Ol i Kirap Nogut Long Samting Ol i Lukim

LONG mun Julai samting long 1991, ol Witnes Bilong Jehova long hap bilong Isten Yurop na long ol longwe hap bilong en olsem long Kasakstan na long Saibiria, ol i kisim gutpela nem, winim ol narapela taim bipo. Ol man bilong dispela hap yet na ol narapela em ol i kam long ol longwe ples ol i kirap nogut long ol samting ol i bin lukim.

Ol Witnes i kam bung long Sagreb, planti taim ol narapela i tokim ol olsem: “Mipela i ting bai yupela i no inap long kam!” Planti ol narapela turis ol i katim raun bilong ol​—tasol ol Witnes Bilong Jehova i no mekim olsem. Wanpela nius (The Times) bilong Landon i stori long dispela kibung na i tok: “Planti pait i kamap insait long dispela kantri na em namba wan kibung ol Witnes Bilong Jehova i mekim.”

Ol polis tu i kirap nogut long ol samting ol i bin lukim. Wanpela polis bilong Sagreb i tok: “Ol man bilong kisim nius bilong ol samting, i gutpela tru sapos ol i lukim dispela samting nau i kamap long stediam hia, ol man bilong Serbia na Kroesia, na Slovenia, na ol Montenegrin, na planti ol narapela lain moa, ol i sindaun wantaim long bel isi.”

Long Budapes ol i bin askim wanpela polis, em i ting olsem wanem long pasin i stap namel long ol dispela bikpela lain Witnes i bung na pasin i stap namel long bikpela lain manmeri i save bung long ol pilai soka. Polis i lap na i lukluk i go antap na em i bekim tok olsem: “Em i narapela kain samting tru, olsem heven na graun i narapela narapela kain.”

Mipela askim em: “Olsem wanem na yu tok olsem?”

Em i tok: “Yu lukim. I no gat wanpela i smok, na i no gat hap pipia i stap nabaut, na ol manmeri ol i bihainim gutpela pasin tasol. Na ol i mekim wanem wanem samting yu tokim ol long mekim.”

Long biktaun Kiev, bilong Yukren, inap 14,654 manmeri i bung long Stediam Dainamo, na yu inap lukim pes bilong sampela manmeri long skin bilong dispela nius. Wanpela Witnes i askim wanpela kepten bilong polis, ol lain bilong em i mas mekim bikpela wok long taim bilong kibung o nogat. Kepten i tok: “Nogat. Long narapela kibung long bihain bai mipela salim inap tupela polis tasol long yupela.”

Witnes i tok: “Bilong wanem bai yu salim inap tupela tasol?”

Kepten i lap na tok: “Taim wanpela i slip, narapela i ken lukautim em.”

Ol Narapela Manmeri i Kirap Nogut

Wanpela nius bilong Budapes, (Pesti Hírlap) i tok: “Winim 40,000 manmeri i stap long Népstadion long Fraide, Sarere, Sande. Tasol i no gat ol hap pipia pepa na bret na smok i stap nabaut.” Narapela nius (Fehérvár Hírlap) i tok: “Ol man i bin stap long dispela stediam long Julai 26 i go 28, ol i amamas tru long lukim ol gutpela samting tru. . . . Ol i lukim ol gutpela pasin Kristen i kamap namel long dispela lain manmeri.”

Long dispela 3-pela de bikpela ren i bin kam daun long Budapes. Tasol dispela samting i no pasim ol Witnes long kam. Wanpela polis i tok: “Em i gutpela samting tru! Mi kirap nogut! Planti tru bilong ol i wok long kam . . . No gat wanpela samting inap pasim ol long kam.” Long nius bilong Mande, ol i putim bikpela rait olsem, “Ol i Sanap Long Ren na Beten.” Na nius i kamapim tok bilong sampela long kibung olsem: “Ren i wasim mipela, tasol em i no rausim mipela i go! ”

Long Levov, inap 17,531 manmeri i bung long Sentral Stediam bilong Yukren, na wanpela plisman i tokim wanpela Witnes olsem: “Taim i gat ol bikpela bung bilong ol narapela manmeri, mipela i putim planti handet polis bilong lukautim ol samting. Tasol long dispela kibung bilong yupela, mipela i gat 10-pela polis tasol i raun, na ol i no gat planti wok.”

