“Tok Ples i Narapela Narapela Tasol Pasin Laikim i Mekim Mipela i Wanbel”

Kisim bek man. Kamap fri. Inap planti handet yia ol manmeri i gat laik long ol hevi i ken pinis. Olsem wanem yumi ken karim ol hevi? Bai i gat rot bilong kisim bek yumi o nogat? Na sapos i gat, dispela bai kamap olsem wanem?

KIRAP long Me 2006, i gat ol 3-pela de kibung distrik em ol Witnes Bilong Jehova i bin kamapim i stori long ol dispela samting. Tim bilong kibung em “De Bilong Kisim Bek Yumi i Klostu!”

Nainpela bilong ol dispela kibung i gat planti tausen manmeri bilong ol narapela narapela kantri i go long ol. Ol i bin mekim ol dispela kibung long Julai na Ogas 2006, long Prague, biktaun bilong Ripablik Sek; long Bratislava, biktaun bilong Slovakia; long Chorzow na Poznan, Polan;a na long 5-pela siti bilong Jemani​—Dortmund, Frankfurt, Hamburg, Leipzig, na Munich. Namba bilong ol man i bin bung long ol dispela kibung i winim 313,000.

Ol man i bihainim wanem kain pasin long ol dispela kibung? Ol TV na niuspepa i tok wanem? Na ol man i bin go long ol dispela kibung i pilim olsem wanem taim ol kibung i pinis?

Redim Ol Samting

Ol visita na ol asples Witnes ol i amamas long wetim ol dispela kibung bikos ol i save ol bai tingim long olgeta taim bihain ol samting i kamap long ol. Painim ples slip bilong ol lain i kam long ol narapela kantri em i wanpela bikpela wok tru. Olsem: Long kibung long Chorzow, ol Witnes bilong Polan i orait long 13,000 brata bilong Isten Yurop i ken stap wantaim ol long haus bilong ol. I gat ol lain brata bilong Amenia, Belarus, Estonia, Jojia, Kasakstan, Kirgistan, Latvia, Lituenia, Moldova, Rasia, Tajikistan, Turkmenistan, Usbekistan, Yukren, na Yunaitet Stets.

Planti man husat i bin go long ol dispela kibung i bin kirap redim ol samting inap planti mun paslain. Tatiana, em i save mekim wok autim tok fultaim long Kamchatka, em wanpela hap bilong Rasia i stap not-is long Japan, i bin kirap bungim mani wanpela yia paslain long em i laik i go. Em i mas raun inap 10,500 kilomita bilong i go long kibung. Pastaim em i sindaun 5-pela aua long balus; bihain em i raun long tren klostu 3-pela de; na bihain yet em i raun long bas inap 30 aua bilong kam kamap long Chorzow.

Sampela tausen i volantia long mekim wok paslain long kibung. Ol i stretim ol stediam na hap graun bilong ol na mekim ol i fit tru long mekim lotu long en. (Lo 23:14) Yumi stori long wanpela kibung olsem: Long Leipzig ol asples Witnes i klinim stediam gut tru, na ol i promis long klinim gen bihain long kibung. Olsem na ol bosman bilong stediam i tok ol Witnes i no gat wok long baim bikpela mani em kontrak i makim, em bilong baim ol man bilong klinim stediam bihain long kibung i pinis.

Ol Invatesen

Ol kongrigesen long olgeta hap bilong graun i bin mekim bikpela wok long kirapim ol man long tingim ol “De Bilong Kisim Bek Yumi i Klostu!” Kibung. Ol manmeri i go long ol dispela spesel kibung i bin givim bel tru long singautim ol man i kam long kibung. Long de paslain long kibung ol i wok long singautim ol man i kam long kibung i go inap long apinun tru. Hatwok bilong ol i karim kaikai o olsem wanem?

