“Bilip Long Tok Bilong God” Kibung Distrik Bilong 1997
1 Aposel Pol i bin tokim Timoti olsem “spirit bilong God yet i bin kamapim olgeta tok i stap long buk bilong God.” (2 Ti 3:16) Spirit bilong God i bin kamapim ol tok bilong Baibel, olsem na i gat as na yumi ken bilip long en. Nem bilong kibung distrik bilong 1997 em “Bilip Long Tok Bilong God.” Maski yumi bin save long tok i tru inap planti yia pinis o nau tasol yumi kam bung wantaim oganaisesen bilong Jehova, ol tok bilong program bai strongim bilip bilong yumi long Baibel. Yumi olgeta i mas stretim rot bilong i go long olgeta de bilong kibung. Sapos ol nupela manmeri na ol Baibel-stadi bilong yumi ol i kam wantaim yumi, dispela bai strongim tru yumi!
2 Tripela De Kibung: Long dispela yia, Sosaiti i bin redim ol tok bilong tripela de kibung distrik bilong helpim yumi. Wastaua bilong Februeri 15, 1997, i tok 9-pela kibung bai kamap long Papua Niugini. Long nau yu mas save pinis wanem kibung distrik yu bai go long en, na ating yu stretim pinis ol samting bilong i go long olgeta tripela de bilong kibung. Olsem wanem? Yu bin askim bos bilong yu long kisim sampela de malolo bilong go long kibung? Sapos ol pikinini bilong yu i save skul na kibung bilong yupela bai kamap long taim bilong skul, long gutpela pasin yu bin tokim ol tisa bilong ol olsem ol pikinini bilong yu bai i no inap go long skul, long wanem, ol bai i go long dispela bikpela bung bilong lotu bilong ol?—Lo 31:12.
3 Long kibung long tok Inglis long Pot Mosbi, ol bai makim long han (Auslan Sign Language) ol tok bilong program bilong helpim ol yaupas.
4 Long olgeta de program bai kirap long 9:30 long moningtaim. Long planti ples kibung, ol bai opim ol dua bilong ples kibung long 8 klok. No gat wanpela i ken kisim ples sindaun inap long ples kibung i op bilong olgeta i ken go insait.—Fl 2:4.
5 Putim Gut Yau: Aposel Pita i bin tokim ol Kristen long taim bilong em olsem ol i mas putim gut yau long ol tok bilong ol profet i olsem wanpela lam i lait i stap long ples tudak. (2 Pi 1:19) Yumi tu i mas mekim olsem. Yumi stap long dispela olpela pasin bilong dispela graun Satan i bosim na i olsem yumi stap long tudak. Yumi amamas tru, long wanem, yumi lusim pinis tudak bilong spirit na kam ausait. (Kl 1:13; 1 Pi 2:9; 1 Jo 5:19) Bilong i stap yet long lait, yumi gat wok long strongim bilip bilong yumi, na yumi ken mekim olsem taim yumi putim gut yau long Tok bilong Jehova em spirit holi i bin kamapim. Kibung distrik bilong yumi long dispela yia bai kirapim yumi long mekim olsem.
6 Ating yumi yet i mas wok strong sapos yumi laik putim gut yau long ol tok long program, tasol taim yumi mekim olsem, bai yumi kisim ol blesing. Yumi mas malolo gut paslain long yumi kam long kibung, bambai yumi no ai slip o skin i les long taim bilong program. Long olgeta wan wan de, yupela mas makim bikpela hap taim bilong kam long ples kibung bambai yupela i painim ples sindaun paslain long program i kirap. Na bai yupela i ken insait long namba wan singsing na beten long kirap bilong program long olgeta wan wan de. Ol brata sista i bikpela pinis ol i mas i stap olsem gutpela piksa, na ol papamama i mas lainim ol pikinini bilong ol.—Ef 6:4.