Em i tok em i kirap nogut long lukim ol samting i kamap long kibung hia na em i tok: “Lain bilong yupela i winim tru ol narapela lain long tokim ol man long bihainim ol gutpela pasin na lainim ol long kisim save long God, na yupela i no save insait long ol pasin bikhet nabaut. Namel long mipela yet mipela i stori olsem, mipela i no save putim yau na harim ol tok yupela i autim na mipela i no klia long ol samting yupela i mekim, olsem na planti taim mipela i save bagarapim yupela nating.”

Niusmeri bilong wanpela nius (Leninskiy Put’), bihain long em i go long kibung long Usoli-Sibirskoi, em i tok: “Mi kirap nogut tru long lukim pasin bilong ol wokboi bilong Jehova, ol i tingim tru na mekim gutpela pasin tasol long ol narapela narapela namel long ol yet. Mi no ken lusim tingting long ol toktok mi harim long dispela kibung, olsem: ‘Yu no ken stilim samting bilong narapela man! Yu no ken mekim tok giaman! Yu no ken dring [planti]! Kamapim ol gutpela wok samting! Na helpim ol narapela man i stap klostu long yu! ’ Olgeta manmeri i mas mekim ol dispela gutpela pasin, tasol planti taim mipela i save lusim tingting.

“Narapela samting mi kirap nogut long en, em olsem: Ol i save stap olsem brata brata na ol i givim bel long helpim ol narapela. Wanpela meri i givim niuspepa long mipela bilong mi ken sindaun long en na mi no ken sindaun long sia i gat das long en. Taim ren i kam daun, wanpela yangpela meri i sindaun klostu long mi i givim ambrela bilong em long mipela na em i lap wantaim, na narapela man i sindaun klostu em i lukim wanpela liklik manki em ren i wasim em pinis, na em i pulim manki i kam aninit long ambrela bilong em. . . .

“Ol dispela samting long kibung i helpim mi long kisim gutpela tingting na pasin. Mi no save long ol dispela manmeri, tasol mi bekim lap bilong ol long gutpela pasin sori ol i mekim long mipela. . . . Taim mipela i lusim stediam, ol gutpela klinpela tingting i pulap long bel bilong mipela, na em i olsem wanpela gutpela samting tru.”

Inap olsem 2,000 manmeri bilong Mosko ol i kam long dispela kibung long Kiev, na olsem 4,500 long hap bilong Kokesas. Ol i makim sampela man bilong i stap long ples balus bilong helpim ol narapela taim ol i kamap long ples balus, na tu, ol i putim long ples klia sampela nius na buk bilong Baibel. Ol Witnes i wok long dispela hap, long pasin isi ol i bekim planti askim bilong ol man. Wanpela taim long apinun wanpela man i kam long sampela Witnes i wok long dispela ples balus na em i tok: “Mi wok long skelim wok bilong yupela inap longpela taim nau. Na mi amamas long gutpela pasin yupela i mekim long autim tok bilong Kingdom long ol manmeri. Plis, mi laik givim dispela mekpas plaua long yupela olsem presen long gutpela wok yupela i mekim.”

Wanpela niusman i kam long kibung long Usoli-Sibirskoi na em i kirap nogut taim em i lukim sampela manmeri bilong Rasia i amamas na holimpas wanpela nupela man i kisim baptais na em bilong wanpela lain ol i kolim Buryat. Tru, long hap bilong Saibiria ol i no save birua tumas long ol man bilong narapela lain, tasol pasin bilong i stap pren tru i no kamap namel long ol Rasia na ol kain lain olsem. Olsem na dispela niusman i askim ol: “Wanem samting i bin helpim yupela long lusim dispela kain tingting long bel nogut long ol man bilong ol narapela kantri?”

Ol i tokim em, Baibel i tok ‘yu mas laikim tru ol arapela man olsem yu laikim yu yet,’ olsem na ol i bihainim dispela tok.

Ol i Stap Brata Brata Tru

Em gutpela samting tru long lukim olgeta manmeri i kam bung long dispela 3-pela kibung i strongim tru bel bilong narapela narapela. Ol man long 35 narapela kantri i kam kibung long Budapes, na planti bilong ol i kam long Polan na Jemani. Inap 500 i kam long Rasia. Long kibung long Prak, inap 39 kantri ol i kam kibung. Olsem 26,000 bilong Jemani i kam na 13,000 samting bilong Polan, na winim 900 bilong Itali, na 570 bilong Netelan, na 746 bilong Swiden, na 743 manmeri i kam long Japan. Na long kibung i kamap long Sagreb, ol manmeri bilong 15 narapela narapela kantri i kam long kibung, maski i gat pait i laik kamap long dispela kantri.