Wanpela Witnes bilong Polan, nem bilong em Bogdan, i bin bungim wanpela lapun man husat i laik kam long kibung, tasol pensen em i save kisim i liklik tumas na em i no inap baim bas i go long Chorzow, em longwe inap 120 kilomita. Bas em kongrigesen i haiarim i gat spes bilong wanpela man moa. Bogdan i tok: “Mipela i tokim lapun olsem sapos em i kam long ples bilong kalap long bas long 5:30 long moningtaim em inap kalap fri.” Lapun i orait long dispela na em i bin i go long kibung. Bihain em i raitim pas long ol brata na em i tok: “Mi bin i go long dispela kibung na nau mi pasim tok long bel olsem mi mas stap olsem gutpela man moa.”

Long Prague wanpela man i stap long seim hotel ol Witnes bilong Briten i stap long en na long wanpela nait em i tokim ol Witnes olsem em tu i bin i go long kibung long dispela de. Wanem samting i kirapim em long i go? Em i tok i gat 10-pela narapela narapela pablisa i bin givim invatesen long em taim em i raun long ol strit bilong siti, olsem na em i pilim olsem em i mas i go! Em i kirap nogut long ol samting em i bin harim na em i gat laik long kisim save moa.​—1 Timoti 2:​3, 4.

Gutpela Skul i Kam Long Baibel

Ol tok bilong kibung i stori long rot bilong stretim kain kain hevi. Ol i kamapim ol tok bilong Baibel i stori long rot bilong stretim o karim ol dispela hevi.

Ol man i gat hevi bilong lapun, sik, wanpela long famili i dai pinis, o narapela hevi, olgeta i kisim gutpela tok bilong Baibel i strongim ol na helpim ol long ting olsem gutpela samting bai painim ol long bihain. (Song 72:​12-​14) Ol marit na ol papamama i harim tok bilong Baibel i helpim ol long painim amamas long marit na mekim gut wok bilong ol long mekim bikpela long ol pikinini bilong ol. (Saveman 4:12; Efesus 5:​22, 25; Kolosi 3:21) Ol yangpela Kristen i gat ol wanskul i laik pulim ol long mekim pasin i no stret, tasol long haus na long kongrigesen ol i kisim ol gutpela Tok Bilong God. Ol i kisim gutpela tok long hau bai ol i sakim ol traim ol wanskul i putim long ol na olsem wanem ol i ken “givim baksait long olgeta kain laik nogut i save kamap long bel bilong ol yangpela man.”​—2 Timoti 2:22.

Wanpela Lain Brata i Stap Long Olgeta Hap

Long olgeta bung bilong ol, ol Witnes Bilong Jehova i save kisim gutpela tok bilong Baibel bilong stiaim ol. (2 Timoti 3:16) Tasol ol dispela kibung i narakain, long wanem, i gat ol manmeri bilong ol narapela narapela kantri. Ol dispela spesel kibung i kamapim ol tok long ol narapela narapela tok ples. Long olgeta de sampela brata bilong Gavening Bodi Bilong Ol Witnes Bilong Jehova i bin mekim ol tok, na i gat ol ripot i kam long ol narapela kantri. Bilong helpim ol man bilong ol narapela narapela tok ples i stap long ol dispela kibung, ol i tanim ol tok na ol dispela ripot long ol tok ples bilong ol.

Ol lain i stap long kibung i amamas tru long bungim ol bratasusa bilong ol bilong ol narapela kantri. Wanpela brata i tok: “Maski ol man i mekim narapela narapela tok ples, i no gat wanpela hevi. Dispela i mekim na olgeta i amamas. Ol i gat narapela narapela tok ples na pasin bilong ples, tasol ol i stap wanbel long bilip.” Ol lain i bin bung long kibung long Munich i tok olsem: “Tok ples i narapela narapela tasol pasin laikim i mekim mipela i wanbel.” Maski ol i bilong wanem kantri na mekim wanem tok ples, olgeta long ol dispela kibung i pilim olsem ol i stap namel long ol pren tru​—em ol bratasista Kristen.​—Sekaraia 8:23.

