“Bihainim Rot God i Makim” Ol Kibung Distrik na Kibung Intenesenel Bilong 1998
1 Yumi tingim tok bilong Sindaun 10:29 (NW) i tok, “Rot bilong Jehova i olsem strongpela ples hait.” Em gutpela as tok bilong kibung bilong dispela yia—“Bihainim Rot God i Makim”! Tasol olsem wanem dispela as tok bilong kibung bai kamap ples klia long dispela tripela de? Yumi olgeta i ken lukluk i go long ol gutpela samting bai yumi kisim. Planti bikpela tok bai i kamap.
2 Long sampela kantri ol i mekim pinis Kibung Intenesenel, na planti tausen brata sista bilong ol narapela narapela kantri ol i stap long ol biktaun ol dispela bikpela kibung i bin kamap long en. Sampela brata sista bilong Papua Niugini i bin kisim gutpela amamas taim ol i go long Vankuva, Kanada, na sampela moa bai go long Ostrelia long Oktoba na Novemba. Taim ol i kam bek na stori long samting ol i mekim, dispela bai strongim yu. Hap bilong program bai stori long olsem wanem Jehova i blesim wok autim tok long ol kain kain teritori.
3 Ol i Hatwok, Tasol Ol i Kisim Bikpela Amamas: Planti brata sista bilong yumi long Afrika i painim hatwok, long wanem, i gat pait na birua i stap long sampela hap bilong kantri. Ol i tingim ol kibung bilong lain bilong Jehova i olsem rot bilong helpim ol. Sampela i mas wokabaut longpela rot tru bilong i go long kibung, tasol ol i no tingting liklik long lusim wanpela kibung. Wanpela lapun brata i gat 73 krismas bilong Demokratik Ripablik Bilong Kongo (bipo em Saier), em i wokabaut inap 450 kilomita samting bilong i go long wanpela kibung. Em i kamap 16 de bihain long em i lusim ples, tupela lek bilong em i solap, tasol em i amamas long stap long kibung. Em i amamas tru long kisim strong long spirit, na bihain long kibung em i wokabaut gen i go bek. Inap planti yia pinis em i mekim wankain samting bilong i go long kibung!
4 Long Mosambik, wanpela wasman distrik na meri bilong em i wokabaut long lek i go antap long wanpela bikpela maunten, na brukim wanpela bikpela hap graun i olsem ples wesan nating bilong i go long wanpela kibung sekit. Ol i wokabaut inap 90 kilomita insait long 45 aua. Gutpela pasin bilong tupela i strongim tru ol manmeri i kam long kibung. Planti famili i go long kibung, ol tu i gat wankain hatwok olsem. Wasman distrik i tok, sampela brata, wanpela em i gat 60 krismas, ol i wokabaut inap 200 kilomita!
5 Olsem wanem? Yu pasim tok pinis olsem yu bai go long kibung bilong dispela yia? I no olsem yu mas wokabaut longwe rot tru, tasol i gat sampela hevi yu mas winim na sampela samting yu mas lusim bambai yu na famili bilong yu i ken stap long kibung. Stretim rot bambai yupela inap i stap long taim program i kirap long namba wan de i go inap long pinis bilong laspela de. Planti Baibel-stadi i wok strong bambai ol inap dediket long Jehova. Taim ol i go long kibung dispela bai helpim ol long makim stret samting ol bai mekim. Olsem wanem? Yu singautim pinis ol Baibel-stadi bilong yu na ol man i laik harim tok long kam wantaim yu long kibung?
6 Program Bilong Tripela De: Long dispela yia, program bilong 3-pela de bai kamap long 4-pela kibung long Papua Niugini. I gat 2-pela kibung long tok Pisin, wanpela long tok Inglis na wanpela long tok Hiri Motu. Long kibung bilong tok Inglis, bai i gat hap bilong mekim tok long han.