Ol i wokim 3-pela pletfom long ol dispela 3-pela kibung long stediam. Long ol dispela pletfom ol i mekim ol tok long 3-pela tok ples wantaim. Long Budapes ol tok i kamap long tok ples Hangari, Polan, na Jeman. Long Prak ol i mekim ol tok long tok ples Sekoslovakia/Slovak, na Polan na Jeman; na long kibung i kamap long Sagreb, ol i mekim ol tok long tok ples Kroesia/Serbia, na Slovenia, na Itali. Taim ol i mekim pilai bilong Baibel i kamapim ol stori bilong Esra na lain bilong em, ol i mekim long 3-pela tok ples, na ol manmeri i gat ol narapela tok ples ol inap sindaun long hap ol i laik harim tok long en.

Sampela brata long Lain Bilong Bosim Ol Witnes Bilong Jehova i kamapim ol bikpela tok bilong kibung long tok Inglis na ol narapela brata i tanim long tok ples bilong ol man i sindaun na harim tok. Ol i tanim ol dispela tok long 3-pela bikpela tok ples olsem Hangari, Polan na Jeman. Long Budapes na Prak, ol i tanim ol tok long dispela 3-pela tok ples wantaim planti narapela tok ples.

Ol man i tanim dispela ol tok i sanap long ai bilong ol manmeri i sindaun. I gat ol bikmaus i stap long ai bilong ol na ol tok i kamap klia long tok ples bilong ol bambai ol inap harim gut na ol i no ken paul long ol narapela tok ples. Olsem long Budapes, tok ol brata long Lain Bilong Bosim Ol Witnes Bilong Jehova i mekim ol i bin tanim long tok ples Holan, Finlan, Frans, Grik, Itali, Japan, Nowe, Spen, Swiden.

Laspela tok bilong ol dispela kibung i kirapim tru ol manmeri; 3-pela brata long Lain Bilong Bosim Ol Witnes Bilong Jehova i bin mekim dispela tok. Ol i wok strong long pinisim tok long wankain taim stret. Bihain olgeta i wanbel long mekim singsing, na long tok tenkyu long Jehova long rot bilong beten, long wanem em i bin blesim dispela ol kibung na ol samting i kamap gutpela.

Taim ol i tok “Amen! ” i no gat wanpela bilong ol i laik lusim stediam. Aiwara bilong ol i kam daun. Ol i sindaun long ol bikpela stediam na ol i meknaisim ol laplap na ambrela samting bilong tok gutbai long ol gutpela pren bilong ol, em ol i bin stap gutpela long God inap planti yia, maski gavman i putim tambu long wok bilong ol na sampela i bin i stap long kalabus. Long Prak, planti ol i stap na mekim ol singsing na toktok wantaim ol narapela inap wanpela aua bihain.

Ol samting long ol dispela kibung i wok gutpela tru, tasol dispela samting i no kamap nating, nogat. Ol Witnes Bilong Jehova i lusim planti tausen aua long redim ol samting bilong ol long kam long kibung na bilong redim ol samting bilong lukautim ol narapela ol bai kam long kibung.

Redim Ol Samting

Inap planti yia pinis na ol man i no bin mekim wanpela bikpela bung long bikpela Stediam Strahov long Prak, olsem na i gat bikpela wok tru bilong stretim ol samting. I gat 55,000 sia ol i ken mekim wok long en, tasol dispela i no inap long bikpela lain manmeri bai i kam long dispela kibung long Isten Yurop, olsem na ol i kisim wanpela masin em i bagarap liklik na ol i stretim bilong mekim wok long en bilong wokim ol bang. Ol dispela bang longpela bilong ol i olsem 19 kilomita na inap olsem 30,000 man inap sindaun long en.

I no dispela wok bilong wokim ol ples sindaun tasol, nogat. I gat bikpela wok bilong putim nupela pen, na bilong klinim ol hap, na kamautim ol gras nogut, na planti ol narapela wok moa bilong stretim ol samting. Taim olgeta wok i pinis ol i bilasim stediam long 8,300 liklik baket i gat 33,200 purpur long en na 1,357 ol liklik diwai. Sampela taim wan tausen manmeri bilong 260 kongrigesen bilong ol Witnes Bilong Jehova i kam na ol i lusim 66,000 aua long mekim dispela wok.

