispela kibung distrik, long wanem long yia i go pinis, ol i tambuim yet lotu bilong yumi. Olsem na mipela i mekim Memorial long ples hait. Nau i no gat tambu moa! Taim olgeta i mekim singsing, aiwara i kam daun. Mi pilim tru dispela samting, olsem na bai mi stori long ol wanskul bilong mi long skul.”

Bernd em i tok: “Mipela i tok tenkyu long Jehova na mipela i amamas long i stap manmeri bilong em hia long Belin na mipela i insait long bikpela lain brata i stap long olgeta hap.”

Na Gotfrit em i tok: “Taim ol brata bilong Dimokratik Ripablik Bilong Jemani i kam sanap antap long pletfom, dispela em i gutpela samting tru: Jehova em i skulim ol manmeri bilong em na i mekim ol i kamap gutpela wokman bilong em, maski gavman i tambuim wok bilong ol.”

Egon i tok: “Taim olgeta i paitim han na ol i mekim singsing, dispela i soim olsem olgeta i amamas. Na taim ol i paitim han, bikpela pairap tru i kamap. Mipela save Jehova em i amamas long dispela!”

Haidran em i tok: “Mi kisim baptais pinis na sampela brata ol i askim mi, olsem wanem? Wara em i kol tumas? Mi tok, mi no save. Mi tingim ol gutpela blesing bilong Jehova na mi no pilim kol bilong wara.”

Yuta em i tok olsem : “Ol samting long hap bilong ol rum slip tu i narakain tru! Ol brata bilong Denmak, Mosembik, Inglan, Kalifonia, hap saut bilong Jemani, Spen, Dimokratik Ripablik bilong Jemani​—mipela olgeta i mekim singsing na mipela toktok wantaim long ‘gutpela tok ples.’ ”

Wulfgan em i tok: “Mipela i tingim yet sampela gutpela samting i bin kamap long tupela laspela kibung mipela i bin i go long en long 1958 na 1960 long Belin, na oltaim mipela i save stori long ol pikinini. Tasol dispela kibung nau em i winim tru ol narapela bilong bipo.”

Monika na Renhat ol i tok olsem: “Long laspela singsing na beten long kibung, bel bilong mipela i pas, taim ol dispela planti tausen brata sista i sanap bilong mekim singsing na litimapim nem bilong Jehova. Aiwara bilong mipela i kapsait.”

[Blok long pes 23]

“Ol i Stretim Bek Ol Samting”

Dispela em i het-tok bilong wanpela ripot long wanpela nius bilong Romenia (Tineretul liber) bilong Ogas 11, 1990. Dispela nius i tok olsem: “Ol i stretim bek ol samting bilong lotu. Ol i save nogutim lain ‘Witnes Bilong Jehova,’ tasol ol Witnes i sanap strong na givim bel tru long bihainim Krais inap 40 yia na nau gavman i rausim tambu long ol, na ol inap mekim wok lotu bilong ol. Lain Bilong Bosim Ol Witnes Bilong Jehova i lukautim olgeta wok bilong ol long olgeta hap bilong graun inap olsem 210 kantri na ol ailan ol dispela kantri i bosim.” Bilong pinisim dispela stori, dispela nius i tokaut long ol kibung bai kamap long Brasov na Klus-Napoka long mun Ogas.

[Ol Piksa long pes 19]

Ol wok samting long kibung: (kirap long han kais, daunbilo) ol i kisim nupela buklet long Woso; pletfom bilong mekim tok ples Hangari na Romenia, long Budapes; Belin​—ol i raitim sampela tok; ol i stretim ples bilong mekim kibung, long Prak

[Ol Piksa long pes 20]

Ol wok samting long kibung: (long han kais na raun i go) ol i baptais long Romenia; stediam long Prak; famili i holim buk “ Mankind’s Search for God” long Belin; man bilong mekim tok, long Budapes; ol i skelim tok bilong Baibel long Polan