“Tok Profet Bilong God” Kibung Distrik Bilong 1999
1 Klostu long taim ol Israel i laik i go insait long Graun Bilong Promis, Moses i kirapim ol long pilim tru ol lo God i bin givim long ol. Em i tokim ol: “Dispela tok bilong God i no toktok nating. Nogat. Em i as tru bilong yupela i ken i stap gut.” (Lo 32:45-47) Olsem wanem? Yumi tenkyu long Jehova, long wanem, em i tingim laip bilong yumi i olsem wanpela naispela samting tru na em i wok yet long stiaim yumi long rot bilong ol gutpela tok bilong em long Baibel? Olsem na yumi amamas tru long wetim dispela 3-pela de “Tok Profet Bilong God” Kibung Distrik na ol samting Jehova i redim pinis bilong givim long yumi.
2 Long dispela yia, ol dispela kibung bai kamap long sikspela hap long Papua Niugini. Long olgeta dispela hap, ol tok bilong program bai kamap long Tok Pisin, tasol long Pot Mosbi bai i gat kibung long tok Hiri Motu na tok Inglis. Long kibung long Alotau na Kiunga, ol bai mekim wan wan tok long tok Hiri Motu. Long kibung long Tok Pisin long Pot Mosbi, bai ol i mekim tu ol tok long han bilong helpim ol yaupas.
3 Mipela i save, yu stretim pinis ol samting bilong i go long olgeta de bilong kibung, long wanem, yu bilip tru olsem Jehova i laik bai yu mas i go long en. Yu mas save olsem, Jehova i save lukim hatwok olgeta wan wan wokboi bilong em i mekim bilong go long kibung, na em i save tingim ol dispela hatwok na amamas long en. (Hi 6:10) Taim yumi go long olgeta wan wan de bilong kibung, kirap long namba wan singsing i go inap long laspela beten, yumi kamapim long Jehova olsem yumi tingim tok em i givim long yumi i olsem gutpela samting tru. (Lo 4:10) Na tu, yumi kamapim olsem yumi pilim tru bikpela wok ol brata i mekim bilong redim ol samting bilong dispela kibung.
4 Bilong stretim ol samting bambai planti handet manmeri i ken bung long ol wan wan ples kibung, inap sampela mun paslain long kibung ol brata i mas redim na stretim gut ol samting. Taim yumi tingim dispela gutpela pasin bilong ol brata long redim ol samting bilong kibung, dispela i mas kirapim yumi long wok gut wantaim ol bambai olgeta samting i ken wok gut na wok stret na kamap gut. (1 Ko 14:40) Ol tok mipela i kamapim daunbilo bai helpim yu na taim yu kamap long kibung bai yu redi gut long kisim ol gutpela kaikai bilong spirit na bung wantaim ol narapela Kristen.
Paslain Long Kibung
5 Olsem wanem? Yu mas helpim ol Baibel-stadi bilong yu na ol narapela i laik harim tok, bambai ol i ken redim ol samting bilong kam long kibung? Ol samting ol i lukim na ol tok ol i harim inap kirapim ol long lotuim Jehova. (1 Ko 14:25) Tasol yu mas was gut taim yu singautim ol wantok bilong yu em ol i no pilim tru ol samting bilong spirit. Sampela samting i bin kamap i makim olsem, sampela i bin kam long ol kibung, ol i no gat stretpela tingting, na taim ol i kam long PMV ol brata i bin redim na stap long ples slip ol brata i bin redim, ol i mekim sampela wok bilong ol yet. Ol elda i mas save husat husat i mas kisim tru helpim bilong painim ples slip o PMV samting. Tingim moa yet ol lapun long kongrigesen na helpim gut ol.—Ga 6:10.
6 Yu stretim pinis olgeta samting long ples slip bilong yu? Ol fom bilong ples slip em Komiti Bilong Lukautim Wok Bilong Kongrigesen i orait long en, ating kuskus i salim pinis long atres bilong kibung. Sapos yu senisim tingting bilong yu, orait kwiktaim yu mas toksave long Dipatmen Bilong Lukautim Ol Rum Slip bilong kibung bambai ol i ken makim narapela long kisim dispela rum.