Ol i mekim wankain bikpela wok long redim ol samting long ol stediam long Budapes na Sagreb na long ol narapela biktaun. Long Levov inap 4,000 volantia i lusim 40,000 aua bilong redim ol samting bilong kibung. Ol i mekim gutpela wok tru, olsem na dispela em i olsem pe bilong stediam. Ol i stretim na putim nupela pen long ol bang bilong stediam, na tu, ol i klinim na stretim ol toilet. Ol i wokim wanpela haus brik, longpela bilong en em 30 mita​—em bilong putim sampela toilet moa. Ol i mekim olsem tu long Stediam Kimik long Usoli-Sibirskoi; ol i wokim 52 nupela toilet bilong kibung.

Wanpela ensinia bilong dispela stediam long Levov i tok: “Mi no bin lukim wanpela kain lain olsem yupela. Yupela olgeta i wok olsem wanpela bikpela famili. Mi no klia tumas long pasin bilong yupela, tasol mi amamas long wok wantaim yupela.” Lain bilong dispela stediam i wokim wanpela pas na ol i tok tenkyu long ol Witnes Bilong Jehova “long ol i bin givim bel tru long mekim gutpela wok long stediam na ol i bin kamapim ol gutpela pasin na ol i tingim tru wok bilong ol.” Long pinis bilong pas ol i tok: “Mipela laik tru bai yupela i mekim gutpela kibung long Levov.”

Long Kiev ol brata i mas stretim plua bilong haus kaikai. Ol i pinisim dispela wok insait long tupela de tasol. Tupela wokman bilong stediam i kam lukim ol brata i wok na wanpela i tokim narapela: “Long tupela de tasol ol i pinisim dispela wok, tasol ol lain bilong yumi yet i save winim 6-pela mun bilong pinisim kain wok olsem.” Wanpela presiden bilong wanpela klap bilong spot i tokim wasman bilong kibung olsem: “Yupela i mekim bikpela senis tru long dispela stediam na mipela i ting i no dispela stediam bilong bipo.”

Ol wokman bilong stediam long Kiev i raitim pas bilong tok tenkyu na ol i tok: “Bel bilong mipela i amamas tru long wok ol Witnes Bilong Jehova i mekim bilong redim ol samting bilong kibung bilong ol. . . . Mipela tok tenkyu long yupela long wanem pasin bilong yupela i lainim gut mipela.”

Lukautim Ol Narapela i Kam Long Ol Narapela Hap

Wanpela bikpela wok tru ol i mekim em bilong redim ol ples slip bilong planti tausen manmeri ol bai kam long kibung. Ol Witnes bilong ol dispela hap yet i redim haus bilong ol bambai ol narapela man i ken stap wantaim ol. Long kibung i kamap long Prak, ol brata bilong Sekoslovakia i givim ples slip bilong 6,280 manmeri i kam long Polan. Long Budapes, 2,203 manmeri i kam long kibung ol i bin slip long haus bilong sampela man. Na ol 278 Witnes bilong Kiev i kisim 750 i go inap 800 samting ol narapela brata i kam long kibung bilong stap wantaim ol.

Long Budapes na Prak, ol i kisim planti ol skul na ol bikpela haus pilai samting bilong skul olsem ples slip bilong ol narapela bai i kam. Ol i kisim 40 skul long Budapes na 7,930 manmeri i slip long en. Long Prak, 12,530 manmeri i bin slip long ol skul na haus pilai samting bilong ol skul. Ol i kisim planti tausen matres win bilong ol i ken slip long en. Winim 29,000 manmeri i go long kibung long Prak ol i slip long ol rum slip bilong ol sumatin bilong skul na long ol haus pasindia, na planti tausen moa i slip long ol hotel.

Long sampela kibung ol i stretim ol samting bambai ol Witnes i ken slip long ol dispela tren i bin bringim ol i kam long kibung. Inap 2,000 Witnes bilong Sakarpatska Oblas i slip long ol dispela tren taim ol i stap long Kiev. Na ol narapela bilong Kokesas em ol i kam long Kiev, ol tu i mekim olsem. Ol Witnes bilong Lituenia i go kibung long Talin, long Estonia, ol tu i bin slip long ol tren ol i kam long en.