7 Program Bilong Tupela De: Long 2-pela kibung bai i gat program bilong 2-pela de, em bai kamap long tok Pisin na tok Hiri Motu. Long Wok Kingdom bilong Septemba 1998, i gat lista bilong ol det na ples ol kibung bai kamap long en. Yupela i kisim toksave pinis long olgeta kibung, na tu, ol i makim wanem kibung em sekit bilong yupela bai go long en.
8 Long Fraide na Sarere, program bai kirap long 9 klok long moningtaim na pinis long 4:30 long apinun. Long Sande program bai kirap long 9:30 long moningtaim na pinis long 4 klok long apinun. Sapos yu laik kisim ples sindaun bilong sampela man, yu no ken mekim paslain long 8 klok moningtaim.
9 Taim yumi go i kam long kibung, yumi mas painim rot bilong autim tok long kain kain taim na ples. Autim tok long man i salim bensin long sevis-tesin, ol man i wok long stua, long ples balus na ples bilong kisim sip, ating wan wan man i laik harim tok bilong Kingdom. Yu ken redi bilong mekim olsem na kisim sampela liklik nius, ol nupela magasin, ol buklet, o ol narapela buk na nius samting wantaim yu, olsem bai yu redi long autim tok long ol man ating ol i no bin harim gutnius.—2 Ti 3:17.
10 “Putim Gut Yau”: I gutpela sapos ol manmeri i go long kibung i bihainim gutpela tok i stap long Luk 8:18. Mipela i kirapim yupela long kisim Baibel na buk singsing na notbuk bilong yupela i kam. Putim gut yau long ol bikpela tok i kamap na raitim liklik tok tasol long notbuk. Askim yu yet, olsem wanem yu ken mekim wok long dispela tok. Long olgeta nait long taim bilong kibung, taim yu laik slip, pastaim yu ken lukim gen ol tok yu raitim long notbuk na traim long skelim yu yet, yu bihainim rot God i makim bilong yu o nogat?—Snd 4:10-13.
11 Mipela i kisim save olsem, long taim bilong program sampela i lusim sia bilong ol na ol i go sindaun long hap i longwe liklik na ol i no harim ol tok i kamap long kibung. Na sampela i no sindaun gut na harim tok, ol i raun raun nating. Long bipo sampela wokboi bilong Jehova i mekim bikpela rong, long wanem, ol i no bin putim gut yau long ol tok bilong Jehova bilong helpim ol. Tru tumas, yumi no laik mekim wankain popaia olsem ol i bin mekim. (2 Kin 17:13-15) “Wokboi i gat gutpela tingting” i bin redim ol tok yumi mas kisim bilong skulim yumi. Olsem na long olgeta de bilong dispela 3-pela de kibung, em i bikpela samting long “yumi mas holim strong long tingting” olgeta wan wan tok yumi harim. Long wan wan de i gat sampela samting yumi bai laikim tru, na tu, ol tok bilong helpim yumi long i stap bilong yumi long bihain. Taim yumi putim gut yau na mekim gutpela wok long ol samting bilong spirit Jehova i redim long rot bilong ol kibung, bilip bilong yumi bai i gat as tru bilong en, olsem bai yumi no slek long bihainim dispela rot God i makim.—Mt 24:45; Hi 2:1.
12 Klos Bilong Yumi i Givim Biknem Long Jehova: Long dispela taim bilong planti hevi, yumi mas putim gut yau moa yet long ol tok na bai spirit bilong dispela graun i no ken pulim yumi. (1 Ko 2:12) Klos na pasin bilong yumi long bilasim skin i mas i stret na i kamapim klia biknem bilong God yumi lotuim. (1 Ti 2:9, 10) I no olsem yumi mas pasim klos i gat bikpela pe bambai yumi inap stap namel long ol man i save “givim biknem long dispela tok yumi autim, em tok tru bilong God, em Man bilong kisim bek yumi.” (Ta 2:10) Yumi ken tingim gutpela tok bilong helpim yumi na ol tok bilong Baibel i stap long Wastaua bilong Jun 15, 1997, pes 17 na 18, paragraf 14-18. Pasin bilong yumi long bilas gut i save givim biknem long Jehova. No ken ting klos bilong yumi em i samting nating, nogat, klos yumi pasim inap givim biknem long Jehova.