7 Sapos yumi lukim nem bilong ol tok long program paslain long kibung i kirap, ating yumi ken traim long tingim wanem ol tok ol brata bai kamapim. Dispela bai mekim na bai yumi amamas long harim tok ol brata bai kamapim. Ating yumi ken putim gut yau long ol tok em inap helpim yumi long tokim ol narapela, i gat wanem as na yumi save bilip long God na ol tok promis bilong em olsem em bai mekim gut long ol man i wok long painim em. (Hi 11:1, 6) I gutpela sapos yumi raitim sampela tok long not-buk bambai yumi inap tingim gen ol bikpela tok bilong program. Sapos yumi wok long raitim planti tok tumas, ating bai yumi no inap harim gut ol bikpela tok.
8 Long yia i go pinis, mipela i bin lukim sampela i raun nating long ples kibung, na ol i go stori wantaim ol narapela long taim ol brata i mekim tok, na ol i no harim ol tok em “wokboi i gat gutpela tingting” i bin redim bilong helpim yumi. Jisas i bin tok promis long givim yumi ol kaikai bilong spirit long taim stret bilong en. (Mt 24:45-47) Olsem na yumi mas sindaun i stap bambai ol dispela kaikai i ken helpim yumi, na yumi no ken mekim nabaut. (2 Ko 6:1) Na tu, taim sampela pikinini i no laik sindaun gut, ol i giaman olsem ol i laik i go long toilet bambai ol i ken kirap na wokabaut nabaut. Sapos ol papamama i skulim gut ol pikinini long haus, ol i no inap go nating nating long toilet. Sampela taim ol yangpela i sindaun wantaim long wanpela hap long arere, na ol i toktok, na raitim ol tok long pepa na salim i go i kam long narapela narapela. Ol yangpela bilong yumi, em kain kain hevi i save painim ol long nau, ol i mas putim gut yau long ol tok i kamap, na ol i no ken mekim ol narapela samting long taim bilong program. Ol i mas abrusim ol laik nogut bilong ol yangpela em i no stret wantaim lo bilong Baibel. (Skelim wantaim 2 Timoti 2:22.) Taim yumi olgeta, ol man i bikpela pinis na ol yangpela, i putim gut yau long ol tok, dispela bai litimapim nem bilong Jehova na mekim em i amamas.
9 Sapos sampela samting olsem i kamap na atendan i mas givim tok long wanpela, orait em i mas bihainim dispela tok na ting olsem long pasin sori Jehova i stretim em. (Ga 6:1) Yumi olgeta i mas save olsem, yumi go long kibung, long wanem, yumi laik harim ol tok na kisim save. (Lo 31:12) Na tu, man i gat gutpela tingting na save em bai harim tok na kisim moa save. (Snd 1:5) Paslain long kibung, toktok wantaim famili long samting olsem: Famili i mas sindaun wantaim na harim gut olgeta tok bilong program bambai ol tok i ken helpim gut ol.
10 Kain Bilas Jehova i Save Amamas Long En: Lain bilong Jehova ol i stap ples klia long ai bilong olgeta manmeri bilong graun. (1 Ko 4:9) Ol manmeri i save amamas long pasin bilong yumi long bilas na mekim gut skin. Yumi bihainim lo bilong Baibel i stap long 1 Timoti 2:9, 10 na 1 Pita 3:3, 4, olsem na bilas bilong planti bilong yumi i bin senis tru na i narakain long bipo taim yumi i no kirap yet long bung wantaim kongrigesen Kristen. Dispela em i narakain tru long bilas bilong ol manmeri bilong dispela graun em i go nogut tru. Yumi laik was gut bambai bilas bilong yumi i no wankain olsem bilong ol manmeri bilong dispela graun. Yumi no laik pasim klos i narakain stret, o bihainim pasin bilong ol man bilong graun long wokim gras, o pasim ol klos i no stret. Pasin bilong yumi long pasim klos i stret na bilas gut, em i mas helpim ol nupela man i kam long kibung long save olsem wanem ol Kristen i mas bilas.
11 Long kibung bilong yia i go pinis, planti man i bin amamas long yumi bin bilas gut na pasim ol klos i stret. Tasol, taim yumi stretim ol samting bilong i go long kibung, i gutpela long yumi skelim wanem kain klos yumi laik pasim. Yupela ol papamama i mas skelim gut wanem kain klos ol pikinini bilong yupela i laik pasim. Yumi no larim ol pasin bilong dispela graun long bilas samting i bagarapim pasin bilong yumi ol Kristen long bilas.