Taim ol i kamap long ol hap bai kibung i kamap long en, ol Witnes bilong ol dispela hap yet i bin mekim ol samting bilong lukautim ol gut. Olsem: Long Prak ol i stretim rot bilong 40 bas i ron long rot em bipo wanpela bas tasol i ron long en. Ol Witnes i kam long ol narapela narapela ples i baim bas samting long pastaim yet, tasol ol i mas soim kat bilong kibung long ol draiva na ol inap kalap long bas o tren samting long moningtaim na long apinun bilong go bek long ples slip. Long Rasia, tupela ka bilong ol polis i lukautim 11-pela bas i go long kibung long hap bilong Usoli-Sibirskoi, wanpela ka i stap long baksait na narapela long poret!

Ol i Painim Rot Long Kam Long Kibung

Sampela Witnes bilong ol narapela hap ol i kam long ol kibung long Rasia ol i bin tromoi bikpela mani long baim rot bilong kam. Sampela i bungim mani inap wanpela yia samting bilong i go long ol kibung. Wanpela lain i bin kam long longwe hap tru, em biktaun Vladivostok i stap long hap bilong Solwara Pasifik, na ol sip i save kam sua long en. Ol i wokabaut long tren i kam olsem 3,200 kilomita bilong kamap long ples Usoli-Sibirskoi. Narapela 12-pela i lusim ailan Sakhalin long Solwara Pasifik long hap not bilong Japan bilong kam long dispela kibung. Wanpela bilong ol em wanpela yangpela em i gat 20 krismas, na 3-pela yangpela em i save mekim stadi Baibel wantaim ol, ol tu i kam.

Wanpela draiva bilong bas bilong ples Sayanogorsi, em i laik kisim baptais long kibung long Usoli, olsem na em i askim askim bos long em i ken malolo inap sampela de bilong i go long dispela kibung. Tasol bos bilong em i no laik larim em i go. Olsem na dispela man i draiv i go long biktaun Abakan na kisim pas bilong Mas 27, em pas bilong gavman long toksave olsem ol i rausim tambu long ol Witnes Bilong Jehova long Rasia na nau ol inap mekim wok bilong ol long ples klia. Tasol maski bos i lukim dispela pas, em i no tok orait long brata i ken go long kibung, olsem na paslain long em i lusim haus long moningtaim em i beten strong long Jehova. Bihain em i askim bos gen na nau bos i tok orait long em i ken i go long kibung.

Baptais na Ol Nupela Buk Samting

Taim bilong baptais em i bikpela samting bilong amamas long olgeta kibung long Isten Yurop. Inap 18,293 manmeri i kisim baptais long wara long ai bilong ol witnes na dispela i makim olsem ol i bin dediket long Jehova long mekim laik bilong Em. Wanpela yangpela man i kisim baptais long Prak, em i bin kisim wanpela wok mani i gat gutpela pe samting, tasol em i tok: ‘Mi bin skelim gut. Mi ting mi ken mekim dispela wok na kisim bikpela mani o mi ken mekim wok bilong Jehova. Mi tingting gut na pasim tok olsem mi no ken kisim dispela wok mani, mi mas mekim wok bilong Jehova.’

Long Talin ol i stretim ples bilong baptais klostu long Solwara Baltik. Wanpela olpela haus kalabus i sanap long baksait na bipo long 1950 i go 1955 samting, planti ol Witnes bilong Estonia i bin kalabus long hia na bihain ol i salim ol i go long banis kalabus nogut long Rasia. Ol dispela Witnes bilong bipo wantaim ol narapela i amamas tru long lukim 447 nupela man i kisim baptais long wara bilong makim olsem ol i dediket long Jehova!

Narapela gutpela samting long dispela kibung em ol nupela buk samting ol i bin kisim. Ol Witnes bilong Lituenia i kalap long sia bilong ol taim ol i kisim nupela buklet “Harim! Mi Mekim Olgeta Samting i Kamap Nupela!” long tok ples bilong ol yet. Long ol kibung long Romenia ol i kisim buk Revelation​—It’s Grand Climax At Hand! long tok ples Romenia, na ol Sekoslovakia na ol Slovak long Prak i kisim Baibel New World Translation of the Holy Scriptures long tok ples bilong ol.

Tasol long olgeta dispela kibung i gat wanpela samting em ol i amamas tru long kisim, em dispela buk Nambawan Man Tru i Winim Olgeta Narapela Man. Ol i wokim pinis 10 milion bilong dispela buk long 59 tok ples.