7 I gat Etpos long kibung, na dispela dipatmen i bilong helpim ol man i kisim sik o bagarap long taim bilong kibung tasol. Sapos yu ting yu bai mekim wok long aspirin, banis bilong pasim sua, liklik masin bilong pulim win, marasin bilong stretim bel samting, na ol kain samting olsem, mipela i laik bai yu yet i bringim ol dispela samting i kam wantaim yu. Sapos yu o wanblut bilong yu i gat wanpela bikpela sik olsem sik bilong klok, daiabitis, o sik bilong airaun na pundaun, orait plis bringim ol marasin samting bilong yu yet. I gutpela sapos wanpela long famili o wanpela gutpela poroman i save gut long sik bilong em, i ken stap wantaim em long olgeta taim bilong helpim em.
8 Taim yu wok long i go i kam long kibung, ating rot bai op long yu long autim tok. Olsem wanem? Bai yu redi long toktok wantaim ol narapela long tok i tru? Yumi olgeta, ol yangpela tu, i ken givim ol liklik nius long ol wokman bilong sevis-stesin, draiva na boskru bilong PMV, na sampela narapela man yumi bungim taim yumi i go i kam long kibung. Sampela taim rot bai op long yumi tilim ol magasin, buklet, o buk samting long ol man i laik harim tok. Redi long autim tok long ol man long kain kain taim na ples, em sampela ating yumi no save bungim ol long taim yumi autim tok long ol wan wan haus.
Long Taim Bilong Kibung
9 Long olgeta wan wan de, program bai kirap long 9:00 klok long moningtaim. Yu ken redim sia bilong famili bilong yu tasol na ol man i kam wantaim yu long ka bilong yu. Taim yu lusim sia bilong yu long olgeta wan wan de, plis sekim gut sia, nogut yu lusim sampela samting bilong yu.
10 Bai yu kisim baptais long kibung distrik? Long Sarere long moningtaim, ol bai makim ples sindaun bilong ol lain i laik kisim baptais, na ol atendan bai soim yu long hap bilong sindaun. Sapos inap, yu ken sindaun long dispela hap paslain long program i kirap. Bringim Baibel, buk singsing, taul, na klos waswas. Klos waswas i mas stret long man i kisim baptais. Ol trausis em ol i katim klostu long skru, T-siot i gat rait, na ol kain klos olsem, ol i no stret long pasim long taim bilong baptais. Taim ol elda i mekim ol askim bilong buk Lo wantaim ol lain i laik kisim baptais, ol i mas save gut olsem olgeta wan wan i klia gut long ol dispela samting. Baptais i makim olsem man i dediket pinis long Jehova, na em samting bilong em yet wantaim Jehova, olsem na i no stret long man i laik kisim baptais em i holim han bilong narapela na tupela o tripela wantaim i kisim baptais.
11 Yu ken mekim wok long kamera, video-kamera, na redio-kaset long taim bilong kibung. Tasol taim yu mekim wok long ol, no ken pasim rot bilong wokabaut, o pasim ai bilong ol narapela, o pulim ai na tingting bilong narapela i laik harim tok. Ol dispela samting i mas i gat bateri samting bilong ol yet—no ken skruim long paua bilong saun samting.
12 Sosaiti i laik bai yumi kisim kaikai bilong yumi yet i kam long olgeta de, long wanem, dispela i no ken pulim taim bilong ol brata na bai i no gat bikpela wok bilong redim kaikai samting. Planti brata i bihainim dispela tok, olsem na long taim bilong malolo long belo, ol inap sindaun wantaim famili bilong ol na kaikai. Planti i tok, nau ol i gat rot bilong sindaun gut long belo na malolo na amamas long stori wantaim ol brata sista. Bilong mekim olsem, sampela de paslain long kibung yupela i mas baim ol kaikai na kol dring samting na putim insait long liklik eski samting em yupela inap putim aninit long sia bilong yupela. Olsem na mipela i kirapim olgeta wan wan long bringim kaikai na kol dring samting bilong ol yet i kam long olgeta wan wan de bilong kibung. Ol narapela i kam wantaim yupela, ol tu i mas bringim kaikai bilong ol yet. No ken kisim ol samting ol i wokim long glas o bringim bia samting i kam insait long ples kibung.
13 Yu inap helpim ol brata long klinim ples kibung bihain long program long olgeta wan wan de? O yu inap helpim wok long ol narapela dipatmen bilong kibung? Sapos yu inap mekim olsem, plis go lukim ol brata long Dipatmen Bilong Wok Volantia long kibung. Ol pikinini aninit long 16 krismas ol tu i ken wok wantaim papamama o ol narapela brata o sista i bikpela pinis. Olgeta i ken helpim wok bilong klinim ples kibung. Olsem: Taim ol i lukim ol pipia i stap long graun ol i ken kisim na putim long dram pipia.