12 Wokabaut Stret Oltaim: Pasin bilong wokabaut stret em mak bilong ol Kristen tru. (1 Pi 2:12) Pasin bilong yumi, maski yumi stap long wanem wanem hap—long kibung, long hap yumi stap long en bihain long kibung, na tu, taim yumi i go i kam long kibung—em inap givim biknem long Jehova na helpim ol narapela long save olsem wanem pasin bilong bilip long God na long Tok bilong em inap helpim ol manmeri. Dispela inap kirapim sampela long kisim save long Jehova. (Skelim wantaim 1 Pita 3:1, 2.) Yumi inap litimapim nem bilong God long pasin bilong yumi—em gutpela samting tru. Tasol yumi mas was gut oltaim na bai yumi no bagarapim gutnem bilong lain bilong Jehova.
13 Yumi harim pinis planti toksave olsem yumi mas bosim gut ol pikinini bilong yumi, na yumi no ken larim ol i raun nabaut. Kibung i save opim rot long yumi ken lukim ol brata sista bilong yumi na bung wantaim ol, tasol ol papamama i mas save olsem em wok bilong ol long was gut long pikinini bilong ol long olgeta taim. Dispela em wok Jehova i givim long olgeta papamama. (Snd 1:8; Ef 6:4) Taim papamama i no was gut na pikinini i mekim sampela pasin kranki, dispela inap daunim gutnem bilong yumi em ol narapela Witnes Bilong Jehova i bin wok strong long kisim. (Snd 29:15) Sapos yumi lukim ol narapela brata o sista i mekim sampela pasin kranki, yumi bihainim gutpela pasin sapos yumi tokim ol long pasin ol i mas bihainim.
14 Ples Slip: Long sampela kibung, ol i mekim wok long ol haus slip bilong skul bilong putim ol brata ol i stap longwe long taun. Yumi amamas tru long dispela samting em lain bilong bosim skul ol i givim long yumi, na taim yumi lusim ples slip yumi laik klinim gut ples. Ol brata sista i no ken kukim kaikai long ol klas-rum. Sapos ol i laik mekim olsem ol i mas stretim gut tok wantaim ol bos bilong skul. Na olsem tasol, yumi ken bihainim ol lo bilong skul long pasin bilong wokim paia insait long banis bilong skul. Ating long sampela skul em i tambu tru long mekim olsem.
15 Sapos yumi slip long haus bilong wanpela brata, yumi no ken ting dispela gutpela pasin em i mekim i samting nating na ating yumi i stap sampela de moa bihain long kibung. Dispela inap givim hevi long brata. Ol brata i go slip long haus bilong narapela brata ol i mas was gut long ol pasin ol i mekim; ol i mas tingim gut papa bilong haus na ol i no ken bagarapim ol samting bilong em, o ol i go insait long sampela hap bilong haus i no stret ol i go insait long en. Sapos sampela hevi olsem i kamap, papa bilong haus i ken toksave long wasman bilong lukautim ol rum slip long kibung.
16 Bilong Baim Samting Bilong Kibung: Yumi olgeta bai lusim sampela mani bilong i go long kibung. Tasol i gat narapela samting tu em yumi mas tingim. Pe bilong ol ples kibung yumi mekim wok long en i antap. Na i gat sampela narapela samting tu em yumi mas baim. Long nau yumi no salim ol kaikai long taim bilong ol kibung, olsem na em i bikpela samting moa long yumi givim mani olsem kontribusen long laik bilong yumi yet. Sosaiti i amamas tru long gutpela pasin yupela i mekim bilong helpim kibung long dispela rot.—Ap 20:35; 2 Ko 9:7, 11, 13.
17 Ples Sindaun: Mipela i laik mekim wankain tok mipela i bin mekim inap sampela yia pinis, olsem: YU KEN KISIM SIA BILONG FAMILI BILONG YU TASOL WANTAIM OL MAN I BIN KAM WANTAIM YU LONG KA BILONG YU. I gutpela tru long lukim planti moa i wok long bihainim dispela tok inap sampela yia nau, na dispela i bin strongim tru pasin sori yumi mekim long kibung. Long planti ples kibung, sampela sia i gutpela moa long ol narapela sia. Plis tingim gut ol narapela, na larim ol gutpela sia i stap bambai ol lapun o ol man i gat sik samting ol i ken sindaun long en.