13 Mekim Pasin i Litimapim Nem Bilong Jehova: Yumi save pasin Kristen yumi bihainim inap mekim sampela samting long ol man i wok long skelim lotu i tru. Olsem na yumi laik was gut long olgeta taim bambai pasin bilong yumi long bihainim gutnius i stap stret na dispela bai litimapim nem bilong Jehova.—Fl 1:27.
14 Long yia i go pinis, ol i bin mekim namba wan kibung distrik long hap not bilong Angola. Long namba 2 de bilong kibung ol i salim 2-pela polisman i go long ples kibung bilong was, nogut sampela i bikhet. Tupela i stap de olgeta. Long apinun taim program i pinis, ol i tok olsem ol i amamas long ol tok ol i harim na long gutpela pasin ol i lukim. Wanpela i tok: “Bilong wanem ol i salim mipela i kam long hia? Mipela i save long ol bung bilong ol Witnes Bilong Jehova ol i save bihainim lo.”
15 Wanpela memba bilong wanpela lain politik long wanpela kantri long Afrika, em i ranawe i go long Yurop taim ol i kilim i dai sampela memba bilong lain politik bilong em. Em yet i karim planti hevi na em i bel hevi tru. Bihain em i kirap long stadi long Baibel. Taim em i go long namba wan kibung distrik, em i kirap nogut tru long lukim olsem ol man i gat kain kain sindaun, tasol ol i stap bel isi na i stap wanbel wantaim. Em i save em i painim pinis tok i tru, na long taim bilong kibung em i pasim tok olsem em bai lusim olgeta wok samting bilong politik. Bihain em i kisim baptais, na nau em na ol pikinini bilong em i mekim wok bilong Jehova.
16 Olsem wanem? Pasin bilong yumi long taim bilong kibung long dispela yia inap helpim ol man i kam namba wan taim long kibung? Yu ting ol inap luksave olsem yumi save wok gut wantaim taim yumi mekim sampela wok bilong kibung? Olsem wanem? Bai ol i kirap nogut long olgeta samting long ples kibung i stap klin, taim ol i lukim yumi klinim ples paslain long yumi lusim ples kibung, na yumi wantaim ol pikinini bilong yumi i save kisim ol pipia i stap nabaut klostu long ples yumi sindaun long en? Bai ol inap lukim gutpela pasin bilong yumi taim yumi lusim ples slip na i go i kam long ples kibung? Bai ol i luksave olsem yumi ol papamama i save was gut long ol pikinini bilong yumi long olgeta taim? Yumi mas strong long mekim gutpela pasin olsem bai ol man i lukim yumi ol i no ken lusim tingting long gutpela pasin bilong yumi.
17 Bilong Baim Samting Bilong Kibung: Bilong baim tiket bilong sia insait long wanpela stediam bilong pilai samting o wanpela haus kibung, em i bikpela pe tru nau long dispela taim. Wanpela as bilong dispela i olsem pe bilong baim haus long ol taun i go antap. Long taim bilong kibung Sosaiti i ‘no save singaut long mani long yumi, na yumi no baim sia bilong sindaun,’ em lo bilong kibung. Tasol olsem wanem bai yumi baim haus samting yumi mekim kibung long en na ol narapela samting bilong kibung? Ol manmeri i kam long kibung i mekim gutpela pasin long givim kontribusen. Mipela i save bai yu kamapim gutpela pasin bilong yu long givim samting olsem ol wokman bilong Jehova long bipo, ol i bihainim pasin bilong God Jehova na Krais Jisas. (2 Ko 8:7) Ol i was gut tru bambai ol kontribusen i stap gut, na ol i raitim hamas mani ol i kisim, na ol i mekim wok long en i stret long samting ol i makim pinis. Sapos man i laik givim kontribusen long sek, em i ken salim i go long “International Bible Students Association Convention.”