14 Yumi bin kisim ol gutpela tok bilong helpim yumi long skelim wanem kain klos i stret bilong pasim long taim bilong kibung. Olsem: Yumi kisim ol tok long pepa yumi kisim wantaim Wok Kingdom, yumi inap lukim ol piksa i stap long ol buk na nius samting bilong yumi, na bikpela samting tru em, yumi gat tok bilong Jehova i stap long Baibel. (Ro 12:2; 1 Ti 2:9, 10) Ol man i save long yumi, na ol i save long as na yumi kam bung long hap bilong ol. Olsem na klos yumi pasim na pasin bilong yumi long bilas, em i wanpela bikpela samting bilong litimapim nem bilong God. Planti bilong ol lain bilong Jehova ol i stap olsem gutpela piksa long pasin bilong bilas gut. Tasol wan wan taim yumi lukim sampela i kam long kibung, ol i bihainim pasin bilong ol man bilong dispela graun long bilas. Man i pasim klos em ol man inap lukim skin bilong em, dispela i makim olsem em i no strong long ol samting bilong spirit. Man i pasim klos i stret na i klin, dispela i gutpela tru bilong lukim. Ol papa i mas save wanem kain klos olgeta wan wan long famili i tingting long pasim. Yumi ken tingim tu dispela samting taim yumi lusim ples kibung na stap long sampela narapela hap. Paslain na bihain long program bilong olgeta wan wan de, yumi mas pasim kat bilong kibung, na dispela bai kamapim klia olsem yumi insait long lain bilong Jehova em ol i stap klin.—Skelim wantaim Mak 8:38.
15 Spirit bilong God i kirapim saveman King Solomon na em i tok, “pikinini i save mekim olkain longlong pasin” na “sapos pikinini i bihainim laik bilong em yet oltaim, orait em bai i mekim mama bilong en i sem.” (Snd 22:15; 29:15) Sampela taim, long taim bilong program, sampela pikinini i pilai samting na ol brata na sista i no harim gut ol tok. Jehova bai skelim wok bilong ol papamama long pasin ol pikinini i mekim, olsem na sapos ol pikinini i sindaun wantaim ol, papa o mama inap save tru olsem ol pikinini i sindaun gut na harim ol tok bilong Jehova o nogat. Ol Witnes i bikpela pinis, ol i mas i stap olsem gutpela piksa na ol i no ken bung nating nating long ples bilong putim ol ka o long ples kibung long taim bilong program. Sapos sampela i mekim ol samting na dispela i pulim tingting bilong ol manmeri i harim tok, orait ol atendan bai tokim ol long lusim dispela pasin, na long gutpela pasin ol bai tokim ol long putim gut yau long ol tok bilong program.
16 Yumi amamas long ol narapela manmeri i kam long kibung bilong yumi, olsem na i gutpela yumi mas was gut long ol pikinini na ol samting bilong yumi. Ol pikinini i olsem gutpela presen Jehova i givim long yumi. Tasol yumi save ol man bilong dispela graun i bihainim ol pasin i olsem bilong Satan na i laik bagarapim ol pikinini. Olsem na plis, long olgeta taim yupela i mas save ol pikinini bilong yupela i stap we. Na tu, yupela i no ken lusim kamera, paus, na sampela narapela samting i dia long sia bilong yupela, yupela i mas holim long olgeta taim. Yupela i mas lokim ka bilong yupela, na putim ol samting long baksait bilong ka o yupela i ken kisim i go wantaim yupela. Olsem bai ol dispela samting i no pulim ai bilong ol man long brukim ka na stil.
17 Sapos i gat ol nupela buk samting bilong kisim long kibung, bai yupela i kisim long rum-buk. Ol brata bai i no inap putim planti bilong ol narapela buk samting. Sapos wanpela kongrigesen i gat planti tumas buk samting, orait ol i ken putim ol dispela long rum-buk bilong ol pablisa o ol narapela i ken kisim. Ol i ken putim tu ol buk samting bilong tilim. Ol buk samting em yu mas putim oda long en bilong kisim, ol i no ken putim long rum-buk.