18 Kamera, Video-Kamera, na Redio-Kaset: Yumi ken mekim wok long ol kamera na redio-kaset long taim bilong kibung. Tasol, taim yumi mekim wok long ol, yumi no ken pulim ai o tingting bilong ol narapela i sindaun harim tok. Yumi no ken raun bilong kisim ol poto taim brata i mekim tok, long wanem, dispela bai pulim ai bilong ol man i laik harim gut ol tok bilong program. No ken skruim redio-kaset samting long paua bilong ples kibung o ol samting bilong saun, na nogut dispela samting i pasim rot bilong ol man i wokabaut i go i kam.
19 Dokta: Dipatmen Bilong Dokta em i bilong helpim ol manmeri i kisim sik o bagarap long taim bilong kibung tasol. Dipatmen i no inap lukautim ol man i gat sik inap longtaim pinis. Olsem na paslain long kibung yu mas tingim ol marasin samting bilong yu yet na famili bilong yu i mas kisim. Plis bringim aspirin, marasin bilong stretim bel samting, banis bilong pasim sua, ol pin, na ol kain samting olsem, long wanem, bai i no gat ol dispela samting long kibung. Sapos wanpela man i save airaun samting na pundaun, o i gat sik bilong klok, o kain bikpela sik olsem, orait em i mas tingim ol samting em i mas kisim. Em i mas i gat marasin samting bilong em, na wanpela wanblut o wanpela long kongrigesen em i save gut long hevi bilong em, em i mas i stap wantaim em long olgeta taim bilong helpim em. Ol hevi i bin kamap long ol kibung taim ol man i gat bikpela sik ol i stap wanpis na nau hevi i painim ol. Ofis bilong lukautim wok bilong kibung i mas ringim ambulens bilong kisim ol i go long haus sik. Sapos sampela i gat bikpela sik na ol i no gat sampela wanfamili long helpim ol, orait ol i mas toksave long ol elda long kongrigesen bilong ol na bai ol i ken stretim rot bilong helpim ol.
20 Kaikai Long Kibung: Long planti hap, ol i no redim moa ol kaikai long taim bilong kibung. Ating long wan wan hap bai yumi mas wokim liklik kaikai tasol long apinun bilong helpim ol brata sista em ol i no inap kukim kaikai long hap ol i slip long en. Olsem na planti brata sista moa ol i gat taim bilong kisim gut ol kaikai bilong spirit long taim bilong program. Planti brata sista i bin rait na tok amamas long dispela samting. Yumi olgeta i mas redi long kisim kaikai bilong yumi yet i kam. Kisim ol kaikai bilong belo olsem pepa yumi kisim wantaim Wok Kingdom bilong Novemba 1995, long paragraf 21, i stori long en. No ken kisim ol samting ol i wokim long glas i kam long kibung. Sapos yupela mekim wok long eski, em i no ken pasim ol rot bilong wokabaut. Mipela i bin lukim sampela i kaikai na dring long taim ol brata i mekim tok. Dispela pasin i no gutpela. Ol haus kaikai o stua samting i stap klostu long sampela ples kibung, na mipela i bin lukim sampela brata i go baim ol samting long en long taim bilong program. I no stret yumi mekim olsem.
21 Yumi save amamas tru long ol gutpela kaikai bilong spirit, na amamas na bel isi i stap namel long ol brata taim yumi bung wantaim long taim bilong malolo long belo. Bilong yumi ken insait tru long ol dispela samting, no ken lusim ples kibung long taim bilong belo na go painim kaikai, nogat; plis kisim kaikai i kam. Long dispela rot, bai yu gat bikpela hap taim bilong bung na amamas wantaim ol brata na sista.
