Ol i Amamas Tru Long Isten Yurop
LONG 1991, kirap long Jun i go inap Septemba, planti tausen manmeri i go long ol biktaun bilong Isten Yurop. Long ol rot bilong Budapes, na Prak, na Sagreb, na 20 narapela biktaun, planti manmeri tru ol i pasim blupela na waitpela kat long klos bilong ol, na i makim ol olsem ol manmeri i laikim pasin bilong i stap fri em God i givim long ol. Ol dispela manmeri em ol Witnes Bilong Jehova, na ol i go bung long ol kibung bilong ol.
Em namba wan taim tru ol kibung i kamap long ol ripablik bilong Rasia i stap long hap bilong Yurop, na long Saibiria na wanpela ripablik bilong Rasia long hap bilong Esia, em Kasakstan, na ol man i no pret moa long polis i kam na kalabusim ol. Namba bilong olgeta man i bung long ol dispela kibung long hap bilong Sekoslovakia, Hangari, Yugoslavia, Polan, Romenia, Rasia, em olsem 370,000.
Sapos yu stap long ol dispela hap, bai yu pilim tru bikpela amamas em ol 74,252 manmeri long Rasia i pilim taim ol i bung long namba wan taim tru long ples klia na lotuim God Jehova, na ol i no pret long polis i kamap na kalabusim ol. Wankain amamas i kamap taim 74,587 i bung long Prak long hap bilong Sekoslovakia, na long 40,601 manmeri i bung long ol traipela stediam long Budapes long hap bilong Hangari, na dispela bikpela amamas i kamap tu long taim 14,684 manmeri i bung long biktaun Sagreb, long Yugoslavia.
Em i narapela kain samting tru, long wanem, i no longtaim i go pinis na ol gavman i bin tambuim wok bilong ol Witnes Bilong Jehova long planti kantri long hap bilong Isten Yurop. Olsem na ol i no save wanem samting i save kamap long hap bilong Wes. Maski liklik lain tasol i bung, gavman i bin tambuim dispela samting tu. Olsem na ol i amamas tru taim ol inap bung olsem long ol bikpela kibung na i no gat tambu!
Wanpela meri Witnes bilong Sekoslovakia i gat 59 krismas, bipo em i stap long kalabus inap 8-pela mun, long wanem, em i stap gut long God. Em i tok: “Bipo planti bilong mipela long Prak i laik bai wanpela bikpela kibung olsem i mas kamap long dispela stediam, tasol mipela i no bin ting ol samting bai kamap olsem nau i bin kamap.”
Tupela wik paslain long taim kibung i laik kirap long hap bilong Prak, em long Ogas 9 i go inap Ogas 11, wanpela nius (Večerník Praha) i tok: ‘Inap planti yia ol gavman i tok, ol Witnes Bilong Jehova i laik bagarapim wok bilong ol, olsem na lain Komyunis i tromoi planti long kalabus na ol i stap kalabus inap planti yia.’ Dispela nius i stori moa na ol i tok olsem klostu bai planti tausen Witnes i pulap long taun. Nius i tok: ‘Long namba tu wik bilong Ogas, yu inap bungim ol dispela lain, em ol i lain bilong lap na mekim gutpela pasin.’
Tasol ating bai yu gat ol askim olsem: ‘I gat gutpela as na ol gavman i tambuim wok bilong ol Witnes Bilong Jehova long bipo? I stret ol i laik bagarapim wok bilong ol gavman long ol kantri ol i stap long en? Planti manmeri i kam long ol dispela kibung, ol i kam long wanem ol hap? Gavman i bin pasim wok bilong ol winim 40 yia pinis, orait, olsem wanem na planti moa i kam insait long lain bilong ol?’