Ol Tok i Kamapim Amamas

Ren i bin traim pasin bilong ol lain i mekim kibung long Polan. Tasol i no ren tasol, nogat, ples i kol liklik​—olsem 14 digri. Wanpela brata bilong Amerika i tok: “I gat bikpela ren na i kol moa, winim ol narapela kibung mi bin go long en, na mi no save long tok ples, olsem na mi no kisimgut planti tok. Tasol i gat ol brata bilong ol narapela kantri i stap, na mi inap pilim pasin wanbel na pasin bilong mekim gut long narapela, dispela i mekim na mi no wari long ol narapela samting. Dispela kibung em i gutpela tru na mi no inap lusim tingting long en!”

Wanpela samting i mekim na ol lain i mekim tok Polan i no inap lusim tingting long dispela kibung em taim ol brata i tokaut long buk Insight on the Scriptures long tok Polan​—ol i kisim gutpela samting long pasin bilong ol long ol i no les long sindaun long kol na ren. Na tu, long olgeta “De Bilong Kisim Bek Yumi i Klostu!” Kibung ol brata i amamas long kisim nupela buk Live With Jehovah’s Day in Mind.

I gat ol narapela samting i mekim na planti bai tingim dispela kibung. Kristina, wanpela sista bilong Ripablik Sek i bin volantia long lukautim wanpela lain Witnes bilong narapela kantri taim ol i raun long bas, em i tok: “Taim mipela i tok gutbai wanpela sista i holimpasim mi na em i tok: ‘Yu bin lukautim mi gut tru! Yu bin bringim kaikai i kam stret long hap mipela i sindaun long en na yu givim wara long mipela. Tenkyu tru long daunim laik bilong yu yet na kamapim pasin laikim.’ ” Samting sista i stori long en em wok ol brata i mekim bilong givim lans long ol brata bilong ol narapela kantri. Wanpela brata i tok: “Em i wanpela wok mipela i no bin mekim bipo. Mipela i mas tilim 6,500 lans long olgeta de. Mi pilim amamas taim mi luksave olsem planti bratasista, na ol pikinini tu, i bin volantia long mekim dispela wok.”

Wanpela sista husat i bin lusim Yukren na i kam long Chorzow i tok: “Mipela pilim tru pasin laikim, pasin bilong givim samting na mekim gut long narapela em ol wanbilip i mekim long mipela. Mipela painim hat long mekim tok i kamapim tru amamas bilong mipela.” Annika bilong Finlan, i gat 8-pela krismas, i bin raitim pas long brens ofis bilong ol Witnes Bilong Jehova long Polan. Pas i tok: “Kibung i nambawan tru winim samting mi bin ting bai kamap. Em i gutpela tru long stap insait long oganaisesen bilong Jehova, long dispela rot yumi gat ol pren long olgeta hap bilong graun!”​—Song 133:1.

Tok Bilong Ol Man i Lukim Ol Witnes

Paslain long ol kibung ol i stretim rot bilong ol Witnes bilong ol narapela kantri i ken raun lukim ples. Long Bavaria, ausait long ol taun, ol visita i bin i go long ol Haus Kingdom, we ol Witnes bilong ol dispela ples i tok welkam long ol. Wanpela meri bilong kisim ol turis raun, em i no wanpela Witnes, i kirap nogut long pasin laikim bilong ol wanbilip. Wanpela brata i tok: “Taim mipela raun long bas i go bek long hotel, dispela meri i tok mipela i narapela kain long ol narapela turis. Mipela i bilas gut, na bihainim tok bilong man i go pas long grup. No gat tok nogut na ol samting i no paul nabaut. Em i kirap nogut long hau ol man bilong narapela narapela hap, em pastaim narapela i no bin save long narapela, i kamap gutpela pren wantu tasol.”