22 Yumi amamas tru, long wanem, i no longtaim ol “Bilip Long Tok Bilong God” Kibung Distrik bai kirap! Yumi olgeta i laik redi gut na bai yumi ken harim olgeta tok bilong program, na bai yumi amamas long kisim gut olgeta kaikai bilong spirit Jehova i bin redim long rot bilong oganaisesen bilong em. Long dispela rot, bai yumi kamap man i “redi long mekim olgeta kain gutpela wok” long bihain.—2 Ti 3:17.
[Blok long pes 6]
Sampela Samting Bilong Kibung Distrik Yumi Mas Tingim
Baptais: Ol bai makim ples sindaun bilong ol man i laik kisim baptais, olsem na gutpela sapos ol man i laik kisim baptais ol i sindaun long ol dispela sia taim program i no kirap yet long Sarere long moningtaim. Man i laik kisim baptais, em i mas kisim klos waswas na taul bilong em i kam long kibung. Klos waswas i mas stret long ol Kristen i pasim. Long bipo, sampela i bin pasim klos waswas i no stret, olsem ol singlis i gat ol rait long en, na i no stret long man i kisim baptais. Taim ol elda i mekim ol askim wantaim ol man i laik kisim baptais long buk Lo, ol i mas save gut olsem olgeta wan wan i klia gut long ol dispela samting. Taim brata i mekim pinis tok bilong baptais na beten, siaman bilong program bai kirapim yumi long mekim wanpela singsing. Taim yumi mekim pinis laspela hap bilong singsing, ol atendan bai tokim ol man i laik baptais long wanem hap ol i mas i go long en bilong kisim baptais. Baptais i makim olsem man i dediket long Jehova, na em samting bilong em yet wantaim Jehova. Olsem na i no stret long man i laik baptais i holim han samting bilong narapela na tupela o tripela wantaim i kisim baptais.
Kat Bilong Kibung: Taim yumi go i kam na taim yumi i stap long ples kibung, gutpela sapos yumi pasim kat bilong kibung bilong 1997 long olgeta taim. Taim ol man i lukim dispela kat ating bai ol i laik save long kibung bilong yumi, na nau rot i op bilong yumi ken autim tok long ol. Yumi mas kisim dispela kat na karamap plastik bilong en long kongrigesen bilong yumi yet, long wanem, bai yumi no inap kisim long kibung. No ken wet inap sampela de paslain long kibung bilong askim long kisim kat bilong yu yet na famili bilong yu. No ken lusim tingting long karim kat “Advance Medical Directive/Release.”
Ples Slip: SAPOS YU GAT SAMPELA HEVI LONG PLES SLIP BILONG YU, plis no ken pret long lukim ol brata long Dipatmen Bilong Rum Slip bambai ol i helpim yu long stretim dispela hevi hariap.
Wok Volantia: Bai yu inap makim wanpela hap taim bilong helpim wanpela dipatmen long taim bilong kibung? Taim yumi mekim sampela wok bilong helpim ol brata, maski yumi mekim inap sampela aua tasol, em bai gutpela tru na yumi yet i kisim bikpela amamas. Sapos yu inap mekim olsem, orait yu ken go lukim ol brata long Dipatmen Bilong Volantia long ples kibung. Ol pikinini i no gat 16 krismas yet ol tu inap mekim gutpela wok taim ol i wok wantaim papamama bilong ol o narapela brata sista i bikpela pinis.
Was Gut: Sapos yumi was gut, ating bai yumi no kisim hevi. Planti taim ol raskol i save stilim ol samting long man i lusim ples bilong em na i go i stap long narapela hap. Yu mas lokim gut ka long olgeta taim, na no ken larim sampela samting i stap ples klia insait long ka; nogut ol man i brukim na kisim. Taim planti man i bung wantaim, dispela i save pulim ol stilman i kam. Olsem na no ken lusim sampela samting i gat bikpela pe bilong en i stap long sia bilong yu. Sampela man i kam long kibung ol i no Kristen tru. Nogut ol dispela samting i pulim ai bilong ol. LONG OLGETA TAIM YU MAS SAVE, OL PIKININI BILONG YU I STAP WE.
Sapos yu laik save long sampela samting bilong kibung, no ken raitim pas o ringim bos bilong ples kibung. Sapos kongrigesen i no save, orait, salim pas i go long brens-ofis na ol bai helpim yu.