18 Ples Sindaun: Mipela i laik mekim wankain tok mipela i bin mekim inap sampela yia pinis, olsem: YU KEN KISIM SIA BILONG FAMILI BILONG YU TASOL WANTAIM OL MAN I BIN KAM WANTAIM YU LONG KA BILONG YU. Dispela pasin bai kamapim moa yet gutpela pasin long taim bilong kibung. Long planti ples kibung, sampela sia i gutpela moa long ol narapela sia. Plis, yumi mas tingim gut ol narapela, na larim ol gutpela sia i stap bambai ol lapun o ol man i gat sik samting ol i ken sindaun long en. Sapos man i givim bel long narapela man, “em i no save tingting tumas long em yet.”—1 Ko 13:4, 5; Fl 2:4.
19 Kamera, Video-Kamera, na Redio-Kaset: Yu ken mekim wok long kamera na redio-kaset long taim bilong kibung. Tasol taim yu mekim wok long ol, yu no ken pulim ai o tingting bilong ol narapela i sindaun harim tok. Yumi no ken raun bilong kisim ol piksa taim brata i mekim tok, long wanem, dispela bai pulim ai bilong ol man i laik harim gut ol tok bilong program. No ken putim redio-kaset samting long paua bilong ples kibung o ol samting bilong saun, na nogut dispela samting i pasim rot bilong ol man i wokabaut i go i kam, na i pasim ai bilong ol man.
20 Dokta: Dipatmen Bilong Dokta em i bilong helpim ol manmeri i kisim sik o bagarap long taim bilong kibung tasol. Plis bringim asprin, marasin bilong stretim bel samting, banis bilong pasim sua, ol pin, na kain samting olsem, long wanem, bai i no gat ol dispela samting long kibung. Sapos wanpela man i save airaun samting na pundaun, o i gat sik bilong klok, o kain bikpela sik olsem, orait em i mas tingim ol samting em i mas kisim. Wanpela wanblut o wanpela long kongrigesen i save gut long hevi bilong em i mas i stap wantaim em bilong helpim em wantu sapos hevi i kamap. Ol hevi i bin kamap long ol kibung taim ol man i gat bikpela sik ol i stap wanpis na nau hevi i painim ol. Sapos sampela i gat bikpela sik na ol i no gat sampela wanblut long helpim ol, orait ol i mas toksave long ol elda long kongrigesen bilong ol na bai ol i ken stretim rot bilong helpim ol.
21 Kaikai Long Kibung: Ol man i kam long kibung i mas bringim kaikai bilong ol yet i kam bai ol i no ken lusim ples kibung long taim bilong belo bilong go baim kaikai long stua o ples kaikai. Kisim liklik kaikai tasol inap long strongim skin na i no hatwok long karim. Long pepa yumi kisim wantaim Wok Kingdom bilong Novemba 1995, paragraf 21, i stori long wanem kain kaikai yumi ken kisim i kam. No ken kisim ol samting ol i wokim long glas, na bia samting, i kam insait long ples kibung. Eski o paus bilong putim kaikai i mas liklik bambai yu inap putim aninit long sia bilong yu. Mipela i bin lukim sampela i kaikai na dring long taim ol brata i mekim tok. Dispela pasin i makim olsem ol i no tingim kibung i bikpela samting.
22 Yumi amamas tru, long wanem, klostu nau na ol “Bihainim Rot God i Makim” Kibung bilong 1998 bai i kirap! Olsem wanem? Yu stretim pinis ol samting bambai yu inap go long kibung? Yu mas was gut bambai yu inap kamap gut long kibung na taim yu go bek long ples bai yu amamas tru, na wok strong long mekim gutpela wok bilong Jehova, na wok yet long bihainim rot God i makim na kisim blesing oltaim.