Ol i Stap Fri na Mekim Gutpela Wok

Long nau ol inap kisim ol nius na buk samting bilong Baibel i go insait long Isten Yurop na long ol hap bilong Rasia tu. Long ol bikpela faktori bilong wokim ol nius na buk samting bilong ol Witnes Bilong Jehova long Seltes/Taunas long Jemani, ol i kisim planti nius Wastaua na Kirap! long trak i go long ol kantri bilong Isten Yurop. Bipo i no olsem​—ol Witnes i mas wok hait long kisim ol buk na nius samting i kam long ol dispela kantri, na ol inap kalabus long dispela samting! Tasol nau ol i mekim long ples klia.

Dispela senis i kamapim planti gutpela samting olsem dispela stori daunbilo i makim. Wanpela man bilong skelim ol paspot samting i pasim wanpela Witnes Bilong Jehova long taim bilong kibung long Talin, na em i tok olsem:

“Yu gat wanem samting insait long dispela liklik katon?”

Brata i tok, “Em ol nius tasol.”

Man i tok, “Wanem kain ol nius? Ol nius bilong God? ”

Brata i tok, “Em i stret.”

Man i tok moa, “Ol nius bilong God Jehova?”

Brata i tok, “Yesa!”

Man i tok, “Em i gutpela. Yu ken i go.”

Bihain long kibung long Budapes, presiden bilong Hangari, (Arpad Goncz) em i singautim wanpela Witnes, em bipo tupela i bin stap wantaim long kalabus taim gavman Komyunis i bosim ples. Em i toktok wantaim dispela brata inap wanpela aua, na bihain em i askim brata long givim gude bilong em long ol Witnes Bilong Jehova. Ol man i laikim pasin bilong i stap fri long olgeta hap ol i amamas long ol bikman olsem Mista Goncz, long wanem nau ol i larim ol Witnes i mekim lotu long ples klia long hap bilong Isten Yurop.

Long Septemba 1991, wanpela nius (The New York Times) i stori long ol samting i kamap long hap bilong Sen Pitasbek (bipo ol i kolim Leningrad), na em i tok: ‘Ol man i sindaun long san, na ol pikinini i pilai na ranim ol dok, na ol man i wok bisnis long baim i go ol olpela mep bilong Sen Pitasbek, na ol Witnes Bilong Jehova i autim tok bilong painim ol man i gat gutpela bel.’

Tru tumas, nau ol Witnes i stap fri, olsem na ol i wok strong long autim gutnius! Yu laik kisim sampela save moa long tok ol i mekim? Wanpela nius (Vostochno-Sibirskaya Pravda) bilong Rasia i tok: “Yu inap kisim ol stori i kamapim gut wok bilong ol Witnes Bilong Jehova long ol ples ol i lainim ol man long en, long olgeta biktaun.” Olsem na maski yu stap we long dispela graun, yu no ken pret long askim ol.

[Sat long pes 13]

OL KIBUNG LONG ISTEN YUROP NA RASIA

Kantri Ol Man i Bung Ol Man i Baptais

Sekoslovakia (Prak) 74,587 2,337

Hangari (Budapes) 40,601 1,134

Polan (12-pela taun) 131,554 4,250

Romenia (8-pela taun) 34,808 2,260

Rasia (7-pela taun) 74,252 7,820

Yugoslavia (Sagreb) 14,684 492

Bungim 30 kibung wantaim: 370,486 18,293

[Ol Piksa long pes 8, 9]

Han sut: Long Prak ol i tanim tok bilong ol lain bilong narapela narapela tok ples

Daunbilo: I gat 74,000 manmeri i pulap long Stediam Strahov long Prak

[Ol Piksa long pes 10]

Antap: Kibung long Talin, Estonia

Kibung long Budapes. Maski ren o san, ol 40,000 manmeri i amamas long harim tok

[Ol Piksa long pes 15]

Antap: Sampela toilet ol i wokim bilong kibung long Usoli-Sibirskoi, Saibiria

Long Prak ol i penim stediam na ol i wokim sampela bang moa bilong ol man i ken sindaun long en

[Ol Piksa long pes 16]

Pilai bilong Baibel na baptais long Sagreb

[Ol Piksa long pes 17]

Antap: Long Jun 1991 ol i dediketim namba wan Haus Kingdom ol Witnes Bilong Jehova i wokim long Hangari

Namel: Winim 20,000 i slip long ol skul na ol haus pilai bilong ol skul long Budapes na Prak

Daunbilo: Ol i tilim buk “Nambawan Man Tru i Winim Olgeta Narapela Man” long ples Usoli-Sibirskoi, Saibiria