Wanpela brata husat i wok long Nius Sevis Dipatmen long kibung long Prague i tok: “Long Sande moning, ofisa i bosim ol plisman ol i makim bilong i stap long kibung i kam lukim mipela. Em i tok ol man i stap bel isi na em i no gat wok. Na tu, em i tok sampela manmeri husat haus bilong ol i stap klostu long stediam i bin askim em long dispela bung em wanem kain. Taim em i tokim ol olsem em ol Witnes Bilong Jehova, planti ol i mekim olsem em i samting nogut, tasol ofisa i save tokim ol: ‘Sapos ol man i bihainim liklik hap gutpela pasin tasol bilong ol Witnes Bilong Jehova, bai i no gat wok long ol polis i stap.’ ”

God i Kisim Bek Pinis Planti Man!

Tok Bilong God, em Baibel, i stap olsem bris namel long ol man bilong ol narapela narapela hap, na i mekim na ol Kristen i stap bel isi na wanbel. (Rom 14:19; Efesus 4:​22-​24; Filipai 4:7) Ol spesel “De Bilong Kisim Bek Yumi i Klostu!” kibung i bin kamapim klia dispela samting. God i bin kisim bek pinis ol Witnes Bilong Jehova long planti samting i save nogutim ol man bilong dispela graun. Bel nogut long man bilong narapela lain, pasin pait, na tingim wanpela kala skin i winim narapela​—em sampela hevi bilong ol man. Na ol dispela hevi i no stap namel long ol Witnes, na ol i wetim taim bai kamap bihain we ol dispela hevi bai pinis olgeta long olgeta hap.

Ol lain husat i bin go long ol dispela kibung, ol yet i bin ekspiriensim pasin wanbel i stap namel long ol Witnes bilong ol narapela narapela kantri na i gat ol narapela narapela pasin bilong ples. Dispela samting i kamap ples klia long pinis bilong ol dispela kibung. Olgeta i wok long paitim han, holimpasim ol nupela pren, na kisim ol laspela poto. (1 Korin 1:10; 1 Pita 2:17) Ol i amamas na bilip tru olsem klostu nau God bai kisim bek ol long olgeta hevi. Ol i holim dispela tingting na ol i go bek long ples na kongrigesen bilong ol wantaim strongpela tingting long “holimpas tok i gat laip” i kam long God.​—Filipai 2:​15, 16.

[Futnot]

[Blok/Piksa long pes 10]

Ol Man Bilong Twenti-siks Tok Ples Ol i Stap Wanbel

Long olgeta 9-pela kibung, ol i kamapim ol tok long tok ples bilong ol asples. Long ol kibung long Jemani, ol i mekim tu ol tok long 18 narapela tok ples. Long Dortmund ol i mekim ol tok long tok Arabik, Fasi, Potugal, Spen, na Rasia; long Frankfurt ol i mekim long tok Inglis, Frans, Serbia/Kroesia; long Hamburg ol i mekim long tok Denmak, Holan, Swiden, na Tamil; long Leipzig ol i mekim long tok Saina, Polan, na Teki; na long Munich ol i mekim long tok Grik, Itali, na tok ples Sain bilong Jemani. Long Prague olgeta tok i bin kamap long tok Sek, Inglis, na Rasia. Long Bratislava ol tok i kamap long tok Hangari, Inglis, Slovak, na tok ples Sain bilong Slovak. Long Chorzow ol i mekim long tok Polan, Rasia, Yukren, na tok ples Sain bilong Polan. Na long Poznan ol i mekim long tok Polan, na Finlan.

Twenti-siks tok ples olgeta! Tru tumas, tok ples bilong ol man i go long ol dispela kibung i narapela narapela, tasol pasin laikim i mekim ol i wanbel.

[Piksa long pes 9]

Ol bratasista bilong Kroesia, em ol i bung long Frankfurt ol i amamas tru long kisim Baibel “New World Translation” long tok ples bilong ol yet