[Bokis long pes 10]
Sampela Samting Bilong Kibung Distrik Yumi Mas Tingim
▪ Baptais: Ol bai makim ples sindaun bilong ol man i laik kisim baptais, olsem na gutpela sapos ol man i laik kisim baptais ol i sindaun long ol dispela sia taim program i no kirap yet long Sarere long moningtaim. Man i laik kisim baptais, em i mas kisim klos waswas na taul bilong em i kam long kibung. Klos i mas stret long ol Kristen i pasim. Sampela i bin pasim klos waswas i no stret bilong ol man i kisim baptais. Taim ol elda i mekim ol askim wantaim ol man i laik kisim baptais long buk Lo, ol i mas save gut olsem olgeta wan wan i klia gut long ol dispela samting. Baptais i makim olsem man i dediket long Jehova, na em samting bilong em yet wantaim Jehova. Olsem na i no stret long man i laik baptais i holim han samting bilong narapela na tupela o tripela wantaim i kisim baptais.
▪ Kat Bilong Kibung: Taim yumi go i kam na taim yumi stap long ples kibung, gutpela sapos yumi pasim kat bilong kibung bilong 1998 long olgeta taim. Taim ol man i lukim dispela kat ating bai ol i laik save long kibung bilong yumi na nau rot i op bilong yumi ken autim tok long ol. Yumi mas kisim dispela kat na karamap plastik bilong en long kongrigesen bilong yumi yet, long wanem, bai yumi no inap kisim long kibung. No ken wet inap sampela de paslain long kibung bilong askim long kisim kat bilong yu yet na famili bilong yu. No ken lusim tingting long karim kat “Advance Medical Directive/Release” bilong yu.
▪ Rum-Buk: Bai i no gat planti buk na nius samting long rum-buk bilong kibung. Tasol ol nupela buk samting bai yumi kisim long taim bilong kibung bai ol i stap, tasol sapos ol kongrigesen i gat planti buk samting na ol i laik tilim hariap, orait ol ken putim ol dispela buk long rum-buk na ol pablisa i ken baim. Ol samting i gat lo bilong baim kwik olsem kaset na video-kaset, na Baibel i gat karamap ol i wokim long skin bilong animal, na ol narapela samting; ating ol i no stap long rum-buk, tasol sapos kongrigesen i baim pinis ol dispela samting, orait ol i ken putim.
▪ Ples Slip: Ol kuskus bilong kongrigesen i mas salim ol fom bilong kisim ples slip i go stret long atres bilong kibung. Sapos ol i givim yu ples slip na yu senisim gen, orait toksave kwik long Dipatmen Bilong Rum Slip olsem bai ol i makim narapela bilong kisim dispela ples slip.
▪ Wok Volantia: Yu inap makim wanpela hap taim bilong helpim wanpela dipatmen long taim bilong kibung? Taim yu mekim sampela wok bilong helpim ol brata, maski yu mekim inap liklik taim tasol, em bai gutpela tru na bai yu yet i kisim amamas long dispela. Sapos yu inap mekim olsem, orait yu ken go lukim ol brata long Dipatmen Bilong Volantia long ples kibung. Ol pikinini i aninit long 16 krismas ol tu inap mekim gutpela wok taim ol i wok wantaim papamama bilong ol o narapela brata sista i bikpela pinis.
▪ Was Gut: Yumi mas lokim gut ka long olgeta taim, na no ken larim wanpela samting i stap ples klia insait long ka; nogut dispela i pulim ol man long brukim ka na kisim. Taim planti man i bung wantaim, dispela i save pulim ol stilman i kam. Olsem na no ken lusim sampela samting i gat bikpela pe i stap long sia bilong yu. Sampela man i kam long kibung ol i no Kristen tru. Nogut ol dispela samting i pulim ai bilong ol. LONG OLGETA TAIM YU MAS SAVE, OL PIKININI BILONG YU I STAP WE. Ol papamama o wanpela man i bikpela i mas go wantaim ol liklik pikinini long toilet long olgeta taim. Ol i mas lainim ol long sindaun gut long toilet, na wasim han bilong ol, na mekim gut ol samting na i stap klin.
Sapos yu laik save long sampela samting bilong kibung, no ken raitim pas o ring long bos bilong ples kibung. Sapos kongrigesen i no save, orait, salim pas i go long brens-ofis na ol bai helpim yu.