18 Sapos yu gat hevi long ol samting bilong rum slip, Dipatmen Bilong Rum Slip bilong kibung bai amamas long helpim yu. Sapos yu gat sampela hevi, plis toksave long Dipatmen taim yu stap yet long kibung. Ol brata bai amamas long helpim yu long stretim dispela hevi bambai yu ken stap amamas na harim ol gutpela tok bilong kibung.
19 Long taim bilong kibung, em i gutpela tru long lukim ol brata na sista i raitim sampela tok long notbuk. Sapos yu raitim ol sotpela tok, dispela bai helpim yu long putim gut yau long ol tok na bai yu tingim bek ol bikpela tok bihain long kibung. Taim yu skelim gen ol dispela tok wantaim famili o ol pren bilong yu, dispela bai helpim yu long tingim tingim long bel ol bikpela tok bilong kibung na bai yu no inap lusim tingting long ol.
20 Long olgeta taim ol papamama o narapela i bikpela pinis ol i mas was long ol liklik pikinini taim ol i go long toilet. Ol i mas skulim ol long pasin bilong yusim gut toilet, na wasim han, na tingim gut ples na long mekim ol samting i stap klin.
21 Long olgeta taim ol lain bilong Jehova i save mekim gutpela pasin long givim mani samting bilong helpim wok bilong God. (Kis 36:5-7; 2 Sto 31:10; Ro 15:26, 27) Ol kontribusen yu save givim long laik bilong yu yet bilong helpim wok bilong autim tok long olgeta hap, Sosaiti i save mekim wok long en bilong baim ol samting bilong mekim kibung. Sapos yu laik givim kontribusen long sek, plis yu ken salim i go long “International Bible Students Association Convention.”
22 Olsem Amos 3:7 i tok, “olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.” Jehova em i Man bilong kamapim “ol samting i hait,” na truim bilong planti handet tok profet em i bin kamapim na i stap long Baibel ol i kamap tru pinis. (Dan 2:28, 47) Bihain, bai truim bilong sampela tok profet moa bai kamap. “Tok Profet Bilong God” Kibung Distrik bilong 1999 bai strongim bilip bilong yu long ol tok promis bilong God. Putim gut yau long ol tok Jehova i givim long yu. Long taim bilong wok autim tok, na insait long kongrigesen, na long i stap bilong yu, bihainim ol samting yu lukim na ol tok yu harim. Mipela i beten olsem Jehova i ken blesim olgeta samting yupela i mekim bilong i go long olgeta de bilong dispela bikpela bung bilong kisim ol gutpela kaikai bilong spirit!
[Rait long pes 3]
Stretim rot bilong go na harim olgeta tok bilong Fraide, Sarere, na Sande!
Ples Bilong Ol Kibung Distrik Bilong 1999
NOVEMBA 12-14, 1999
POT MOSBI (Tok Inglis), Gerehu Assembly Grounds (Sekit: 2C Boroko Kongrigesen; 2E Daru Kongrigesen)
NOVEMBA 19-21, 1999
POT MOSBI (Hiri Motu), Gerehu Assembly Grounds (Sekit: 1A NCD ol kongrigesen long tok Hiri Motu, Sentral Provins; 2D Galf Provins)
NOVEMBA 26-28, 1999
POT MOSBI (Tok Pisin), Gerehu Assembly Grounds (Sekit: 2A NCD ol kongrigesen long Tok Pisin)
DISEMBA 3-5, 1999
LAE (Tok Pisin), Sir Ignatius Kilage Sports Hall (Sekit: 2B Oro Provins; 3A/B ol provins long Hailans; 4A Morobe Provins; 5D Manus Provins; 6C Madang Provins)
DISEMBA 10-12, 1999
WEWAK (Tok Pisin), Wewak Kingdom Hall, Boram Road (Sekit: 6A/B Is Sepik na Sandaun Provins)
DISEMBA 17-19, 1999
KIMBE (Tok Pisin), Kimbe High School(Sekit: 5A Wes Niu Briten Provins; 5B Niu Ailan Provins; 5C Is Niu Briten Provins, Ol Ailan Tasman, Not Solomon)
ALOTAU (Tok Pisin, Hiri Motu), Cameron High School (Sekit: 1B/C Milen Be Provins)
DISEMBA 24-26, 1999
KIUNGA (Tok Pisin, Hiri Motu), Kiunga High School (Sekit: 3C ol kongrigesen long Lake Murray; 3D Kiunga na Tabubil kongrigesen)